Kuva taliki 15 Mata 2023  hatangiye irushanwa “Dafabet RCA T20 Men’s Tournament 2023” ryateguwe n’ishyirahamwe ry’umukino wa Cricket mu Rwanda “RCA” ku bufatanye na Dafabet.

Iri rushanwa ririmo kubera kuri Sitade Mpuzamahanga  i Gahanga  rikazasozwa taliki 15 Gicurasi 2023 ryitabiriwe n’amakipe  6 asanzwe akina shampiyona y’icyiciro cya mbere mu bagabo ari yo Challengers CC, Right Guards CC,  Zonic Tigers CC,  Kigali CC, Telugu Royals CC na IPRC Kigali CC. Aya makipe agomba gukina hagati yayo  hanyuma taliki 15 Gicurasi 2023, ikipe ya mbere n’iya kabiri zikazakina umukino wa nyuma wo guhatanira igikombe.

Mu mpera z’icyumweru gishize taliki 22 na 23 Mata 2023 habaye imikino y’umunsi wa 3 n’uwa 4.

Ku wa Gatandatu taliki 22 Mata 2023 habaye imikino ibiri aho ikipe ya IPRC Kigali CC yatsinze Right Guards CC naho ikipe ya Challengers CC itsinda Telugu Royals CC.

Ku Cyumweru taliki 23 Mata 2023 habaye imikino  ibiri  aho ikipe ya IPRC Kigali CC yatsinze Zonic Tigers CC naho ikipe ya  Telugu Royals CC itsinda Kigali CC.

Ubwo iri rushanwa ryatangiraga taliki 15 na 16 Mata 2023  habaye imikino itatu aho taliki 15 Mata 2023, ikipe ya   Right Guards CC yatsinze Telugu Royals CC.

Taliki 16 Mata 2023 habaye imikino ibiri aho ikipe Challengers CC yatsinze IPRC Kigali CC naho Zonic Tigers CC itsinda Kigali CC.

Kuri ubu ikipe ya IPRC Kigali CC iyoboye urutonde n’amanota 4 inganya na Challengers CC. Ku mwanya wa 3 hari Zonic Tiger CC n’amanota 2 inganya na Telugu Royals CC na Right Guards CC naho ku mwanya wa 6 hari Kigali CC aho nta nota na rimwe ifite.

Imikino izakomeza mu mpera z’iki cyumweru taliki 30 Mata na 01 Gicurasi 2023.

Iri rushanwa ryatangiye nyuma yo gusoza “Dafabet RCA T10 Men’s Tournament 2023” ryabaye kuva taliki 18 Werurwe  kugeza 15 Mata 2023. Iri rushanwa naryo ryahuje aya makipe 6, ikipe ya IPRC Kigali CC ni yo yegukanye igikombe itsinze Challengers CC ku mukino wa nyuma.

Ba uwa mbere mu kumenya amakuru agezweho!!!