Kuri uyu wa Gatandatu  taliki 09 Nyakanga 2022 ni bwo hasozwa imikino y’irushanwa mpuzamahanga ririmo  kubera mu Rwanda  mu mukino wa Tennis “Davis Cup 2022 by Rakuten Africa Group IV”.

Ikipe y’u Rwanda nyuma yo kwitwara neza mu itsinda A igasoza ari iya mbere  irakina na Togo ku mukino wa nyuma na yo yitwaye neza  ikazamuka iyoboye itsinda B.

Nyuma y’uyu mukino wa nyuma, ikipe itsinda irahita ikatisha itike yo kuzamuka mu cyiciro cya gatatu (Group III).

 Uretse uyu mukino wa nyuma hari n’indi mikino iteganyijwe yo guhatanira imyanya. 

Mu guhatanira umwanya wa 3, ikipe ya Sudan yari mu itsinda B irakina na RDC yari mu itsinda B. Mu guhatanira umwanya wa 5, ikipe ya Tanzania (A)  irakina na Botswana (B) naho mu guhatanira umwanya wa 7, ikipe ya Angola (B) ikine  na Uganda (A). Iyi mikino yose irabera  muri IPRC Kigali kuva saa yine (10h00).

Ikipe ya Cogo Brazzaville yari mu itsinda B  yo iri ku mwanya wa 9.

Uko imikino  ya nyuma mu matsinda yagenze

Imikino ya nyuma  mu matsinda yabaye ku wa Gatanu taliki 08 Nyakanga 2022, mu itsinda A, ikipe y’u Rwanda yitwaye neza itsinda Sudan imikino 3-0.

Umukino wa mbere, Habiyambere Ernest yatsinze Mandour Noor (Sudan) amaseti 2-0 (6-2 na 6-3). Umukino wa kabiri, Karenzi Bertin yatsinze Khalid Derar (Sudan) amaseti 2-0 (6-4 na 7⁸-6⁶)

Mu cyiciro cy’abakina ari babiri, ikipe y’u Rwanda  (Hakizumwami Junior na Muhire Joshua) yatsinze  Sudan (Mohamed Abdalla na Noor Mandour) amaseti 2-1 (3-6, 6-3 na 6-3).

Uyu mukino w’u Rwanda  na Sudan ukaba warebwe na Minisitiri wa Siporo “MINISPORTS”, Munyangaju Aurore Mimosa.

Undi mukino wabaye muri iri tsinda A, ikipe ya Tanzania yatsinze Uganda imikino 2-1.

Ikipe y’u Rwanda yazamutse iyoboye itsinda n’amanota 3 ikurikirwa na Sudan n’amanota 2, Tanzania (1) na Uganda (0).

Mu itsinda B, ikipe ya Togo yatsinze RDC imikino 2-1. Umukino wa mbere, Komlavi Loglo (Togo) yatsinze Christian Saidi (RDC) amaseti 2-0 (7⁷-6³  na 7⁸-6⁶). Umukino wa kabiri, William Bushamuka yatsinze Thomas Setodji (Togo) amaseti 2-1 (6-3, 6⁵-7⁷  na 6-3).

Aya makipe yombi nyuma yo kunganya umukino 1-1, hakinwe umukino w’abakina ari babiri maze ikipe ya Togo (Komlavi Loglo na Thomas Setodji) yitwara neza itsinda RDC (William Bushamuka na Christian Saidi) amaseti 2-0 (6-3 na 6-4).

Undi mukino mu itsinda B wabaye, ikipe ya Botswana yatsinze Congo Brazzaville imikino 2-1.

Nyuma y’imikino y’amajonjora, ikipe ya Togo yasoje iyoboye itsinda n’amanota 4, ikurikirwa na RDC (3), Botswana (2), Angola (1), Congo Brazzaville (0).

Ba uwa mbere mu kumenya amakuru agezweho!!!