Hatangijwe ishami rishya rya “The Champions Karate Academy” i Nyandungu

Hatangijwe ishami rishya rya “The Champions Karate Academy” i Nyandungu

NTAWITONDA JEAN CLAUDE

March 22, 2022

Kuva muri 2017, Nkuranyabahizi Noel usanzwe ari umutoza mukuru   w’ikipe y’igihugu ya Karate yatangije ishuri ryigisha umukino wa Karate “The Champions Karate Academy” aho mu  biruhuko bahurizaga hamwe  abana bafite hagati y’imyaka 4 na 17  bakigishwa uyu mukino.

Iri shuri ryatangiriye ahahoze ari Sports View Hotel i Remera. Mu mpera z’icyumweru gishize taliki 20 Werurwe 2022, hatangijwe ishami rishya muri Club House La Palisse i Nyandungu.

Nkuranyabahizi Noel atangaza ko igitekerezo cyo gushinga irindi shami bakigize kuko bashakaga kwagura ibikorwa kandi ko hari n’ababyeyi babazaga niba batabegereza iyi gahunda ya siporo ku bana.

Akomeza avuga ko ubusanzwe bafite ishami i Nyanza ndetse n’i Bugesera mu Murenge wa Ntarama muri “Gasore Serge Foundation”, kuba rero bafunguye irindi ni ukugira ngo borohereze ababyeyi baturiye hariya kugira ngo abana bajye babona aho bakorera siporo.

Nkuranyabahizi Noel watangije “The Champions Karate Academy”

Agaruka ku munsi wa mbere, Nkuranyabahizi yavuze ko hitabiriye abana basanzwe  muri “The Champions Karate Academy” ariko hari n’abandi bashya baje kuko babonye bagenzi babo bakina. Ati : “ Ababyeyi bishimye kandi natwe  twishimye.”

Nkuranyabahizi  avuga ko  bahisemo aha hantu kuko ari heza kandi banaganiriye n’umuyobozi  waho   unafite abana barererwa muri  “The Champions Karate Academy” akababwira ko  bari bafite gahunda yo kuhakorera ibikorwa byagutse bya siporo. Ati : Aha hari ibibuga n’ibindi bikenerwa byose ngo abana bidagadure.”

Uretse Karate, abana bakina indi mikino itandukanye irimo Badminton, Sports Chanbara, imikino ngororamubiri, kubyina bya Kinyarwanda ndetse hakaba hari na gahunda yo kongeramo indi mikino nk’umupira w’amaguru n’iyindi. Nkuranyabahizi ashimangira ko bafite abatoza  bafite ubuhanga mu gufasha abana.

Abana biga gukina umukino wa Badminton

Nkuranyabahizi avuga ko siporo ku bana igira akamaro kanini kuko ituma bagira umubiri ukomeye kandi bigatuma bakurikira no mu ishuri. Ati :“ Byose bikubiye mu kugira imyitwarire myiza ari na yo ntego yacu kugira ngo twubake imbere habo heza.”

Isaro Uwase Kelia, umwe mu bana batangiye gukina Karate muri “The Champions Karate Academy” muri 2019 ubu akaba afite umukandara w’icyatsi kibisi, avuga ko byamufashije kugira imyitwarire myiza imbere y’abantu kuko Karate yigisha koroherana no kwitwara neza nubwo hazamo no kwirinda.

Isaro Uwase Kelia

Akomeza ashishikariza abandi bana bagenzi be ko na bo bajya baza bakitabira siporo bagasabana n’abandi kuko bizabafasha kugira imyitwarire myiza.

Shinga Albert, Umuyobozi wa Club House La Palisse i Nyandungu akaba anafite abana bitoreza muri “The Champions Karate Academy” avuga ko bishimiye gutangiza iki gikorwa kuko bifuza ko buri mpera z’icyumweru abana bajya baza bagakora siporo  zitandukanye kugira ngo bakomeze kugira ubuzima bwiza.

Akomeza avuga ko ubusanzwe siporo ari ubuzima kandi ituma umwana akura neza haba mu buryo bw’umubiri ndetse n’imitekerereze. Ati : “Ubu biratangiye kandi bizahoraho no mu biruhuko bazajya baza bakine imikino itandukanye basabane na bagenzi babo.”

Shinga Albert, Umuyobozi wa Club House La Palisse i Nyandungu

Shinga avuga ko ibikoresho bihari bihagije kandi n’ibindi bizakenerwa byose bazabigura. Aha akaba ashishikariza ababyeyi basanzwe bahaza muri Siporo ko bagomba kujya bazana n’abana na bo bagakora siporo.

Amafoto

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA