Dukwiye kugabanya ibyago tukongera inyungu za AI- Perezida Kagame
Amakuru

Dukwiye kugabanya ibyago tukongera inyungu za AI- Perezida Kagame

Imvaho Nshya

November 8, 2023

Perezida wa Repubulika y’u Rwanda Paul Kagame, yagaragaje uburyo ikintu gishya cyose kigeze mu muryango runaka kizana n’impungenge zihariye, ashingiye ku kuba ikoranabuhanga ry’ubwenge muntu buhangano (AI/artificial intelligence) rikomeje kuzamura impaka ku Isi yose ku kaga rishobora kuzakururira abatuye Isi.

By’umwihariko, Afurika ivugwaho kuba ari umugabane utaratera imbere mu by’ikoranabuhanga ku buryo ukemangwa ku bushobozi bwayo mu kuba yiteguye kuryakira no kuribyaza umusaruro mu buryo bukwiriye.

Perezida Kagame yavuze ko abantu badakwiye kwibanda gusa ku byago iryo koranabuhanga rizazana ahubwo bakabigereranya n’inyungu rizana ku batuye Isi yose, maze hakabaho ubufatanye mu kugabanya ibyago byatekerejwe ari na ko hongerwa amahirwe iryo koranabuhanga rizana na yo.

Yabiugarutseho kuri uyu wa Kabiri tariki ya 8 Ugushyingo, ubwo yifatanyaga na ba rwiyemezamirimo batandukanye bakorera ku cyicaro cy’Ishami rya Norrsken muri Afurika giherereye mu Mujyi wa Kigali, mu gutangiza icyumweru cyahariwe ibikorwa bya Norrsken muri Afurika.

Akaniwabo Vicky, Umuyobozi Mukuru w’Ikigo Hence Technologies cyimakaza ikoranabuhanga ribika amakuru n’iry’ubwenge muntu buhangano (AI), yari abajije Perezida Kagame icyo avuga kuri iryo koranabuhanga rigezweho n’icyo yabwira ba rwiyemezamirimo bakomeje guharanira ko Afurika na yo itazasigara inyuma. 

Yagize ati: “Buri kintu gishya mu muryango kizana n’impungenge runaka. Reka dutangire tureba ikoranabuhanga muri rusange. Ikoranabuhanga rifite inyungu nyinshi cyane, rigeza abantu ku rwego rwisumbuye ku rwo bari bariho, ariko ni igenzi kugenda muri iyo nzira unatekereza ku nyungu mu buryo bwumvikana. Ariko nanone haza ingaruka z’ibyo bikoresho n’imitekerereze bishya ku muryango.”

Yavuze ko impungenge zikwiye kurebwaho by’umwihariko maze zigashyirwa ku munzani umwe n’iryo koranabuhanga rikenewe ngo imibereho y’abatuye Isi irusheho kunozwa.

Ati: “Dukwiye kuba twibaza tuti ese iki kintu gishya gifite inyungu ku rwego rungana iki? Ariko se cyaba gifite ingorane runaka? Ni gute duharanira kuzikumira mu guharanira ko inyungu zirenga ibibazo bishobora kuvuka? Nta buryo ikigo cyangwa igihugu kimwe cyangwa umuntu ku giti cye ashobora kubyikorera wenyine. Hakwiye kuba hariho ubufatanye, gutekerereza hamwe, kubera ko ibiva muri iri koranabuhanga rishya nka AI rigira ingaruka ku Isi yose, ntirigira ingaruka ku kigo cyangwa igihugu kimwe.”

Inyubako ya Norrsken Kigali yatashywe ku mugaragaro

Afurika itunze ibirenze kuba isoko rinini

Niklas Adalberth, Umuyobozi akaba n’uwashinze Norrsken nk’Umuryango Mpuzamahanga uhuriza hamwe ba Rwiyemezamirimo bashinze ibigo bitandukanye, yabajije Perezida Kagame impamvu abashoramari bakwiye kubona Afurika nk’umugabane wuje ishoramari, amusubiza ko uyu mugabane ufite ibyiza byinshi bingana n’iby’ahandi ku Isi ndetse bishobora kuba binaruseho.

Umukuru w’Igihugu yavuze ko abashoramari bakwiye kuzirikana ko Afurika ifite abantu bafite ubwenge n’impano nyinshi nk’iby’abandi bose ku Isi, ziyongeraho n’indi mitungo kamere itabarika 

Ati: “Abashoramari ntibakwiye kureba Afurika nk’Isoko rinini gusa nubwo ari ko bimeze, ahubwo ko hari n’abaturage bakomeje guharanira iterambere bashobora kuzagera ku biri ahandi hose ku Isi cyangwa bakabirenza. Ikindi abashoramari bakwiye kurebaho ni uko ushora imari ufite intego, kandi iyo ntego iba ikwiye kugerwaho. Harimo inyungu n’iterambere uba ushaka kubona, nakwizeza ko ibyo bazabibona.”

Perezida Kagame yanahamije ko gushora imari mu Rwanda ari ukwiteganyiriza kuko ari igihugu cyahisemo guharanira kubaka ikirere cy’ubucuruzi gitekanye cyoroshya kugera ku ntego yaba iy’Abanyarwanda n’abandi bose baza gukorana na bo.

Yaboneyeho kugaragaza ko urwego Abanyafurika bariho ubwarwo rwisobanurira icyo babura nko kuba bakwigirira icyizere no gukora ibyo bakwiye kuba bakora kugira ngo bagere ku rwego indi migabane igezeho ndetse bakanarurenza.

Yanenze Abanyafurika babura gukora ibisabwa bakirukira ku bandi ngo babakemurire ibibazo, ati: “Kwishyira mu murongo wo kwihesha agaciro si ikintu dukwiye kuba dusaba undi uwo ari we wese ngo abidukorere. Ntekereza ko nta muntu n’umwe ugufitiye umwenda. Wowe ubwawe wifitiye umwenda. Abanyafurika bifitiye umwenda wo kwizamura maze tugakorana n’abandi nk’abafatanyabikorwa bari ku rwego rumwe.”

Ba rwiyemezamirimo biganjemo urubyiruko, bishimiye amahirwe bagize yo kuganira na Perezida Kagame bakamubaza ibibazo bitandukanye byakomoje no ku buzima bwe bwite.

NTAWITONDA JEAN CLAUDE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA