Gahunda yo kuhira ku buso buto yegerejwe abahinzi kuri nkunganire
Amakuru

Gahunda yo kuhira ku buso buto yegerejwe abahinzi kuri nkunganire

NTAWITONDA JEAN CLAUDE

June 23, 2023

Mu buhinzi buteye imbere hakoreshwa tekiniki zitandukanye hagamijwe kongera umusaruro mu bwinshi no mu bwiza, muri zo harimo gukoresha imbuto nziza, inyongeramusaruro, kuhira imyaka n’ibindi, ni muri urwo rwego gahunda yo kuhira ku buso buto yegerejwe abahinzi kuri nkunganire ya Leta.  

Kanamugire Egide ushinzwe gahunda yo kuhira ku buso buto yegerejwe abahinzi mu Kigo cy’Igihugu ishinzwe guteza imbere Ubuhinzi (RAB), yavuze ko iyo gahunda irimo gushyirwamo imbaraga.

Yongeyeho ko Intara y’Ibasirazuba n’Amajyepfo ari ho hakunze kwibasirwa n’izuba, hakaba hakoreshwa gahunda yo kuhira.

Yagize ati: “Kuhira imyaka ku buso buto ni gahunda iri gushyirwamo imbaraga, aho umuhinzi yunganirwa kuri 50%. Ubu iyi gahunda yegerejwe abahinzi, aho amafaranga ya nkunganire ari ku turere”.

Yasobanuye ko mu gihe imvura icitse kare hifashishwa amazi yo mu migezi, mu biyaga ndetse abahinzi bashishikarizwa gufata amazi y’imvura.

Ati: “Ahaturuka amazi yo kuhira mu gihe imvura icitse ava mu biyaga, mu migezi n’ibishanga bifite amazi akaba yagomerwa bakuhira n’ibikoresho bitandukanye. [….] Abahinga imusozi tubashishikariza gufata amazi y’imvura bakayabikira impeshyi. Harimo nkunganire ku kubona ibigega, amashitingi Manini afata amazi, uwiteguye ari umuhinzi cyangwa umworozi nta kibazo afite ubu arimo aruhira. 

Ibikoresho byo kuhira ubundi nkunganire ya Leta ibitanga byose, ku borozi hibandwa kuri shitingi zifata amazi y’imvura kimwe n’abahinga imusozi, abegereye ibiyaga n’imigezi bakoresha moteri zitandukanye bitewe n’ubushobozi bwabo, amatiyo n’imipira bitewe n’ubushobozi bwa buri muhinzi n’ubuso bwe”.

Yasobanuye ko ibikoresho bihari, kandi buri karere kahawe ingengo y’imari, bityo ibikoresho bikaba byaregerejwe abahinzi kandi kuri nkunganire.

Ati: “Kubona ibyo bikoresho dufite ba rwiyemezamirimo bafitanye amasezerano na RAB, umuhinzi yishyura 50% by’ibikoresho akeneye, banashishikarizwa gukoresha imirasire y’izuba wirinda guhumanya ikirere ashishikarizwa  gukoresha imirasire y’izuba bakishyura 25% Leta ikabunganira 75%. Umuhinzi barabimwegereza ku Murenge cyangwa ku murima we.

Yakomeje asobanura ibijyanye n’ubutaka buto bwakuhirwa harimo nkunganire. Ati: “Guhera kuri Hegitari 1-10 umuntu yemerewe guhabwa ibikoresho bimufasha kuhira”. Ibikoresho birahari, uko umuhinzi asabye ibikoresho, arabihabwa.

Ni gahunda yagenewe abahinzi bato, ni ugukoresha ikoranabuhanga ku buso buto, ni ukuvuga ubuso buva kuri 1/2 cya Hegitari kugeza kuri Hegitari 10. Izo ni zo nkunganire igarukiraho.

Bashobora no kuba ari koperative ari mu matsinda ubuso bukaba bwakwiyongera. Umuhinzi uje ku gite ke ntarenza Hegiari 10”.

Yavuze kandi ko mu Ntara y’Iburasirazuba n’Iy’Amajyepfo hari ikibazo cy’ibigori bitarera, MINAGRI yabitekerejeho yagiye iha buri Karere ingengo y’imari yafasha Uturere kugura ibikoresho byo gutabara aho rukomeye. 

Umuhinzi utarabonye uburyo bwo kwigurira igikoresho, Akarere gakora muri bya bikoresho kakamutiza ku buntu, kandi nibura Hegitari 1500 bamaze kuhirirwa ku buntu kuko ni uburyo bwo gutabara.

Umuhinzi ushaka kugura ibikoresho ku giti cye arasaba kuko ingengo y’imari ya nkunganire iba yajyanywe mu Turere, haba hari abakozi  bashinzwe ubuhinzi mu Karere no mu Murenge, ubikeneye yuzuza ifishi isaba, akishyura uruhare rwe agatwara ibikoresho.

Bitewe n’ibikoresho ashaka n’imiterere y’umurima nibura ushaka gukoresha imirasire y’izuba haherwa kuri Hegitari 5 kuzamura yunganirwa 75% umuhinzi akishyura 25%, umuhinzi muto iyo yegereye amazi, bishobora guhinduka bitewe n’imiterere y’ubutaka akaba ashobora kuhira kuri m 100 ku 100 bigatwara amafaranga y’u Rwanda 215 000 Abahinzi bashishikarizwa kwishyira hamwe bagashobora gusangira n’umuturanyi bagasimburana kuhira umwe agatanga ½ cy’ariya mafaranga.

Kubona ibikoresho uwatinze gusubizwa ibikoresho abibona nyuma y’iminsi 7 naho ubundi iyo umuhinzi afite uruhare rwe ni iminsi 3. Umuhinzi yandika abisaba umukozi ushinzwe ubuhinzi ku Karere, hari amafishi yuzuza akabihabwa na urabihabwa biba biboneka kuri ba rwiyemezamirimo. 

Begera umukozi ushinzwe ubuhinzi ku Karere haba ari kure akabishakira ku Murenge no ku Kagari. Iyo azwi mu Kagari kagatanga ubuhamya ko ari umuhinzi, ubusabe yasinyishije ku Murenge byagera ku Karere agahuzwa na wa rwiyemezamirimo, agahabwa ikijyanye n’igikoresho babona gikenewe bitewe n’imiterere y’ubutaka bwe.

Serivisi yo kubyubaka, muri rwa ruhare rw’umuhinzi biba birimo, no kumushyira ibikoresho biba birimo, n’iyo igikoresho kigize ikibazo, rwiyemezamirimo wabitanze arabisimbura mu gihe cy’umwaka.

Abahinzi bakangurirwa kubahiriza gahunda y’igihembwe cy’ihinga no kwitabira gahunda ya nkunganire, no kuba aho bishoboka bakwishyira  hamwe kuko biborohereza kwishyura.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA