Itsinda A

Australia 159-51 Sri Lanka

Bangladesh 104-103 USA

Itsinda D

India 151-66 Scotland

South Africa 112-67 UAE

Taliki 19-01-2023

Itsinda B

England-Rwanda (NW University Oval-10h00)

Zimbabwe-Pakistan (NW University Oval-13h45)

Itsinda C

Ireland-Indonesia (JB Marks Oval-10h00)

New Zealand-West Indies (JB Marks Oval-13h45)

Kuri uyu wa Kane taliki 19 Mutarama 2023 ni bwo hakinwa imikino ya nyuma mu itsinda B na C mu mikino y’igikombe cy’Isi muri Cricket mu  cyiciro cy’abakobwa batarengeje imyaka 19 “ICC U-19 Women’s T20 World Cup 2023”, imikino irimo kubera muri Afurika y’Epfo.

Mu itsinda B, ikipe y’u Rwanda nyuma yo gutsinda  Zimbabwe  mu mukino  wa kabiri, irasoza imikino yo mu itsinda ikina n’ikipe ya England yatsinze imikino yayo yombi (Zimbabwe na Pakistan).

Uyu mukino urabera muri North-West University Oval mu mujyi wa  Potchefstroom guhera saa yine (10h00).

Undi mukino uteganyijwe, ikipe ya Zimbabwe irakina na Pakistan, umukino  urabera muri North-West University Oval  guhera saa saba n’iminota 45 (13h45).

Aya makipe yombi nta bwo yitwaye neza mu mukino uheruka kuko, Zimbabwe yatsinzwe n’u Rwanda naho Pakistan itsindwa na England, gusa ikipe ya Pakistan ku mukino wa mbere mu itsinda yitwaye neza itsinda u Rwanda.

Mu itsinda C naho harakinwa imikino ya nyuma mu itsinda aho Ireland ikina na Indonesia kuri JB Marks Oval (10h00) naho New Zealand ikine na West Indies kuri JB Marks Oval (13h45).

Uko imikino ya nyuma mu itsinda A na D yagenze

Ku wa Gatatu taliki 18 Mutarama 2023 habaye imikino y’umunsi wa 5 ikaba yari iya nyuma mu  itsinda A na D.

Mu itsinda A, ikipe ya Australia yatsinze Sri Lanka naho ikipe ya Bangladesh itsinda USA.

Ikipe ya Bangladesh ni yo yasoje iyoboye n’amanota 6 ikurikiwe na Australia (4),  Sri Lanka (2) na USA (0).

Mu itsinda D, ikipe ya India yatsinze Scotland naho ikipe ya South Africa irimo gukinira mu rugo itsinda UAE.

Ikipe ya India yasoje iyoboye urutonde n’amanota 6 ikurikiwe na South Africa (4), UAE (2) na Scotland (0).

Nyuma y’iyi mikino yo mu matsinda, amakipe 3 ya mbere muri buri tsinda (A na D) yakomeje mu kindi cyiciro  “Super 6” aho yagiye mu itsinda rya mbere. Aya makipe azakina hanyuma abiri ya mbere akomeze muri ½ cy’irangiza aho ikipe ya USA (A) na Scotland (D) zizakina imikino yo guhatanira imyanya ine ya nyuma.

Ba uwa mbere mu kumenya amakuru agezweho!!!