Hatangijwe ubukangurambaga ku gukusanya no kunagura ibisigazwa by’ibikoresho by’ikoranabuhanga
Amakuru

Hatangijwe ubukangurambaga ku gukusanya no kunagura ibisigazwa by’ibikoresho by’ikoranabuhanga

NTAWITONDA JEAN CLAUDE

March 25, 2023

Uyu munsi mu muganda rusange usoza ukwezi kwa Werurwe u Rwanda rwatangije ubukangurambaga ku gukusanya no kunagura ibisigazwa by’ibikoresho by’ikoranabuhanga n’ibikoresha umuriro w’amashanyarazi, hagamijwe kurengera ibidukikije.

Mu gihe abaturarwanda bakora umuganda rusange usoza ukwezi kwa Werurwe kuri uyu wa 25, haratangwa ubutumwa bukangurira abaturage gukusanya ibisigazwa by’ibikoresho by’ikoranabuhanga n’ibikoresha umuriro w’amashyanyarazi bigashyirwa ahabugenewe kuko bitavangwa n’indi myanda isanzwe.

Ni ubukangurambaga bwateguwe na Leta y’u Rwanda, binyuze muri Minisiteri y’Ikoranabuhanga mu Itumanaho na Inovasiyo, ku bufatanye n’Ikigo Mpuzamahanga Global Green Growth Institute (GGGI), Rwanda Cooling Initiative na Enviroserve Rwanda.

Insanganyamatsiko igira iti ‘Ducunge neza ndetse tunagure ibikoresho by’ikoranabuhanga n’ibikoreshwa n’amashyanyarazi bitagikoreshwa cyangwa byashaje, bityo tugire ejo heza harengera ibidukikije’.

Ubu bukangurambaga bugamije gushishikariza abaturage gutanga ibikoresho by’ikoranabuhanga n’ibikoresha umuriro w’amashanyarazi byashaje bitagikoreshwa ku makusanyirizo yabugenewe bityo hakongerwa umubare w’ibikoresho bitagikora bikusanywa hose mu gihugu.

Abaturage bose bitabiriye Umuganda rusange barakangurirwa kuzana ibikoresho by’ikoranabuhanga n’ibikoresha amashanyarazi bishaje cyangwa bitagikora kugira ngo bishyirwe ahabugenewe.

Biteganyijwe ko ku rwego rw’igihugu, ubu bukangurambaga bukorwa nyuma y’Umuganda ubera ku ishuri rikuru rya IPRC ishami rya Kigali.

Ubutumwa bukangurira abaturage kujyana ibisigazwa by’ibikoresho by’ikoranabuhanga n’ibikoresha amashanyarazi buranatangwa no mu yindi Midugudu yose mu gihugu.

Umunyamabanga wa Leta muri Minisiteri y’Ikoranabuhanga mu Itumanaho na Inovasiyo, Yves Iradukunda yagize ati: “Uko u Rwanda rutera imbere mu ikoranabuhanga ndetse n’ibikoresho by’ikoranabuhanga n’ibikoresha amashanyarazi bigakomeza kwiyongera mu gihugu, ni nako hakomeje kugaragara ubwiyongere bw’ibisigazwa by’ibikoresho by’ikoranabuhanga n’ibikoresha amashanyarazi.

Ibi bibangamira intego u Rwanda rwihaye zo kuba mu bihugu bifite iterambere ritabangamiye ibidukikije kandi ryihanganira imihindagurikire y’ibihe muri 2050”.

Ubu bukangurambaga burafasha mu gusobanurira abaturarwanda ingaruka zikomoka ku bisigazwa by’ibikoresho by’ikoranabuhanga ndetse banagaragarizwe uko bagira uruhare mu gufasha u Rwanda kuba ku isonga mu gucunga neza ibikoresho by’ikoranabuhanga n’ibikoresha amashanyarazi byashaje cyangwa bitagikora.

Ikigo Mpuzamahanga Global Green Growth Institute (GGGI) gisanzwe gikorana na Leta y’u Rwanda ndetse n’Urwego rw’Abikorera mu gufasha u Rwanda gushyira mu bikorwa imishinga irengera ibidukikije ndetse no kubaka ubukungu bwisubiranya.

Caroline Raes uhagarariye GGGI mu Rwanda, aragira ati: “U Rwanda rwashyize imbaraga mu gushyira mu bikorwa imishinga irengera ibidukikije ndetse no kubaka ubukungu bwisubiranya.

Iki gikorwa ni intangiriro y’ibindi bizakorwa mu minsi iri imbere mu rwego rwo gukangurira abaturage gutanga umusanzu wabo mu kurengera umubumbe dutuyeho ndetse n’ubuzima bw’abantu muri rusange.

Iki ni cyo gihe cyo gushyira hamwe no gutanga urugero rwiza ku bazadukomokaho.”

Kuva mu mwaka wa 2018, Enviroserve Rwanda yashyize imbaraga mu gukusanya no kunagura ibisigazwa by’ibikoresho by’ikoranabuhanga n’ibikoresha amashanyarazi binyuze mu kubaka uruganda rufasha mu kubisambura no kubinagura ndetse no gushyiraho amakusanyirizo mu bice bitandukanye mu gihugu.

Ibyo byose byashyizweho hagamijwe gufasha igihugu guhangana n’iki kibazo cy’iyongera ry’ibi bikoresho ndetse no kunoza imikusanyirize yabyo.

Olivier Mbera, uhagarariye Enviroserve mu Rwanda ati: “Twishimiye iki gikorwa kigamije gukangurira abaturarwanda gushyira ahabugenewe ibisigazwa by’ibikoresho by’ikoranabuhanga n’ibikoresha amashanyarazi kizaba muri gahunda y’Umuganda rusange ku nshuro ya mbere.

Turizera ko imicungire myiza y’ibi bikoresho izafasha mu kurengera ibidukikije, ubuzima bw’abantu ndetse no kubaka ejo hazaza heza.

Turashishikariza abaturarwanda gutanga umusanzu wabo muri iyi gahunda binyuze mu kuyitabira ndetse bakazana ibikoresho by’ikoranabuhanga n’ibikoresha amashanyarazi bitagikora bafite mu ngo zabo ku munsi w’Umuganda cyangwa ku makusanyirizo yacu aboneka mu bice bitandukanye by’igihugu.”

Morris Kayitare, Umuyobozi Mukuru w’Ikigo Nyafurika cy’Icyitegererezo mu byerekeye uburyo bugezweho bwo Gukonjesha agira ati: “Binyuze muri gahunda ya R-COOL GO, hashyizweho uburyo bwiza bwo gufasha abafite ibikoresho bikonjesha bishaje cyangwa bidakora neza, aho buri wese ubifite ashobora kubijyana ku ikusanyirizo ryabugenewe agafashwa kubona ibikoresho bigezweho ndetse akagabanyirizwa ku kigero cya 15%. Ibi ni ibintu byiza cyane kuko bituma dutunga ibikoresho birondereza umuriro kandi bitangiza ikirere.”

Ibisigazwa by’ibikoresho by’ikoranabuhanga n’ibikoresha amashanyarazi bikusanywa bikubiyemo mudasobwa, telefoni, imashini zicapa, n’ibindi byerekeranye na byo nka karitushi, amasede, na batiri ndetse n’ibikoresho bikonjesha.

 Ibi bikoresho birakusanywa bijyanwe ku ruganda kugira ngo bisamburwe, ibindi binagurwe.

Hateganyijwe ko ubu butumwa buzatangazwa biciye mu biganiro bizatambuka kuri radiyo na televiziyo hamwe n’amahugurwa ku gucunga neza ibikoresho by’ikoranabuhanga n’ibikoresha amashanyarazi byashaje cyangwa bitagikora azatangwa mu Mujyi wa Kigali ndetse n’imijyi iwunganira.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA