Dallaire Institute imaze gutoza 15,000 bari mu Nzego z’umutekano mu Karere
Amakuru

Dallaire Institute imaze gutoza 15,000 bari mu Nzego z’umutekano mu Karere

NTAWITONDA JEAN CLAUDE

August 16, 2023

Dallaire Institute, Umuryango Mpuzamahanga uharanira gukumira abana kwinjizwa mu gisirikare, ugaharanira amahoro n’umutekano, umaze guhugura abari mu Nzego z’umutekano barenga 15,000 baturutse mu bihugu by’Afurika, binyuze muri Santeri  y’Icyitegererezo yashinzwe mu Rwanda. 

Uwo Muryango washinzwe na Gen. (Rtd) Romeo Dallaire wayoboye Ingabo z’Umuryango w’Abibumbye zari mu Butumwa bwo kubungabunga amahoro mu Rwanda (MINUAR/UNAMIR) mu gihe cya Jenoside yakorewe Abatutsi mu 1994. 

Imirimo yawo ishamikiye ku bunararibonye bwa Gen. (Rtd) Dallaire mu myaka yabayemo umusirikare ndetse n’iyo yamazemo mu Rwanda nk’Umugaba w’Ingabo za MINUAR.

By’umwihariko, uyu Muryango ushyira imbaraga nyinshi mu kugera ku ntego y’ibanze yo gukumira ibikorwa byo kwinjiza abana mu gisirikare no kubakoresha mu ntambara mu bihugu bitandukanye ku Isi. 

Ku wa Kabiri, Gen. (Rtd) Dallaire yakiriwe muri Village Urugwiro na Perezida wa Repubulika y’u Rwanda Paul Kagame, baganira ku bimaze kugerwaho n’uwo Muryango. 

Ibiro by’Umukuru w’Igihugu  byatangaje ko Santeri y’Icyitegererezo yashinzwe na Dallaire Institute mu Rwanda, imaze guhugurirwamo abasaga 15,000 bahagarariye Inzego z’umutekano zo mu bihugu byo muri Afurika. 

Byanagaragajwe kandi ko ayo mahugurwa yatanzwe n’abahoze ari abasirikare mu Ngabo z’u Rwanda (RDF) no muri  Polisi y’u Rwanda (RNP bose bari mu kiruhuko cy’izabukuru. 

Mu mwaka wa 2007 ni bwo Gen. (Rtd) Romeo Dallaire yashinze Gahunda yo gufasha abana binjizwa mu gisirikare hamwe na Kaminuza ya Dalhousie yigisha iby’amahoro n’umutekano iherereye i Halifax muri Nava Scotia, hanyuma ayagurira mu Rwanda mu mwaka wa 2010.

Kuva uwo Muryango washingwa, waragutse cyane uhera ku gutanga amahugurwa ugera ku rwego rwo gukora ubushakashatsi no gutanga ubumenyi buyobora ibikorwa by’aboherezwa mu butumwa bwo kubungabunga amahoro ku Isi.

Bivugwa ko umusanzu w’uwo Muryango wazibye icyuho mu miterere n’imyubakire y’ubutumwa bwo kubungabunga amahoro ku Isi. 

Mu 2020 ni bwo iyo gahunda yahindutse Umuryango Mpuzamahanga uharanira gukumira abana mu ntambara no guharanira amahoro n’umutekano (Dallaire Institute), ukaba utanga ubuhanga n’ubumenyi, ukora ubushakashatsi n’ubuvugizi ku hakigaragara abana bashorwa mu bikorwa by’urugomo byifashisha intwaro.

Dallaire Institute yashinzwe ku ntego yihariye y’uko gukumira ihohoterwa rikorerwa abana bisaba gukoresha imbaraga zikubye kabiri. 

Uretse gukumira ko abana bakwinjizwa mu gisirikare no mu mitwe yitwaje intwaro, abamaze kwangizwa n’iryo hohoterwa na bo baba bakwiriye gusigasirwa, hazirikanwa ingaruka bigira ku rwego rw’umutekano muri rusange. 

Binyuze mu guhanga udushya mu bumenyi no kubukwirakwiza, Umuryango Dallaire Institute wubaka ikiraro cy’umutekano n’ibikorwa by’ubutabazi bigamije gukumira no gufasha abana bagizweho ingaruka n’urugomo bakorerwa binjizwa mu ntambara. 

Uwo Muryango kandi utanga inama ziyobora Politiki z’ibihugu, gukora ubukangurambaga mu nzego z’umutekano ndetse no gushishikariza abayobozi kugira ubushake bwa Politiki, kubaka ubunyamwuga mu gucunga umutekano ndetse no gufasha ibigo bicunga umutekano gukorana neza n’abasivili. 

Uyu Muryango ufite abakozi barimo abashakashatsi ku mahoro n’umutekano, abarimu n’impuguke mu bya gisirikare, impuguke mu kwiga ubuzima n’imyitwarire y’abana, ndetse n’impuguke mu kurinda no kubungabunga uburinganire bw’abagore n’abagabo. 

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA