Ibikorwa remezo aborozi bagejejweho na RDDP byabafashije kongera umukamo
Amakuru

Ibikorwa remezo aborozi bagejejweho na RDDP byabafashije kongera umukamo

NTAWITONDA JEAN CLAUDE

June 29, 2023

Aborozi bo mu Karere ka Nyagatare barashima umushinga  ugamije guteza imbere ubworozi bw’inka zitanga umukamo mu Rwanda, (Rwanda Dairy Development Project/RDDP) wabafashije kubona umukamo mwinshi bitewe n’ibikorwa remezo wabubakiye n’ibindi bigamije kongera umukamo.

Muri ibyo bikorwa harimo amakusanyirizo, ibibumbiro byubatswe mu nzuri kugira ngo inka zibone amazi ndetse hafi na Dam sheet yo gufata amazi, ibikoresho byo kwita ku mukamo no gutera ubwatsi bw’amatungo butandukanye bwongera umukamo n’ibindi.

Umushinga RDDP uterwa inkunga n’Ikigega Mpuzamahanga gishinzwe iterambere ry’Ubuhinzi n’Ubworozi IFAD ukaba waragizwemo uruhare na Leta y’u Rwanda binyuze muri Minisiteri y’Ubuhinzi n’Ubworozi ugashyirwa mu bikorwa n’ Ikigo cy ‘Igihugu gishinzwe iterambere ry’Ubuhinzi n’Ubworozi (RAB).

Abingoma Livingstone wo mu Mudugdu wa Karama, mu Kagari ka Karama, mu Murenge wa Karangazi mu Karere ka Nyagatare yatangarije Imvaho Nshya ko binyuze mu mushinga wa RDDP aborozi bashishikarijwe guhinga ubwatsi no kububika ku buryo bugaburirwa amatungo mu mpeshyi.

Aborozi bahawe ubwatsi burimo ibyubaka umubiri n’ibitera imbaraga, nka kakamega, korolisi gayana, kaliyandara n’ubundi. Ibyubaka umubiri biba ku kigero cya 30% n’ibitera imbaraga ku kigero cya 70%.

Yasobanuye uko iyo ubwatsi bweze abutema akabwumisha, hanyuma akabushyira mu mashini ibukata ikanabukoramo utuba tubikwa mu nzu igihe kirekire bukazagaburirwa amatungo mu gihe cy’izuba.

Abingoma kandi agurisha ubwatsi abandi borozi ndetse n’ingemwe, ingeri zo gutera bityo bukagera kuri benshi.

Korora mu buryo bwa kijyambere avuga ko byamufashije kongera umukamo.

Yagize ati “Nkifite inka za gakondo nta n’akagare nagiraga, ubu mfite moto n’imodoka, ibyo byose mbikura mu korora neza no guhinga ubwatsi. Ncyorora inka za gakondo inka yakamwaga litiro 2 kugera kuri 2,5, ariko nyuma yo kwiga mu ishuri ryo mu kiraro ikamwa litiro 12 kugeza kuri 15 mugitondo na litiro 8 nimugoroba”.

Abingoma kandi yavuze ko ashobora no kubika ubwatsi buva mu bisigazwa by’imyaka nk’ibishogoshogo by’ibishyimbo bibikwa neza, bikaba byamara imyaka icumi, ibigorigori n’ibindi.

Umuyobozi ureberera ibikorwa by’Umushinga ugamije guteza imbere ubworozi bw’inka zitanga umukamo, RDDP Alexis Ndagijimana, avuga ko bafatanyije n’Inzego z’ibanze, aborozi bakanguriwe kunyuza amata ku makusanyirizo kugira ngo hapimwe niba yujuje ubuziranenge.

Yagize ati:“Twakoze ku buryo dukorana n’aborozi babona imbuto y’ubwatsi, babona ibikoresho mu gukusanya amata, kugeza amazi mu nzuri dukoresheje nayikondo n’ibindi bikorwa bijyanye no kongera umukamo muri rusange.”

Imbuto y’ubwatsi yatewe kuri hegirari zirenga 7,000, hubakwa hangars 210 zo guhunikamo ubwatsi, hagurwa imashini 4 zizinga ubwatsi ndetse n’imashini 145 zikata ubwatsi, aborozi bafashijwe kwegerezwa amazi hacukurwa amavomero agera kuri 36 abafasha mu guha inka amazi meza.

Hatanzwe imbuto y’ubwatsi, hubakwa hangari zo guhunikamo ubwatsi, hagurwa imashini zizinga ubwatsi ndetse n’imashini zikata ubwatsi (chopper machines).

Hubatswe amakusanyirizo hatangwa n’ibikoresho bitandukanye

Yagarutse ku bikorwa remezo bigira uruhare mu gukusanya umukamo biri hirya no hino mu gihugu, ahasanwe amakusanyirizo 57, agera kuri 64 ahabwa ibikoresho byifashishwa mu gukusanya no gukonjesha amata, hubatswe amakusanyirizo manini 15 agezweho yahawe umuriro w’amanyasharazi ngo hagabanywe ibihombo by’iyangirika ry’amata n’udukusanyirizo duto 50.

Aborozi begerejwe amazi hacukurwa amavomero (boreholes) abafasha kuhira inka by’umwihariko mu gihe cy’impeshyi.

Muri uyu mushinga kandi haguzwe n’imashini itanga Azote ibikwamo intanga, hanuzuye ikigo kizakorerwamo ibijyanye no kunoza uburyo bwo kuvugurura ubworozi, hanasanwe laboratwari 4 zikoreshwa mu gupima no kuvura amatungo.

Haguzwe ibimasa 10 bikurwamo intanga zo kuvugurura icyororo, hakomeza no guhugura ndetse no gushyigikira abafashamyumvire nyuma bageza ubumenyi bungutse ku bandi borozi hagamijwe guteza imbere ubworozi.

Umushinga wa RDDP watangiye mu mwaka wa 2017 ugamije kongera ubwinshi n’ubwiza bw’amata, kubaka ubumenyi n’ubushobozi bw’aborozi mu kongerera agaciro amata n’ibiyakomokaho.

Amakoperative amwe y’aborozi yafashijwe kugura imodoka, ibyuma bikonjesha amata, amakusanyirizo y’amata ahabwa umuriro w’amashanyarazi n’ibindi.

Aborozi muri rusange rwishimira ko inka zabo zitakigandara.

Umuyobozi w’umushinga RDDP, Ndagijimana Alexis avuga ku bikorwa remezo byegerejwe aborozi
Abingoma Livingston agurisha imbuto z’ubwatsi abandi borozi
Aborozi bahawe amashitingi afata amazi (dam sheet)

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA