Gucana amatara ni itegeko- CP Kabera aburira abashoferi
Amakuru

Gucana amatara ni itegeko- CP Kabera aburira abashoferi

NTAWITONDA JEAN CLAUDE

August 10, 2023

Umuvugizi wa Polisi y’u Rwanda CP John Bosco Kabera, yihanangirije abayobozi b’ibinyabiziga bifite moteri byashyizweho amatara abimurikira, abibutsa ko atari ay’umurimbo ahubwo agira uruhare rukomeye mu gukumira impanuka zo mu muhanda. 

Yabineyeho kubibutsa ko ntawukwiriye kwitwaza ko umuhanda umurikiwe n’amatara yo ku muhanda ngo bimubuze gucana ay’imodoka, kuko kuyacana guhera ahagana saa kumi n’ebyiri z’umugoroba ari itegeko.

Yabigarutseho ku wa Gatatu tariki ya 9 Kanama, ubwo Polisi y’u Rwanda yakomerezaga ubukangurambaga bwa ‘Gerayo Amahoro’ hirya no hino mu gihugu, abatwara ibinyabiziga bibutswa gucana amatara mu rwego rwo kurushaho kunoza umutekano wo mu muhanda.

Ni ubukangurambaga bwabereye mu bigo abagenzi bategeramo imodoka mu gihugu hose, ahaparika imodoka ntoya zitwara abagenzi na moto, hatangwa ubutumwa bujyanye n’imikoreshereze y’amatara ku binyabiziga. 

Mu butumwa yagejeje ku batwara ibinyabiziga n’abagenzi mu kigo bategeramo imodoka cya Nyabugogo, CP Kabera yavuze ko amatara yashyizwe ku binyabiziga agomba gukoreshwa uko biteganywa n’amategeko.

CP Kabera yaganirije abashoferi n’abagenzi bateze bisi

Yagize ati: “Gucana amatara ku binyabiziga ni itegeko, abantu bakwiye kubyumva, bakabyubahiriza kandi bakabigira umuco. Tuributsa abatwara ibinyabiziga ko bagomba kuyacana uko byagenwe cyane cyane iyo bwije.”

Yakomeje agira ati: “Byagiye bigaragara ko hari bantu bakuraho amatara cyangwa bakagenda batayacanye. Amatara rero igihe cyose bwije agomba guhora yaka, ntawe ugomba kwitwaza ngo hari urumuri ruhagije ku mihanda kuko bishobora guteza impanuka cyangwa ibindi byaha, ni yo mpamvu ikinyabiziga cyakozwe kigahabwa amatara.”

Yavuze ko Moto na velomoteri zigomba kuba zicanye amatara igihe cyose zigenda mu muhanda, amatara y’imbere mu modoka zitwara abagenzi rusange nayo akaka igihe cyose bwije.

Ati: “Mu bihe bitandukanye byagiye bigaragara ko hari imyitwarire ya bamwe mu bagenzi ibangamira umutekano w’abo basangiye urugendo nko gukorakora ku bandi batigeze bagirana ikiganiro n’abitwikira umwijima bagatega bisi bagenzwa no kureba urangaye ngo bamwibe. Imodoka zitwara abagenzi mu buryo bwa rusange zigomba gucana amatara y’imbere kuva saa Kumi n’ebyiri z’umugoroba, Moto na Velomoteri nazo zigacana amatara buri gihe ku manywa na nijoro.” 

Yagaragaje ko Moto na velomoteri ari ibinyabiziga bito, bityo ko gucana amatara ari byo bituma zibasha kugaragara igihe ziri kure.

CP Kabera aganiriza abamotari

Ingingo ya 43 y’iteka rya Perezida N° 85/01 ryo ku wa 02/09/2002 rishyiraho amabwiriza rusange agenga imihanda n’uburyo bwo kuyigendamo mu gika cyayo cya mbere, havuga ko; amatara magufi n’amatara maremare agomba gucanirwa rimwe n’amatara ndanga iyo hagati yo kurenga no kurasa kw’izuba cyangwa bitewe n’uko ibihe byifashe, nk’igihe cy’igihu cyangwa cy’imvura nyinshi, bidashobotse kubona neza muri metero zigeze ku 100.

Mu gika cyayo cya 4 havuga ko amatara magufi y’amapikipiki na velomoteri bigenda mu nzira nyabagendwa agomba gukoreshwa igihe cyose no mu buryo bwose.

Amabwiriza y’urwego Ngenzura mikorere RURA N° 010/R/TLTPT/TRANS/RURA/2021 yo ku wa 14/12/2021 agenga serivisi zo gutwara abantu mu buryo bwa rusange hakoreshejwe bisi, asaba imodoka zitwara abagenzi mu buryo bwa rusange gucana amatara y’imbere mu binyabiziga kuva ku isaha ya saa kumi n’ebyiri (6h:00) z’umugoroba. 

CP Kabera yashishikarije abafite ibinyabiziga bitwara abagenzi mu buryo bwa rusange, gufata iya mbere bakabimenyesha abashoferi bakumva ko ari inshingano zabo gucana amatara y’imbere mu modoka no gusobanurira abagenzi akamaro kayo.

Yasabye abagenzi ko bakwiye kumva ko aya mabwiriza yashyizweho hagamijwe kurushaho kubungabunga umutekano wabo bityo ko bafite inshingano zo gutanga amakuru ku bashoferi batayubahiriza kugira ngo bahanwe.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA