Hategekimana wakatiwe burundu yavuze ko yizeye ubutabera bw’u Bufaransa
Amakuru

Hategekimana wakatiwe burundu yavuze ko yizeye ubutabera bw’u Bufaransa

NTAWITONDA JEAN CLAUDE

June 30, 2023

Ku mugoroba wo ku wa Gatatu mu Bufaransa ni bwo Urukiko rwa Rubanda rw’i Paris mu Bufaransa rwahaije ibyaha bya Jenoside n’ibyibasiye inyokomuntu Umunyarwanda Philippe Hategekimana w’imyaka 66, rumukatira igifungo cya burundu.

Nyuma y’ibyumweru byinshi yitaba urukiko rwa Rubanda, aho ubuhamya bw’abamushinja bwatumye Hategekimana ubwe abura ayo avuga imbere y’abacamanza, igihano cyari kimutegereje cyaratangajwe, ubwo butabera bukaba bwarashimishije abarokotse Jenoside yakorewe Abatutsi by’umwihairiko ab’i Nyanza bivugwa ko ari ho yayikoreye.

Nyuma yo gutangaza umwanzuro w’urukiko ku wa Gatatu w’iki cyumweru, Umucamanza yavuze ko igihano yahawe cyashingiye ku buremere bw’ibyaha byamuhamye, umubare w’ababiguyemo ndetse n’uburyarya Hategekimana wakomeje kuba mu Bufaransa imyaka myinshi mu mazina atari agerageza guhunga ingaruka z’ibyaha yakoze.

Mu Bufaransa, uyu mugabo yari yarabonye ubwenegihugu ku mazina ya Phillipe Manier. Nyuma yo gukatirwa na we yagize icyo avuga mu magambo make, aho yagize ati: “Mfitiye icyizere imikirize yanyu y’urubanza. Ndabizi ko mwuvira umutima nama wanyu.”

Nyuma y’urubanza rwamaze ibyumweru birindwi, Urukiko rwa Rubanda rw’i Paris, rwemeje ko Philippe Hategekimana (Manier) yagize uruhare mu bwicanyi bwabereye ku misozi ya Nyabubare, Nyamure no mu Kigo cy’Ubushakashatsi ku Buhinzi cya ISAR Songa giherereye mu Ntara y’Amajyepfo.

Ibiro Ntaramakuru by’Abafaransa (AFP) bivuga ko Philippe Hategekimana yahamwe n’ibyaha hafi ya byose yaregwaga.

Hategekimana yahungiye mu Bufaransa nyuma ya Jenoside yakorewe Abatutsi, abona ibyangombwa nk’impunzi, ndetse mu 2005 ahabwa ubwenegihugu akoresheje izina rya Philippe Manier.

Urubanza rwe, rwatangiye mu kwezi gushize, rubaye urwa gatanu mu Bufaransa rw’umuntu uregwa uruhare muri Jenoside yakorewe Abatutsi mu Rwanda.

Yaregwaga ko “yakoresheje imbaraga za gisirikare yari afite kubera ipeti yari afite nk’Umujandarume mu kugira uruhare muri Jenoside yakorewe Abatutsi”.

Hategekimana yahakanye ibyaha aregwa. Uruhande rw’uregwa ntacyo ruratangaza ku mwanzuro w’urukiko wo ku wa Gatatu.

Yafatiwe muri Cameroun

Hategekimana yari yarigeze gukora akazi ko gucunga umutekano kuri Kaminuza yo mu Bufaransa, nyuma ahungira muri Cameroun mu 2017 amaze kumenya ko yashyiriweho ikirego.

Yatawe muri yombi mu 2018, mu Murwa Mukuru Yaoundé wa Cameroun, asubizwa mu Bufaransa.

Ubu yahamijwe uruhare muri Jenoside yakorewe Abatutsi babarirwa mu magana ubwo yari umujandarume ufite ipeti rya ‘Adjudant-chef’ mu mujyi wa Nyanza mu Ntara y’Amajyepfo.

U Bufaransa ni kimwe mu bihugu byerekejemo Abanyarwanda benshi bahunze bashinjwa Jenoside yakorewe Abatutsi.

Bumaze kuburanisha bunakatira Aloys Ntiwiragabo wahoze ari umukuru mu butasi, abahoze ari ba burugumestre babiri, Claude Muhayimana wahoze ari umushoferi, na Laurent Bucyibaruta wahoze ari Perefe w’iyahoze ari Gikongoro.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA