Ibendera rya Repubulika ya Guinea Conakry ryazamuwe bwa mbere i Kigali.
Amakuru

Ibendera rya Repubulika ya Guinea Conakry ryazamuwe bwa mbere i Kigali.

Imvaho Nshya

October 16, 2023

Byari umunezero utangaje ku Cyumweru, ubwo intumwa za Guinea zazamuraga ibendera ry’igihugu cyabo muri Ambasade nshya mu Rwanda.

Nfally Sylla, umukozi wa Minisiteri ishinzwe Iposita, Itumanaho n’Ubukungu bushingiye ku ikoranabuhanga, yagize ati: “Isano ya Kigali na Conakry ikomeje gutera imbere. Harakabaho ubutwererane bw’u Rwanda na Guinea.”

Umubano w’u Rwanda na Guinea ukomeje gutera imbere nyuma y’uruzinduko rw’akazi rw’iminsi ibiri Perezida wa Repubulika y’u Rwanda Paul Kagame yagiriye muri icyo gihugu guhera tariki ya 17 Mata 2023, agahura Perezida w’Inzibacyuho wa Guinea Col. Mamadi Doumbouya, bagasuzuma imiterere y’uwo mubano.

Abo bayobozi ni na bo bayoboye ndetse banakurikirana umuhago w’isinywa ry’amasezerano arimo ayo gushyiraho Komisiyo ihuriweho ikurikirana ubutwererane bwa Conakry na Kigali, n’ajyanye n’ikoranabuhanga, itumanaho, isakazamakuru, no gushyira serivisi za Leta mu buryo bw’ikoranabuhanga.

Impande zombi ziyemeje gukomeza gukurikiranira hafi ishyirwa mu bikorwa ry’amasezerano yamaze gusinywa ndetse baniyemeza gutegura inama ibahuza mu gihe gito gishoboka kugira ngo barusheho kwiga ku buryo bwo kwagura umubano.

Bimwe mu bikorwa byahise bitangira muei ubwo butwererane ni uko Rwanda na Guinea Conakry byatangaje ubufatanye bwo kubaka uruganda rutunganya zahabu, ndetse bigatanga icyizere gihamye ko Sosiyete Nyarwanda ikora ubwikorezi bwo mu kirere, RwandAir, ishobora gutangira kogoga ikirere cya Conakry.

Perezida Col. Doumbouya, ubwo yakiraga  Perezida Paul Kagame, yashimangiye ko igihugu cye cyiteguye no kwigira ku budasaza bw’u Rwanda mu birebana no kwimakaza ubumwe n’ubwiyunge.

NTAWITONDA JEAN CLAUDE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA