Ibibazo bikigaragara mu ikoranabuhanga birashakirwa ibisubizo- DIRECA
Amakuru

Ibibazo bikigaragara mu ikoranabuhanga birashakirwa ibisubizo- DIRECA

NTAWITONDA JEAN CLAUDE

March 4, 2023

Muri iki gihe, Isi muri rusange ihanze amaso ikoranabuhanga, kuko byagaragaye ko rifasha kandi rikihutisha ibikorwa bitandukanye, rikaba ibisubizo mu nzego zitandukanye.

Ni muri urwo rwego hagenda havuka imiryango haba ku rwego rw’Igihugu ndetse no ku rwego mpuzamahanga, aho abahanga mu by’ikoranabuhanga badahwema gushakisha ibisubizo bigamije gukemura  ingorane cyangwa se ibibazo bikigaragara muri sosiyete bifashihije  ikoranabuhanga.

U Rwanda ruri mu bihugu byihuta mu gukoresha ikoranabuhanga, aho rwubaka kandi rugikomeje kubaka ibikorwa remezo kugira ngo murandasi irusheho kugera kuri benshi kandi idacikagurika.

Minisitiri w’Ikoranabuhanga na Inovasiyo, Ingabire Paula mu Nama y’Igihugu y’Umushyikirano ya 18 yabaye ku ya 27-28 Gashyantare 2023, yagarutse ku bibazo bikigaragara mu ikoranabuhanga harimo kuba ibiciro bya murandasi bikiri hejuru, ariko hari gushakishwa uburyo byabonerwa ibisubizo, kuko ubu ikoreshwa ry’ikoranabuhanga riri mu by’ibanze.

Yagize ati: “Ni byo igiciro cya intenet gikomeza kuba gihenze ku Banyarwanda benshi ahanini biterwa n’ibintu 2, aho tuyivana, kuko turi igihugu kidakora ku nyanjya, tugendera ku bihugu bikora ku mazi kandi igiciro gishyirwaho na ba bandi bayinyuza mu mazi.  [….] kugira ngo igiciro nibura kigabanyuke bijyana no kurebera hamwe uburyo bwo gushyiraho bya bikorwa remezo by’itumanaho, kubyubaka byafasha ba rwiyemezamirimo cyangwa bya bigo by’itumanaho kuba basangira ikiguzi cyo kubishyiraho”.

Mu kwegereza serivisi zitandukanye abazikeneye kandi mu buryo bwihuse havuka ibigo, imiryango ku nzego zitandukanye, akaba ari muri urwo rwego Umuryango mpuzamahanga DIRECA Technologies washyize ahagaragara porogaramu z’ikoranabuhanga mu gushakira ibisubizo ibibazo bijya bigaragara mu buzima bwa buri munsi, bigakemurwa hifashishijwe ikoranabuhanga.

Mu kiganiro n’itangazamakuru nk’uko byasobanuwe n’Ushinzwe ubucuruzi muri DIRECA Technologies, Victor Rudasingwa, iryo koranabuhanga rigamije gushaka ibisubizo ku bibazo biboneka muri sosiyete, bigakemurwa mu buryo bw’ikoranabuhanga.

Victor Rudasingwa avugana n’itangazamakuru (Foto Nyiraneza J.)

Yagize ati: “Hari ikibazo kiri hanze aha mu kazi kacu ka buri munsi hari ibibazo biba birimo ariko izo porogaramu zizabafasha kumenya amakuru atandukanye bitewe n’urwego runaka”.

Yasobanuye uburyo serivisi batanga zihariye muri porogaramu zitandukanye, n’umutekano wizewe kuko zikemura ibibazo byari bihari ku buryo bwihuse kandi bwizewe kuko amakuru aba ariho agera ku bari mu ruhererekane bose.

Ati: “Nta mpungenge kuko haba hari uruhererekane rw’abantu bakoresha porogaramu runaka, urugero iyo ugiye kujyana igikoresho kugikoresha, iyo ugiye kujyana icyo gikoresho aho bagisana muba mwagaragaje  ikibazo icyo gikoresho gifite,  ugiye (nyiracyo) gukoresha byose babishyira muri sisitemu, n’ibiba bigiye gukoreshwa biba birimo, niba ari n’igishya ugiye gushyiramo, cyangwa igipfuye ugiye gukuramo byose ubishyira muri sisitemu, aho uri uba ushobora gukurikirana ibikorwa kuko urimo gukora byose muba muhana amakuru  mwifashishije iyo ‘Application’ ”.

Porogaramu 8 zizafasha mu gukemura ibibazo hifashishijwe ikoranabuhanga

Izo porogaramu umunani zashyizwe ahabona kuri uyu wa Gatanu taliki ya 3 Werurwe 2023, n’Umuryango DIRECA Technologies zigamije kuziba icyuho cy’ikoranabuhanga kikigaragara mu nzego zitandukanye zirimo abikorera, inzego za Leta n’imiryango itegamiye kuri Leta ndetse no gushyigikira izo nzego mu rugendo rw’ikoranabuhanga.

Porogaramu Schooltec.online ni gahunda itanga amakuru ku myigire y’umunyeshuri. Ikoreshwa n’ibigo by’amashuri y’inshuke, abanza n’ayisumbuye ikageza amakuru ku mubyeyi y’uburyo umwana yitwaye atiriwe ajyayo, kwishyura amafaranga n’ibindi, bigafasha mu gukoresha igihe neza.

Gahunda ya superepair.net ikoreshwa n’abafite ibyo bashaka gukoresha bisanwa nk’imodoka, imashini bakareba icyo ugiye gukoreshaho, mukumvikana igiciro n’igihe bizamara mukabishyira muri application ukabikurikirana utavuye aho uri, bifasha gukorana ubunyangamugayo no gucunga igihe neza.

Porogaramu ya iturize.com ikoreshwa mu gucunga ibicuruzwa byinshi bitandukanye hifashishijwe ikoranabuhanga umuntu akamenya ngo ibicuruzwa byanjye ububiko bugeze he? Ibyasohotse, hamenyekana ibikenewe kongerwamo, ibyenda kurenza igihe, akanatanga fagitire ku buryo bworoshye.

Bifasha gutanga serivisi no gufasha gukora raporo y’ubucuruzi byihuse.

Mutangana Narcisse ushinzwe amasoko (Marketing) muri DIRECA Technologies yasobanuye uburyo izo gahunda zitanga serivisi nziza kandi vuba kuko ikoranabunga ari mudatenguha.

Gahunda ya innopub.online ifasha abafite udushya kutugaragaza nko gucuruza ibitabo baba baranditse. Ni gahunda ireba cyane cyane abanyeshuri, abanditsi, n’abashakashatsi.

Porogaramu mysouvenir.online ifasha umuntu kubika amakuru ye bwite nk’amajwi, amafoto, amashusho. Ni application ibika amateka.

Hari na gahunda ijyanye n’ibyo gushyingura, ikoreshwa n’abagize ibyago funeraltech.online ifasha muri gahunda zose zijyanye n’itabaro, ikabahuza n’abafite aho bahuriye no kuza kugira uruhare mu itabaro,  harimo aho gukodesha imyenda yo kwambara, indabo, irimbi, imodoka, byose bigakorwa abantu batavuye aho bari.

Gahunda ya jobfirst.online igamije gushyira umwirondoro w’ushaka akazi muri iyo application bikereka umukoresha uwujuje iby’umukozi ukenewe mu kazi ke.  Ni gahunda ifasha kubona akazi ndetse no kubona abakozi.

Naho hightaste.online igamije gufasha gukurikirana ibikorwa by’ubucuruzi birimo aho kurira no kunywa  mu maresitora, mu mahoteli, n’ahandi.  Bifasha mu gutanga serivisi vuba, nyiri ubucuruzi akurikirana ibikorwa bye.

Hasobanuwe ko ku bijyanye n’ibiciro bidakanganye kuko urugero nka paji umuntu ashyizeho yanditseho ibyo ashaka kubika kuri konti ye nk’ifoto n’amagambo ayiherekeje ni amafaranga 10 gusa no kuri buri foto ni amafaranga 10,  umuntu ahita yishyura ako kanya akoresheje ikoranabuhanga. Nko muri gahunda Unnopub.online usanga nk’umunota umwe ku mashusho ari amafaranga 20.

Basobanuye ko hizewe umutekano w’ibyo umuntu aba yabitseho, kuko ari we uba uzi ijambo banga rituma yinjira kuri konti ye.  Hari icyizere ko zo porogaramu  zizatanga umusaruro kuko uyu muryango watangiye mu 2021, muri gahunda ya Tekana hakaba hama ze kwitabira abasaga 13,000.

Aba ni bamwe mu banyamakuru bari bitabiriye ikiganiro (Foto Nyiraneza J.)

TANGA IGITECYEREZO

  • Karanganwa
    March 11, 2023 at 10:25 am Musubize

    Iriya innopub ubona yari ikenewe cyane. Abanyeshuri bo mu mashuri yisumbuye n’amakuru ubona baburaga digital platform yo kumenyekanisha udushya twabo. Innopub kandi izanafasha abarimu ndetse n’abandi banditsi kumenyekanisha no kugurisha ibyo bakora ku isi yose kugirango bibashe no kubabyarira inyungu. Ubu apple, Google, microsoft, n’ibindi bigo bikomeye bigiye kujya bibona udushya tw’abana b’abanyarwanda. Kwagura network, kubona amafranga no kwigira kubahanga b’Isi yose bizazamura urwego rwo guhanga udushya no gukora ubushakashatsi bizakemura ikibazo cy’ireme ry’uburezi no kugabanya ubushomeri mu rubyiruko rurangiza amashuri.

  • Karasi
    March 11, 2023 at 10:37 am Musubize

    DIRECA Technologies yagize neza gukora funeraltech.

    Abantu bafite ababo bitabye Imana bari bakeneye ahantu bashyira amakuru ajyanye n’abantu bitabye Imana (gahunda y’ikiriyo, gahunda yo gushyingura, kwizihiza ubuzima bw’uwitabye Imana, gukura ikiriyo, ubuhamya butandukanye), kuba uwagize ibyago yamenya amasaha n’iminsi itarafashwe ku irimbi atiriwe ajyayo cg ahamagara agakora online booking, kuba yabona aho agura ibikenerwa byose birimo indabo, imyenda, noeuds cg izindi services zikenerwa zirimo imodoka, aho gukarabira, sonorization n’ibindi. Ntekereza ko abafite irimbi, abacuruza ibikenerwa mu kiriyo no gushyingura ndetse abagize ibyago biruhukije.
    Kudos kubatekereje funeraltech.

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA