Gare ya Gicumbi imaze imyaka 10 yubatswe yuzuye ibinogo
Aamakuru Agezweho

Gare ya Gicumbi imaze imyaka 10 yubatswe yuzuye ibinogo

Imvaho Nshya

October 20, 2023

Abagana kimwe n’abatwara ibinyabiziga baca muri Gare ya Gicumbi, bavuga ko babangamiwe n’ibinogo kimwe n’ibizenga by’amazi biyirimo kubera uburyo yangiritse nyuma y’imyaka igera ku 10 gusa yubatswe.

Iyo ugeze muri Gare ya Gicumbi usanganirwa n’ibyobo biba byuzuyemo ibizenga by’amazi n’ibyondo mu gihe cy’imvura, na ho mu gihe hari izuba ugasanga bya byondo bihindutse ivumbi ritumuka  cyane.

Bizimana Aloys yavuze uburyo iyo Gare imeze nk’iyasondetswe bayubaka kuko imyaka irindwi ari mikeya ngo igikorwa remezo nk’icyo bubakiwe kibe cyasenyutse.

Mu kiganiro yagiranye n’Imvaho Nshya, Bizimana yagize ati: “Nkatwe mu gihe cy’imvura usanga inkweto zacu zuzuye ibyondo, ku zuba na bwo imodoka yahaguruka ivumbi rigatumuka, kuko iyo witegereje neza usanga no mu kuyikora barayisondetse. Ibi bintu bimaze igihe kuko mu gihe cy’imyaka 10 imaze kwangirika, turasaba ko twahabwa gare nziza ifite isuku”.

Umwe mu bashoferi b’imodoka zitwara abagenzi muri Gare ya Gicumbi berekeza Kigali, yagize ati: “Mu bihe by’imvura muri iyi gare yacu bigusaba kwitwaza agapfukamunwa, kuba iyi gare irimo ibinogo kandi mbona byadukururira impanuka mu gihe tugenda tubikatira, hari n’ubwo umugenzi umutera ibyondo utabishakaga bityo rero nk’uko Umujyi wa Gicumbi ugenda wiyubaka mu iterambere ni ngombwa ko tugira na gare ijyanye n’igihe”.

Abagenda n’amaguru muri iyi Gare na bo bavuga ko kuba itubakiye neza bituma badasirimuka, cyane ko mu bihe by’imvura bayita “Nangumurimbo”

Habanabakize Jean Baptiste yagize ati: “Iyi gare iyo uyigezemo mu bihe by’imvura bayita Nangumurimbo, kuko iyo atari mu bihe by’imvura ngo urye ivumbi ugenda usayagurika mu byondo nawe urabona ko ari itaka ry’inombe mbwira ba bakobwa bacu bajya bambara inkweto zimwe z’imisumari cyangwa se umugabo wiyambariye ingozi ye ntibarigita muri iki gitaka? Twifuza ko gare hakomeza kuba ahantu abasirimu bategera imodoka baba bambaye neza bakagera iyo bajya bameze neza mu murimbo nk’uko baba babiteguye, akarere kadufashe”.

Umuyobozi w’agateganyo w’Akarere ka Gicumbi Uwera Parfaite, na we ashimangira ko iriya Gare bigaragara ko ishaje ariko bagiye kubiganiraho na RFTC kugira ngo barebe yavugururwa.

Yagize ati: “Nk’uko turimo kubaka kaburimbo mu mihanda yo mu nkengero z’Umujyi wa Gicumbi n’ahandi ni na ko gare na yo igomba kuba imeze neza, ubu rero gare burya iba mu nshingano za RTFC, tugiye kubiganiraho turebe uburyo yavugururwa kandi ikarangwamo isuku cyane ko ari ahantu hahurirwamo n’abantu benshi”.

Gare ya Gicumbi ihurirwamo n’imodoka zitwara abagenzi ziva zikajya Kigali, iziva zikajya i Musanze n’izerekeza Nyagatare ziturutse i Musanze.

Gare ya Gicumbi kaburimbo igenda ishiramo

NGABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA