Rwanda  100-185 Uganda

Taliki 15-12-2022

Rwanda-Uganda (Gahanga-09h30)

Tanzania-Uganda (Gahanga-13h45)

Ku munsi wa kabiri w’irushanwa “Tri-Nation T20 Cup 2022″ ririmo kubera mu Rwanda aho ryahuje ibihugu bitatu ari byo u Rwanda, Uganda na Tanzania habaye umukino umwe  wahuje u Rwanda na Uganda  naho uwa Uganda na Tanzania ntiwarangira kubera imvura.

Mu mukino wahuje ikipe y’u Rwanda na Uganda  wabereye kuri Sitade Mpuzamahanga ya Gahanga, ikipe ya Uganda ni yo yatangiye ikubita agapira ishaka amanota « Batting »  maze mu dupira 120 (20 Overs) ikora amanota 185 mu gihe abakinnyi 9 basohowe mu kibuga (9 Wickets).

Mu gice cya kabiri, ikipe y’u Rwanda  yatangiye gukubita agapira ishaka amanota « Batting », ubwo yari imaze gukora amanota 100 mu dupira 97 (16.1 Overs) abakinnyi bose basohowe mu kibuga (10 Wickets) bituma ikipe ya Uganda yegukana intsinzi ku kinyuranyo cy’amanota 85.

Muri uyu mukino, Joseph Baguma ukinira ikipe ya Uganda ni we witwaye neza aho yatsinze amanota 14 anasohora abakinnyi  4  b’u Rwanda mu kibuga (4 Wickets).

Umukino wa kabiri wagombaga guhuza ikipe ya Uganda na Tanzania nta bwo warangiye kubera imvura. Ikipe ya Tanzania ni yo yari yatangiye ikubita agapira ishaka amanota «Batting», imvura yaguye iyi kipe imaze gukora amanota 48 mu dupira 92 (15,2 Overs) mu gihe abakinnyi 9 bari basohowe mu kibuga (9 Wickets). Buri kipe ikaba yahawe inota rimwe.

Ikipe ya Tanzania ni yo iyoboye urutonde aho ifite amanota 5, Uganda ikagira 3 naho ikipe y’u Rwanda nta nota na rimwe ifite.

Gahunda y’imikino y’umunsi wa gatatu

Kuri uyu wa Kane taliki 15 Ukuboza 2022 imikino y’irushanwa “Tri-Nation T20 Cup 2022″ iraba igeze ku munsi wayo wa gatatu aho  ikipe y’u Rwanda ikina na Uganda i Gahanga (09h30) naho Tanzania ikine na Uganda i Gahanga (13h45).

Iri rushanwa rikaba riri mu rwego rwo gufasha aya makipe kwitegura imikino ya nyuma ku rwego rw’Afurika yo gushaka itike y’igikombe cy’Isi muri 2024 “Africa Regional Finals” izabera muri Namibia mu Kwakira 2023.

Ba uwa mbere mu kumenya amakuru agezweho!!!