Green Party yasabye ko hajyaho ikigo cyihariye gihangana  n’ibiza mu Rwanda
Amakuru

Green Party yasabye ko hajyaho ikigo cyihariye gihangana  n’ibiza mu Rwanda

Imvaho Nshya

July 11, 2023

Ishyaka riharanira kubungabunga Ibidukikije na Demokarasi mu Rwanda “Democratic Green Party of Rwanda”ryatangaje ko rikomeje ubuvugizi ngo hashirweho ikigo kihariye  gishinzwe guhangana no gukumura ibiza mu Rwanda.

Dr Habineza Frank Perezida w’iri shyaka yabigarutseho ubwo yari mu Ktara y’Iburengerazuba mu karere ka Karongi muri Kongere y’urubyiruko rubarizwa muri iri shyaka.

Yagarutse ku mushinga aherutse gutangiza akawugeza kuri Minisitiri w’Intebe waba igisubizo kirambye kijyanye no guhangana n’ibiza bikunze kwibasira ibice bitandukanye by’igihugu cyane mu gice cy’Amajyaruguru n’Uburengerazuba bw’Igihugu.

Muri iyi kongere yatorewemo n’inzego z’urubyiruko muri iyi ntara aho ziyemeje kwita ku bidukikije bashingiye ku mwihariko uri muri iyi ntara.

Dr Habineza Frank yagize ati:”Turashaka ko hajyaho ikigo cy’igihugu cyo kurinda ibiza.

Hari ikigo gifasha (Emergency Command Center) kiba muri Polisi ariko turasaba ko hajyaho ikigo gifasha kurinda, gukumura no gufasha abaturage kubona amakuru ajyanye n’ibiza tugahora twiteguye”.

Akomeza agira ati: “Nkuko hariho REMA y’ibidukikije turasaba ko hajyaho ikigo cya Minisiteri cyihariye, ejobundi iki gitekerezo nagishikirije Minisitiri w’Intebe nubwo bitaranozwa neza ariko turi kubiharanira kugira ngo ibiza bigire umwihariko, iki kigo kiramutse kigiyeho byatuma hajyaho abakozi bakora ku biza gusa batabivanga n’izindi nshingano kuko nk’ubushize twaratunguwe bitewe n’imigezi ya Sebeya yahinduriwe inzira n’ibindi bitandukanye byahombeje igihugu cyane. “

Yavuze ko mu gihe iki kigo kitarajyaho hari byinshi bagiye gushyiramo  imbaraga aho abarwanashyaka ba Democratic Green Party of Rwanda aho batuye bagiye gufatanya n’abandi baturage kurinda inkengero z’imigezi.

Gutera ibiti bivangwa n’imyaka no kwita ku materasi yaba ayikora cyangwa ay’inganire kugira ngo bagabanye umuvuduko w’amazi.

Uwizeye Clarisse ukomoka mu Karere ka Rusizi akaba umurwanashyaka wa Green Party avuga ko bagiye gukora ibishoboka byose ngo bakumire ibiza cyane muri iyi Ntara ikunze kwibasirwa n’ibiza.

Agira ati: “Ubushize mu Ntara yacu twahuye n’ibiza tugiye kwita ku misozi, dutera ibiti ku nkengero z’imigezi tugiye kuzibungabunga nkuko bikiwiye ku buryo ibiza bitazongera kuduhombya nkuko byagenze ubushize.”

Ubuyobozi bw’Ishyaka riharanira kubungabunga ibidukikije na Demokarasi mu Rwanda buvuga ko buri gusoza gahunda yo gutora inzego z’urubyiruko mu gihugu hose mu rwego rwo kuzuza inzego zikora  no kugira intego bihaye zirushaho kugerwaho mu buryo bwihuse.

Kugeza ubu bamaze gutora urubyiruko mu Ntara zose z’igihugu banitegura amatora y’Umukuru w’Igihugu azaba umwaka utaha wa 2024.

TANGA IGITECYEREZO

  • Twagirumukiza Christine
    July 12, 2023 at 9:03 am Musubize

    Nibyo rwose iki Kigo kirakwiye kuko kwirinda biruta kwivuza.Ibi biza byabaye mu Ntara y’Iburengerazuba byakadusigiye isomo rwose

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA