Taliki 03-09-2022

Rwanda-Nigeria (Gaborone-09h30)

Taliki 06-09-2022

Rwanda-Malawi (Gaborone-14h00)

Taliki 07-09-2022

Mozambique-Rwanda (Gaborone-14h00)

Taliki 09-09-2022

Tanzania-Rwanda (Gaborone-09h30)

Ikipe y’u Rwanda mu bakobwa batarengeje imyaka 19 mu mukino wa Cricket  kuva taliki 01 Nzeri 2022 iri i Gaborone muri Botswana aho yitabiriye imikino y’Afurika yo gushaka itike y’igikombe cy’Isi  kigiye kuba ku nshuro ya mbere “ ICC U-19 Women’s T20 World Cup 2023”.

Imikino yo gushaka itike “ ICC U-19 Women’s T20 World Cup Africa Qualifiers 2022” izatangira kuri uyu wa Gatandatu taliki 03 izasozwe 12 Nzeri 2022. Iyi mikino yitabiriwe n’amakipe 9 aho yashyizwe mu matsinda abiri.

Itsinda A rigizwe n’u Rwanda, Nigeria, Malawi, Mozambique na Tanzania naho itsinda B rigizwe na Botswana, Namibia, Sierra Leone na Uganda.

Muri buri tsinda amakipe azakina hagati yayo hanyuma abiri ya mbere akomeze muri ½ , ayitwaye neza ahurire ku mukino wa nyuma, ikipe izatsinda abe ari yo izabona itike yo kuzitabira imikino ya nyuma y’igikombe cy’Isi.

Gahunda y’imikino ku ruhande rw’ikipe y’u Rwanda

Ikipe y’u Rwanda izatangira ikina na Nigeria, taliki 03 Nzeri 2022. Umukino uzatangira saa tatu n’igice (09h30) muri Botswana akaba ari ku isaha imwe no mu Rwanda.

Umukino wa kabiri uteganyijwe taliki 06 Nzeri 2022 aho ikipe y’u Rwanda izakina na Malawi (14h00). Taliki 07 Nzeri 2022, ikipe y’u Rwanda izakina na Mozambique (14h00) naho taliki 09 Nzeri 2022, ikipe y’u Rwanda ikine na Tanzania.

Abakinnyi baserukiye u Rwanda

Abakinnyi baserukiye u Rwanda ni Ishimwe Gisele (Kapiteni), Uwase Merveille (Kapiteni wugirije), Murekatete Belyse, Isimbi Henriette, Mukandayisenga Janette, Uwase  Geovanis, Muragijimana Cesarie, Tuyizere Cynthia, Igihozo Divine, Ishimwe Henriette, Irera Rosine, Tumukunde Marie Josee, Uwase Geovanus na Niyomuhoza Shakila.

Umutoza mukuru ni Leonard Nhamburo wungirijwe na Bugingo Bryson Kenneth, umuganga ni Iyakaremye Theoneste, Mukarurangwa Delphine  ni we ushinzwe ubuzima bw’ikipe umunsi ku wundi “Team Manager” naho  Uwimana Sonia ni we wagiye ayoboye iyi kipe “Head of Delegation”.

Imikino y’igikombe cy’Isi  “ICC U-19 Women’s T20 World Cup 2023” izabera muri Afurika y’Epfo  muri Mutarama 2023.

Iyi mikino izitabirwa n’ibihugu 16, ibihugu 15 bikaba byaramaze kubona itike ari byo South Africa izakira irushanwa, Australia, Bangladesh, England, India, Ireland, New Zealand, Pakistan, Sri Lanka, USA, West Indies, Zimbabwe, Indonesia, United Arab Emirates na Scotland.

Ba uwa mbere mu kumenya amakuru agezweho!!!