Ibikorwa remezo by’ikoranabuhanga ni ingenzi ariko ntibihagije – Perezida Kagame
Amakuru

Ibikorwa remezo by’ikoranabuhanga ni ingenzi ariko ntibihagije – Perezida Kagame

NTAWITONDA JEAN CLAUDE

October 25, 2022

Ikoranabuhanga rigezweho ni imbaraga zikomeye muri iyi Si ya none, kuko rigira uruhare rukomeye mu kongerera ubuzima inganda zikajyana n’igihe, ibigo bikihuta mu iterambere bibyaza umusaruro ubwenge muntu butari karemano (AI) bufasha mu gukora ibintu byinshi bifite ubuziranenge mu gihe gito.

Perezida wa Repubulika y’u Rwanda Paul Kagame, yavuze ko iryo koranabuhanga rigezweho rikenewe no ku mugabane w’Afurika, ariko hakaba hakiri ikibazo cy’uko ritaragera kuri bose. Yatanze urugero rw’ihuzanzira rya internet rikoreshwa gusa n’abatagera ku cya kabiri, aho usanga abenshi batabona amahirwe yo kuribyaza umusaruro kandi batuye ahubatswe ibikorwa remezo.

Perezida Kagame yabigarutseho kuri uyu wa Kabiri ubwo yatangizaga ku mugaragaro Inama Mpuzamahanga yiga ku ikoranabuhanga rya telefoni ibaye iya mbere ibereye ku Mugabane w’Afurika, aho yashimangiye ko kubaka ibikorwa remezo ari ingenzi ariko bikwiye kujyana n’izindi ngamba kugira ngo bitange umusaruro.

Yagize ati: “Ibikorwa remezo by’ikoranabuhanga ni ingenzi ariko ntibihagije… Kugira ngo ihuzanzira rya internet ribyazwe umusaruro, ishoramari mu kwimakaza ubumenyi ndetse n’ubuhanga bikwiye gushyirwa muri Politiki z’ibihugu. Ku nkunga y’urwego rw’abikorera, mu Rwanda Ikigo Kigali Innovation City kirangamiye guteza imbere imbaraga z’abakozi bashoboye kandi batanga umusaruro, n’ikirere cyiza ku bigo bigitangira.”

Perezida Kagame yavuze ko nko muri Afurika hari urubyiruko rufite ubushobozi bwo guhanga udushya rukeneye kubona urubuga rukwiye rwatangiramo umusanzu warwo mu gutanga ibisubizo.

Ati: “Ntidushobora kwihanganira kubagabanyiriza kuba umubare gusa cyangwa kwicara ntacyo bakora mu gihe bashakira amahirwe hanze y’Afurika. Urubyiruko rwacu rufite byinshi rwatanga, dukwiye gukora uruhande rwacu kandi tukubahiriza amasezerano twabahaye.”

Yakomeje avuga ko nubwo hari intambwe zifatika zatewe ku Mugabane w’Afurika mu kwihutisha iterambere ry’ikoranabuhanga hagikenewe kubakwa ikirere kizima cy’amategeko n’ubugenzuzi kugira ngo hatagira n’umwe usigara inyuma.

Yasabye buri wese kuzirikana ko iterambere ry’ikoranabuhanga atari inyungu za bamwe gusa, aho iterambere riza rihutaza abanyantege nke kurusha abandi. Ati: “Si uko bimeze! Buri wese, hatitawe ku bushobozi, igitsina cyangwa ubwenegihugu, akwiye kubona inyungu niba koko dushaka kurema impinduka ziramba.”

Yanakomoje ku buryo ihuzanzira rya internet rigera kuri bose kandi risobanutse rishobora kuba umusingi mwiza mu ishyirwa mu bikorwa ryuzuye ry’Isoko Rusange ry’Afurika (AfCFTA) rihuza abasaga miliyari 1.3 batuye ku Mugabane w’Afurika. Yavuze ko ibi bikubiye mu rugendo rwo kubaka Afurika ibereye Abanyafurika ndetse bose bafatanyije bashobora kugera kuri izo nzozi.

Yakomeje agira ati: “Ahantu hose ku Isi, ikoranabuhanga rigezweho rirahindura ahazaza h’ubukungu, ndetse n’imiterere y’amahoro n’umutekano. Mu kwihutisha uburumbuke, ikoranabuhanga rikwiye kuba rijyanna n’imiyoborere myiza.”

Nyuma y’ijambo yatanze, Umuyobozi Mukuru w’Ikigo Mpuzamahanga gishinzwe Itumanaho rya Telefoni (Global Ststem for Mobile Communications/ GSMA) Mats Granryd, yashimye uburyo u Rwanda rukomeje kuba intangarugero mu Karere, ku Mugabane ndetse no mu ruhando mpuzamahanga, abaza Perezida Kagame ibanga Igihugu gikoresha.

Perezida Kagame yavuze ko icya mbere cyafashije u Rwanda kugera aho ruri uyu munsi ari ugutekereza no guhitamo gushora imari, kwimakaza ubufatanye bwa Leta n’Urwego rw’Abikorera ndetse no kugera ku baturage muri rusange bakabigiramo uruhare ari na byo bibafasha kurikunda bakarushaho guhanga udushya.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA