Dr. Ngirente yakomoje ku cyakorwa mu kurinda ubukungu bw’Afurika
Amakuru

Dr. Ngirente yakomoje ku cyakorwa mu kurinda ubukungu bw’Afurika

Imvaho Nshya

July 7, 2023

Minisitiri w’Intebe Dr Edouard Ngirente yagaragaje ko hakenewe ishoramari rifasha mu kuzahura ubukungu bwakomwe mu nkokora n’icyorezo cya COVID-19, by’umwihariko ibihugu byo munsi y’ubutayu bwa Sahara bikaba bikeneye ubufasha mu kuzahura ubukungu.

Ibi yabigarutseho atangiza Inama Rusange ya 23 y’Ihuriro Nyafurika ry’Ubwishingizi mu Bucuruzi n’Ishoramari (ATIDI) irimo kubera i Kigali.

Dr. Ngirente yagaragaje ko hakenewe ishoramari rifasha mu kuzahura ubukungu havanwaho inzitizi mu bucuruzi ku mugabane w’Afurika.

Yagize ati: “Ingamba zishyizweho na za Guverinoma ziramutse zitanga urubuga rw’ishoramari rufasha mu bucuruzi, umugabane waba ku isonga mu izamuka ry’ubukungu ku Isi, ndetse hakaba ahantu bifuza gushora imari no gukora ubucuruzi. 

Hari byinshi twakora ku rwego rw’ibihugu mu kurinda inyungu z’ubukungu no kugabanya ibyago bibaho mu bucuruzi.  Icya mbere tugomba gushyiraho urubuga rufasha iterambere ry’urwego rw’abikorera, icya 2 tugomba kuvanaho inzitizi zose mu bihugu byacu, icya 3 tugomba gufungura ubukungu bwacu mu buryo bwose bushoboka no kugabanya inzitizi zishingiye ku ishoramari n’ubucuruzi.” 

Icyorezo cya COVID-19 cyageze muri Afurika mu ntangiriro za 2020, kiza gukurikirwa n’intambara y’u Burusiya muri Ukraine byombi bituma ubukungu bw’uyu mugabane n’u bw’Isi muri rusange buhungabana.

Abateraniye i Kigali muri iyi nama y’iminsi ibiri yiga ku bucuruzi, ishoramari n’iterambere ry’ibigo by’ubwishingizi muri Afurika bararebera hamwe uburyo bwo gushora imari muri izi serivisi kugira ngo zigire uruhare mu kuzahura ubukungu.

Umuyobozi mukuru wa ATIDI Moses Emmanuel, avuga ko hagomba kubaho ubufatanye bw’ibihugu mu gukemura ibibazo by’isoko ry’umusaruro uboneka muri Afurika.

Yavuze ko hakiriho urugamba ku kubona amasoko y’umusaruro w’ubuhunzi. 

Ati: “Urugero u Rwanda rushobora kuba rufite umusaruro mwinshi w’ibintu runaka kandi mu kindi gihugu bituranye kitabifite, ni gute twafasha muri ubwo bucuruzi, ese ni gute twafasha mu bijyanye n’uruhererekane rwo kongerera agaciro uwo musaruro.”

Yakomeje agira ati: “Hari impaka zigeze kubaho mu gihugu kimwe bavana ibirayi ahantu kure kandi muri icyo gihugu hari ibirayi, ikibazo cyari gihari ni ugutunganya umusaruro wabonetse. Ubu rero turagerageza kureba uburyo umuntu yagira umusaruro ukenewe n’umuguzi, aho umuguzi avuga ati: ugomba gutanga icyizere cy’igiciro gihamye natwe tugatanga ubwishingizi.”

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA