League A

ES Kigoma 27-22 S^t Martin Hanika         

Munyove HC 17-51 Police HBC

UR Huye 34-29 ES Kigoma  

Police HBC 70-23 S^t Martin Hanika 

League B

ADEGI 22-34 HBC Gicumbi HBT 

APR HBC 28-26 Nyakabanda 

Ikipe ya Police HBC ifite igikombe cya shampiyona iheruka muri 2019, Gicumbi HBT ndetse na APR HBC  zatangiye neza shampiyona  zitsinda. Izi kipe akaba ari zo zihabwa amahirwe yo kwegukana shampiyona y’uyu mwaka wa 2022.

Mu mpere z’icyumweru gishize taliki 23 na 24 Mata 2022 ni bwo hakinwe imikino y’umunsi wa mbere wa shampiyona y’icyiciro cya mbere mu bagabo mu mukino wa Handball “Handball Men’s National League 2022”.

Iyi shampiyona izakinwa mu buryo bushya aho amakipe 10 yagabanyijwe mu bice bibiri “League A & B”. Ikipe Police HBC, ES Kigoma, UR-HUYE, Munyove HC na College S^t Martin Hanika y’i Nyamasheke ziri muri League A naho APR HC, ADEGI, Gicumbi HBT, UR-Rukara na Nyakabanda HC ziri muri League B.

Muri League A, imikino yabereye ku kibuga cya Kimisagara aho ikipe ya Police HBC yitwaye neza itsinda imikino ibiri. Yatsinze Munyove HC ibitego 51 kuri 17 inatsinda College S^t Martin Hanika ibitego 70 kuri 23.

Mu yindi mikino yabaye, ikipe ya ES Kigoma yatsinze College S^t Martin Hanika   ibitego 27 kuri 22 nyuma ikipe ya UR Huye itsinda ES Kigoma amanota 34 kuri 29  nyuma. 

Muri League B habaye imikino ibiri aho i Gituza, Gicumbi HBT yatsinze ADEGI ibitego 34 kuri 22 naho ikipe ya APR HBC itsinda Nyakabanda HBC  ibitego 28 kuri 26.

Shampiyona y’umukino wa Handball yaherukaga gukinwa muri 2019 naho mu 2020 na 2021 ikaba itarakinwe kubera COVID-19. 

Umunyamabanga Mukuru w’ishyirahamwe ry’umukino wa Handball mu Rwanda “FERWAHAND”, Tuyisenge Pascal nyuma y’imikino y’umunsi wa mbere yatangaje ko bitanga icyizere kuko imikino muri rusange yagenze neza, yatangiriye ku gihe  ikanarangira no mu gihe cyateganyijwe.

Akomeza avuga ko n’ubwo shampiyona yari imaze imyaka ibiri itaba, imikinire itagiye hasi cyane. Ati: “Twabonye imikinire iri ku rwego rwiza turizera ko mu minsi iri mbere bizaba  byiza kurushaho.”

Tuyisenge avuga ko ku bijyanye n’abasifuzi hari impinduka nziza ndetse ko barimo gutegura amahugurwa yo kuzamura urwego rw’abatoza kuko abakinnyi bakeneye abatoza bari ku rwego rwiza.

Asaba amakipe kurushaho gukomeza kwitoza no kwitegura neza bakagerageza gushyira imbaraga  mu bijyanye n’imiyoborere myiza.

Imikino ya shampiyona y’umunsi wa kabiri biteganyijwe ko izaba taliki 01 Gicurasi 2022.

Ba uwa mbere mu kumenya amakuru agezweho!!!