Gatsibo: Abasimbuje inzuri kororera mu biraro batangiye kubona inyungu
Amakuru

Gatsibo: Abasimbuje inzuri kororera mu biraro batangiye kubona inyungu

Imvaho Nshya

October 3, 2023

Bamwe mu borozi bo mu Karere ka Gatsibo bavuga ko kuva batangira gushishikarizwa kororera mu biraro byatangiye gutanga inyungu iruta iyo kuzerereza amatungo kubera ko umukamo wiyongereye ndetse bakaba bafata ifumbire bifashisha mu buhinzi.

Ni nyuma y’aho Leta y’u Rwanda isabiye aborozi bo mu Ntara y’Iburasirazuba gukora ubuhinzi nibura kuri 70% by’ubuso bw’inzuri zabo, mu rwego rwo kongera umusaruro w’ibiribwa byabo n’iby’amatungo, bikanagira impinduka bizana ku musaruro uva kuri ayo matungo.

Iyo gahunda inajyanye kandi no gushishikariza abo borozi gukoresha ubutaka buto bororera mu biraro, kugira ngo babone ubutaka buhagije bwo gukoreraho ubuhinzi butanga ibiribwa by’abantu n’amatungo yabo.

Mu Murenge wa Rwimbogo mu Karere ka Gatsibo ni hamwe mu hakorerwa ubworozi bw’amatungo y’aba amagufi n’amaremare, amenshi muri yo akaba abona ibyo arya aragiwe mu nzuri.

Bamwe mu borozi batangiye kororera mu biraro bavuze ko ubworozi bakora babubonamo inyungu itandukanye niboneka iyo amatungo azererezwa.

Abatangiye kororera mu biraro bavuga ko umusaruro w’amata wikubye kane

Munyaburanga Emmanuel amaze imyaka igera kuri itatu atangiye ubworozi bwo mu biraro arasobanura impinduka zabayeho ugereranyije na mbere akizizerereza.

Yagize ati: “Twagiraga inka zigasonza mu zuba, inka zikagandara zigapfa. Noneho batangiye ubukangurambaga bwo kororera mu biraro no gukoresha ibisigazwa biva mu buhinzi inka zishobora kubirya kandi zikabaho, tubitangira gutyo rero. Njye natangiye buhoro buhoro, nsanga kugira ngo zimererwe neza ari uko nkwiye kuba mfite ikiraro no kuzishyiriraho aho kurira zikarya neza nkabona n’ifumbire. Mu zuba nta mata twabaga dufite yo kugemura ku makusanyirizo cyangwa guha abo mu rugo ariko uyu munsi turagemura kandi no mu rugo bakayabona.”

Ibi kandi bishimangirwa na bamwe mu bacuruza amata bavuze ko batakibura amata mu gihe cy’izuba nkuko byahoze mu myaka ishize.

Karangwa James ufite ikusanyirizo ry’amata rya Rwimbogo yagize ati: “Byaragaragaye ko igihe cy’impeshyi aka gace twahuraga n’ibibazo byo kubura ubwatsi bw’amatungo buhagije aho tugera inka zikagandara ariko ubu nk’abacuruzi dufite ingero aho mu mwaka ushize mu kwezi kwa Kanama twakiraga litiro 500 ariko ubu muri uyu mwaka imvura idusanze twakira litiro 2 000; aho aborozi batangiye kugabura ibisigazwa by’imyaka kandi bamaze kubimenyera. Urabona ko ari igisubizo kirambye.”

Umunyamabanga wa Leta muri Minisiteri y’Ubutabera, Amb Nyirahabimana Solina akaba n’imboni y’Akarere ka Gatsibo muri Guverinoma, asaba aborozi kubaha amabwiriza yatanzwe na Minisiteri y’Ubuhinzi n’Ubworozi yo guhinga 70% y’inzuri zororerwaho.

Yagize ati: “Umworozi abasha kugira umusaruro mwiza n’umukamo uhagije iyo inka zororewe mu biraro. Barazigaburira no mu gihe cy’impeshyi kuko ntibagira ibibazo bikomeye kuko barazigaburira ibyavuye mu buhinzi kandi ntabwo zongera gutakaza imbaraga zijya kwishakishiriza mu misozi kandi zikabasha no kuba ziri hamwe n’ifumbire zikabasha kwegeranywa kubera ko amase aba ari ahantu hamwe nayo akongera agashyirwa mu bwatsi bahinga abufumbira kugira ngo na bwo bwunganire ibyo zibasha kurya. Abakizifite zirirwa zitembera mu misozi zifite umukamo muke ugereranyije n’abororera mu biraro.”

Aborozi bo mu Ntara y’Iburasirazuba bemerewe guhinga 70% by’inzuri zabo, banasabwa kororera mu biraro kugira ngo haboneke umukamo mwinshi ujyanye n’igihe.

NSHIMIYIMANA FAUSTIN

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA