Ikipe y’u Rwanda mu bakobwa batarengeje imyaka 19 mu mukino wa Cricket iri mu mwiherero w’iminsi 5 mu rwego rwo kwitegura imikino y’Afurika yo gushaka itike y’igikombe cy’Isi  kigiye kuba ku nshuro ya mbere “ ICC U-19 Women’s T20 World Cup 2023”.

Imikino yo gushaka itike “ ICC U-19 Women’s T20 World Cup Africa Qualifiers” izabera muri Boswana kuva taliki 01 Nzeri 2022 aho mu makipe 9 (Rwanda,  Botswana, Malawi, Mozambique, Namibia, Nigeria, Sierra Leone, Tanzania na Uganda) azishakamo ikipe imwe izabona itike.

Mu rwego rwo gutangira kwitegura, ishyirahamwe ry’umukino wa Cricket mu Rwanda “RCA”  ryateguye umwiherero w’iminsi 5  ku ikipe y’igihugu kuva taliki 14 kugeza 18 Nyakanga 2022.

Uyu mwiherero ukaba  warateguwe mu gihe aba bakinnyi biganjemo abanyeshuri bari mu biruhuko, nyuma  y’uyu mwiherero bazakomeza gukora imyitozo bisanzwe.

Abakinnyi 20 ni bo bitabiriye uyu mwiherero aho nyuma bazatoranywamo 14 bazaserukira igihugu muri iyi mikino yo gushaka itike y’igikombe cy’Isi 2023. Muri aba bakinnyi harimo  Ishimwe  Gisele, Murekatete Belyse na  Ishimwe Henriette basanzwe bahamagarwa mu ikipe y’igihugu nkuru.

Urutonde rw’abakinnyi bari mu mwiherero

Hari Ishimwe Gisele, Uwase Merveille, Murekatete Belyse, Usabyimana Sylvia, Isimbi Henriette, Uwase Jehobanus, Muragijimana Cesarie, Tuyizere Cynthia, Igihozo Divine, Ishimwe Henriette, Uwitonze Aline, Uwera Cynthia, Irera Rosine, Tumukunde Marie Josee,  Mukandayisenga Janet, Zulupati, Nakuzwe Doriane, Teta Leodia, Nzayituriki Nadine na Ishimwe Pascaline.

Imikino y’igikombe cy’Isi  “ICC U-19 Women’s T20 World Cup 2023” izabera muri Afurika y’Epfo  muri Mutarama 2023.

Iyi mikino izitabirwa n’ibihugu 16, ibihugu 14 bikaba byaramaze kubona itike ari byo South Africa izakira irushanwa, Australia, Bangladesh, England, India, Ireland, New Zealand, Pakistan, Sri Lanka, USA, West Indies, Zimbabwe, Indonesia na United Arab Emirates.

Amakipe abiri asiganye ni izitwara neza muri Botswana ndetse n’ikipe  izava hagati y’u Buholandi na Scotland zizahurira mu irushanwa ryo gushaka itike ku mugabane w’u Burayi “ICC U19 Women’s T20 World Cup Europe Qualifier” rizabera mu Buholandi taliki 09 kugeza 11 Kanama 2022.

Ba uwa mbere mu kumenya amakuru agezweho!!!