Hagiye kurebwa aho u Rwanda rugeze runoza uruhererekane rw’ibiribwa
Amakuru

Hagiye kurebwa aho u Rwanda rugeze runoza uruhererekane rw’ibiribwa

NTAWITONDA JEAN CLAUDE

July 9, 2023

Guhera kuri uyu wa Kabiri taliki ya 11 Nyakanga 2023, i Kigali harabera ibiganiro nyunguranabitekerezo by’iminsi ibiri bigamije gusesengura intambwe u Rwanda rumaze gutera mu kuvugurura uruhererekane rw’ibiribwa.

Ni inama ihuza abahagarariye inzego zitandukanye muri Guverinoma y’u Rwanda n’abafatanyabikorwa bayo mu rugendo rwo kubaka ubuhinzi bugezweho no kurushaho kunoza uruhererekane rw’ibiribwa.

Insanganyamatsiko yibanda ku kwihutisha no gushyigikira gahunda z’ingenzi zishingiye ku bafatanyabikorwa ndetse no kwimakaza ubufatanye mu ishyirwa mu bikorwa ryazo. 

Ibyo biganiro bizakorwa mu byiciro bitandukanye hakazabamo ibya rusange n’ibizahuza abantu babiri babiri, ndetse n’ibizakorwa mu matsinda. 

Biteganyijwe ko ibyo biganiro bizahuza abasaga 120 bahagarariye Guverinoma, abafatanyabikorwa bo mu Gihugu imbere, abo mu Karere ndetse n’abo ku rwego mpuzamahanga. 

Mu bazitabira harimo abahagarariye inzego za Leta baturutse muri Minisiteri n’ibigo binyuranye, imiryango yita ku biribwa n’ubuhinzi, urwego rw’abikorera, Sosiyete Sivile, Inzego z’urubyiruko n’abayobozi babo, Abashakashatsi, abarimu ba kaminuza n’impuguke zitandukanye, abafatanyabikorwa mu iterambere n’abahagarariye amashami ya Loni. 

Kwimakaza uruhererekane rw’ibiribwa rurambye no guharanira impinduka mu buhinzi ni yo ntego nyamukuru ya Guverinoma y’u Rwanda mu rwego rwo guhangana n’inzara, amapfa n’ibura ry’ibiribwa ku baturage barushaho kwiyongera.

Minisiteri y’Ubuhinzi n’Ubworozi (MINAGRI) itangaza ko hakomeje gushyirwa imbaraga nyinshi mu kwihutisha ishoramari mu ruhererekane rw’ubuhinzi n’urw’ibiribwa, imishinga na Politiki bizageza abaturarwanda ku iterambere rirambye n’Isi yose ikabasha kwihaza nk’uko biteganywa mu masezerano y’i Malabo, mu Ntego z’Iterambere Rirambye (SDGs) ndetse no mu Cyerekezo 2063 cy’Afurika. 

Iyo Minisiteri ishimangira ko kubera ubuyobozi bwiza burangajwe imbere na Perezida wa Repubulika Paul Kagame, Guverinoma y’u Rwanda yiyemeje bidasubirwaho gutanga umusanzu mu kubaka uruhererekane rw’ibiribwa rutajegajega haba mu gihugu, ku mugabane w’Afurika ndetse no ku Isi yose. 

Muri urwo rugendo, Guverinoma y’u Rwanda n’izindi nzego bifatanya gutegura ibindi biganiro mpuzamahanga birimo Inama y’Ihuriro Nyafurika ku Iterambere ry’Ubuhinzi (AGRF) iba buri mwaka guhera mu 2012 n’Inama y’Umuryango w’Abibumbye yiga ku Ruhererekane rw’Ibiribwa.

U Rwanda rukomeje kwihutisha gahunda z’iterambere ry’uruhererekane rw’ibiribwa nk’uko bikubiye mu cyiciro cya kane cya Gahunda y’Iterambere ry’ubuhinzi n’ubworozi (PSTA4), kandi rwiyemeje gukomeza gukorana n’abafatanyabikorwa mu kwesa umuhigo. 

Bimwe mu biraje Ishinga Guverinoma y’u Rwanda ni uguharanira umutekano urambye w’ibiribwa no kunoza imirire, bikajyana no kubaka uruhererekane rw’ibiribwa ruhamye, rwuje intungamubiri, ruramba kandi rubasha kwihanganira ibiza bishobora kwibasira Isi mu bihe biri imbere.

Mu kubaka urwo ruhererekane rw’ibiribwa hazamo no guhanga imirimo ndetse no guharanira iterambere rirambye. Izo mpinduka zose zisaba kubyaza umusaruro urwego rw’abikorera, kongera ishoramari mu ikoranabuhanga rigezweho mu buhinzi no kongerera agaciro umusaruro.

Nanone kandi bisaba kongerera imbaraga imiryango y’ubuhunzi ndetse no kongera ishoramari mu kongerera agaciro umusaruro no mu masoko . 

Intego nyamukuru z’inama 

Uretse kureba ku ntambwe u Rwanda rumaze gutera mu kubaka uruhererekane rurambye rw’ibiribwa, abayobozi n’impuguke bazitabira bazanatekereza ku gutegura gahunda ihamye igenga urwo rugendo ndetse n’irebana n’ishoramari bakazatanga n’ibitekerezo ku itegurwa rya PSTA5. 

Hazanarebwa ku buryo bwo kongerera imbaraga amahirwe aboneka mu nzego z’ingenzi zigamije iterambere ry’ubuhinzi n’ubworozi, hanongerwa ubufatanye mu kugera ku ntego ihuriweho.

Iyo nama ibaye mu gihe habura ibyumweru bike ngo habe Inama y’Umuryango w’Abibumbye yiga ku ruhererekane rw’ibiribwa yitezwe kubera i Roma muri uku kwezi, hakaba habura n’amezi abiri ngo haterane inama ya AGRF 2023.

By’umwihariko AGRF ya 2023 izafasha mu kurushaho gukangurira abafatanyabikorwa kugira uruhare mu bikorwa by’ingenzi byo kubaka urubuga rw’iterambere ry’uruhererekane rw’ibiribwa ku mugabane bafatanyije n’u Rwanda. 

Inama yo ku wa Kabiri initezweho kuzafasha mu kwihutisha imishinga imwe n’imwe ihagarariye iyindi, u Rwanda rushobora no kuzagaragaza mu Nama yiga kuri SDG, Inama yiga ku ngamba zo guhangana n’Imihindagurikire y’ibihe, n’Inama ya 28 y’Umuryango w’Abibumbye yiga ku Mihindagurikire y’Ibihe (COP28).

Izo nama zose zizaba zibanda ku gusesengura isano iri hagati y’uruhererekane rw’ibiribwa, imihindagurikire y’ibihe no kubungabunga ibidukikije.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA