Ibiciro bya Internet ya Starlink byagabanyijwemo 2 mu Rwanda
Amakuru

Ibiciro bya Internet ya Starlink byagabanyijwemo 2 mu Rwanda

NTAWITONDA JEAN CLAUDE

February 22, 2023

Kuri uyu wa Gatatu taliki ya 22 Gashyantare handitswe amateka ahindura icyerekezo cya internet mu Rwanda, kuko ni umunsi uzahora wibukirwaho itangizwa rya serivisi za internet inyaruka itangwa n’ibyogajuru bya Starlink, by’Ikigo SpaceX cy’Umuherwe Elon Musk.

Minisiteri y’Ikoranabuhanga no Guhanga Udushya, yatangaje ko guhera uyu munsi iyo internet inyaruka yatangijwe ku mugaragaro mu Rwanda mu bice bitandukanye, hifashishijwe ihuzanzira ry’ibyogajuru.

Amakuru akomeje gucicikana ashimangira ko mbere y’uko umufatabuguzi asinyana amasezerano na Starlink azajya ahabwa iminsi 90 y’igerageza, kugira ngo abanze yibonere itandukaniro riri hagati ya internet asanzwe akoresha n’iyo nshya yungutse.

Iyo Minisiteri ivuga ko ugereranyije n’ibiciro bya internet ya Starlink ku isoko mpuzamahanga, ibyemejwe ko bigomba kubahirizwa mu Rwanda byagabanyijwemo kabiri, ndetse ko nta gihendo kirimo ugereranyije n’umuvuduko ndetse n’ubudakemwa bwayo.

Mu gihe ibiciro bikoreshwa muri Leta Zunze Ubumwe z’Amerika ari amadolari y’Amerika 110, ni ukuvuga amafaranga y’u Rwanda 119,616 ku kwezi, mu Rwanda ho ifatabuguzi rizaba rigurwa amafaranga y’u Rwanda 48,000 ku kwezi.

Ibikoresho bigurwa rimwe umuntu akabikoresha igihe cyose bizajya bitangirwa ku mafaranga y’u Rwanda 572,000 mu gihe muri Amerika bigura amafaranga y’u Rwanda arenga 651,363.

Bivuze ko ku ikubitiro ukeneye gukoresha iyo internet ya Starlink azajya yishyurira hamwe amafaranga y’u Rwanda 600,000 ubundi buri kwezi ajye yishyura ifatabuguzi  ryagabanyijwe kugeza mu cya kabiri ugereranyije n’igiciro cyo muri Amerika.

Bimwe mu bikoresho umufatabuguzi ahabwa harimo anteni parabolique (dish), router, imigozi itwara umuriro n’iya internet, byose umuntu agurira rimwe ubundi akajya yishyura ifatabuguzi rya buri kwezi.

Umwe mu bakozi ba Minisiteri y’Ikoranabuhanga n’itumanaho yabwiye itangazamakuru ati: “Twiteze ko internet ya Starlink izaba yihariye ku muvuduko no ku biciro, ntabwo izaba icikagurika kandi izarushaho kugenda inozwa uko iminsi ishira indi igataha.”

Bivugwa ko Starlink igabanya ibiciro bitewe n’imiterere ndetse n’ubushobozi bw’abaturage b’aho igiye gukorera, ni yo mpamvu kugera ku Isoko ry’Afurika byaje nk’igisubizo kirambye mu gihe bamwe batekerezaga ko umubare munini w’Abanyafurika utazashobora kwigondera ibiciro byayo.

U Rwanda rubaye igihugu cya mbere mu Karere k’Afurika y’Iburasirazuba gitangiye kuryoherwa na serivisi za internet inyaruka kurusha izindi zitangwa na Starlink, ibyogajuru bikorera mu ruziga rwegereye Isi, rukaba  rubaye igihugu cya kane muri Afurika nyuma ya Nigeria, Mozambique na Malawi.

Internet ya Starlink irategurirwa gukwizwa mu bice by’imijyi n’icyaro bitarageramo internet ihagije

Kugeza ubu izo serivisi zitangwa mu bihugu bisaga 30 ku Isi byiganje muri Amerika y’Amajyaruguru ndetse n’i Burayi.

Kuri ubu ibyogajuru bya Starlink mu isanzure bimaze kurenga 2,000 ndetse hari gahunda yo kohereza n’ibindi bibarirwa mu bihumbi mu myaka iri imbere kugira ngo serivisi za internet bitanga zirusheho kwaguka mu bice bitandukanye by’Isi.

U Rwanda rwakiriye iyo serivisi nshya mu gihe Raporo Mpuzamahanga ku Guhanga Udushya (GII) yasohowe n’Umuryango urengera Umutungo Kamere mu by’Ubwenge (WIPO) uherutse kurushyira mu bihugu bikiri mu nzira y’amajyambere byo muri Afurika yo munsi y’Ubutayu bwa Sahara bifite umuyoboro mugari wa internet inyaruka.

U Rwanda ruhiga ibindi bihugu byo muri ako Karere mu bijyanye no gukoresha umuyoboro mugari wa internet inyaruka mu bigo bya Leta n’iby’abikorera bimwe na bimwe, kugira abakozi bashoboye kuyibyaza umusaruro, gukora ubushakashatsi hamwe n’ibikorwa remezo bijyanye n’igihe.

Starlink niba imaze gushinga imizi mu Rwanda, internet yayo yitezweho gukwirakwizwa mu midugudu itageramo internet ihagije mu bice by’imijyi n’icyaro, bikaba byitezweho kongera umubare w’abakoresha internet mu kwiteza imbere no guteza imbere Igihugu.

Minisiteri y’Ikoranabuhanga no Guhanga Udushya yatangaje ko ku ikubitiro amashuri ari mu bigo bya Leta byahawe inda ya bukuru kugira ngo atangire kwegerezwa iyo internet mu kurushaho kuzamura ireme ry’uburezi.

Biteganyijwe ko Internet ya Starlink izahera mu bigo by’amashuri bitari munsi ya 500 byari bisanzwe bitagerwamo na internet cyangwa ibyabonaga idahagije.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA