Dr. Biruta yahagarariye Perezida Kagame mu Nama ya ECASS
Amakuru

Dr. Biruta yahagarariye Perezida Kagame mu Nama ya ECASS

NTAWITONDA JEAN CLAUDE

July 2, 2023

Ku wa Gatandatu taliki ya 1 Nyakanga 2023, ni bwo Minisitiri w’Ububanyi n’Amahanga n’Ubutwererane Dr. Biruta Vincent yasesekaye i Libreville muri Gabon, mu Nama ya 23 isanzwe y’Abakuru b’Ibihugu na Guverinoma bihuriye mu Muryango w’Ubukungu bw’Ibihugu bya Afurika yo Hagati (ECCAS).

Minisitiri Dr. Biruta yahagarariye Perezida wa Repubulika y’u Rwanda Paul Kagame, mu biganiro byahuje Abakuru b’Ibihugu na Guverinoma bigaga ku iterambere ry’uwo Muryango.

Iyo nama yabayemo ibiganiro byahuje abahagarariye ibihugu bigize ECCAS na Ali Bongo Ondimba, Perezida wa Gabon akaba n’Umuyobozi Mukuru uri ku ntebe wa ECCAS, kuva taliki ya 20 Kamena kugeza kuri uyu wa Gatandatu taliki ya 1 Nyakanga ubwo Abakuru b’Ibihugu bahuraga.

Ibyo biganiro byabaye ku nsanganyamatsiko igira iti: “Gufata mu nshingano igikorwa cyo gutera inkunga Umuryango mu kwihutisha urugendo rwo kwihuza kw’Akarere k’Afurika yo Hagati no gushyigikira ishyirwa mu bikorwa ry’amavugurura y’inzego ziwugize.”

Abakuru b’Ibihugu na Guverinoma bafashe umwanya wo kwakira raporo ku ishyirwa mu bikorwa ry’imyanzuro y’inama ya 21 n’iya 22 z’Abakuru b’Ibihugu na Guverinoma zabanje, by’umwihariko ku ngingo ijyanye no gutera inkunga urugendo rwo kwihuza kw’Afurika yo hagati.

Nanone kandi, Abakuru b’Ibihugu na Guverinoma basuzumye ndetse banemeza amategeko n’amabwiriza agenga Umuryango n’inzego ziwugize, bemeza amasezerano y’inyongera ku yandi ajyanye no gushyiraho Inteko Ishinga Amategeko, Urukiko ndetse rw’Urwego rw’Ubugenzuzi by’uwo Muryango.

Mu bindi basuzumye harimo inyandiko zigena ishyirwa mu bikorwa rya gahunda y’ikoreshwa ry’imari ya ECCAS, mu bijyanye n’igenamigambi ndetse n’amahame y’umwuga agenga icungamutungo.

Abakuru b’Ibihugu na Guverinoma banafashe umwanya wo gusuzuma imiterere ya Politiki n’umutekano mu bihugu bigize Akarere mu gice cya mbere cy’umwaka wa 2023.

Mu bihugu bigize uyu Muryango harimo na Repubulika Iharanira Demokarasi ya Congo (RDC) yahagarariwe na Perezida wa Repubulika Felix Antoine Tshisekedi Tshilombo.

RDC ni igihugu kimaze imyaka myinshi mu bibazo by’umutekano muke n’imiyoborere bivugwa ko idafata mu nshingano ibijyanye no gukemura ibyo bibazo byabaye akarande, aho kuri ubu muri icyo gihugu habarurwa imitwe yitwaje intwaro irenga 130.

Izindi nama zabaye zagiye zihuza impuguke mu by’umutekano n’igisirikare, icungamari n’igenamigambi, ubutabera n’iyubahirizamategeko, abo bayobozi bose bakaba bari abaturutse mu bihugu bigize ECCAS.

Umuryango wa ECCAS, uhuza ibihugu byo muri Afurika yo Hagati ari byo Angola, u Burundi, Cameroun, Santrafurika, Repubulika Iharanira Demokarasi ya Congo (Gabon), Gabon, Guinée Equatoriale, Tchad, Sao Tome na Principe, n’u Rwanda rwigeze kuwikuramo mu 2007 rukawugarukamo mu 2016.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA