Ibibazo byo mu mutwe byiganje mu bari munsi y’imyaka 25-RBC
Amakuru

Ibibazo byo mu mutwe byiganje mu bari munsi y’imyaka 25-RBC

Imvaho Nshya

October 11, 2023

Ubuyobozi bw’Ikigo cy’Igihugu cy’Ubuzima (RBC) bwatangaje ko urubyiruko ruri munsi y’imyaka 25 mu Rwanda ari rwo rwibasiwe n’ibibazo by’ubuzima bwo mu mutwe, aho usanga ahanini bishingiye ku makimbirane yo mu miryango.

RBC ishimangira ko usanga ¾ by’ibibazo byo mu  mutwe bitangira umuntu ari munsi y’imyaka 25. Ni muri urwo rwego ubuyobozi bwa RBC busaba Umuryango Nyarwanda kwirinda amakimbirane mu miryango kuko ari mu mpamvu abana bato n’urubyiruko bahura n’ibibazo bitandukanye by’ubuzima bwo mu mutwe.

Byagarutsweho ku wa Gatatu taliki ya 10 Ukwakira 2023 ubwo u Rwanda rwifatanyaga n’Isi yose kwizihiza Umunsi Mpuzamahanga wahariwe kwita ku buzima bwo mu mutwe.

Dr. Darius Gishoma, Umuyobozi w’Ishami rishinzwe ubuzima bwo mu mutwe muri RBC, yasabye ababyeyi kwita ku gukemura amakimbirane yo mu ngo kugira ngo abana bagire ubuzima buzira indwara zo mu mutwe.

Yagize ati: “Mu gukumira kandi ni byiza kwitsa ku mbaraga z’umuryango nk’ishingiro n’igicumbi cy’ubuzima bwo mu mutwe, iyo umwana akuriye mu muryango utarimo amakimbirane bimuha amahirwe yo kutagira ibibazo byo mu mutwe ariko iyo akuriye mu muryango urimo amakimbirane byongera ibyago byinshi.”

Yongeyeho ko abafatanyabikorwa barimo Minisiteri y’Uburinganire n’Iterambere ry’Umuryango (MIGEPROF), Minisiteri y’Ubuzima, Inzego z’ibanze ndetse n’abandi bafite uruhare mu kwita ku bafite ikibazo cy’indwara zo mu mutwe kandi bakabategurira inzira ituma bagaruka mu muryango bakabarinda ko bahabwa akato.

Bamwe mu rubyiruko rwaganiriye n’Imvaho Nshya bavuga ko nubwo ari rwo rugaragarwaho n’iki kibazo cyane bakwiye gushyira imbaraga hamwe bakagira inama abahuye n’iki kibazo  banirinda kubaha akato.

Umuhoza Joie Sophie agira ati: “Ibibazo turabihorana ariko igitandukanye n’uburyo tuva muri ibyo bibazo,inama nabagira nukwimenya kandi bakegera inshuti n’inzego zibishinzwe zikabafasha.”

Umugwaneza Helena na we ati: “Niba uhuye ni cyo kibazo singombwa ko wumva ko uri wenyine ,wakwegera uri hafi yawe ukamuganiriza uko wiyumva,kandi tukumva ko atari abasazi nkuko benshi babitaga cyera.”

Abantu million 8 ni ukuvuga 14.3% buri mwaka ku Isi bapfa bazize ibibazo byo mu mutwe, mu gihe  ibarura ryo mu mwaka wa 2022 rigaragaza ko miliyion 450 ari bo bafite ibibazo by’ubuzima bwo mu mutwe usanga baba biganjemo ababaswe n’ibiyobwagwenge.

KAMALIZA AGNES

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA