Ibitaro bya Ndera byagaragaje igitera amahane y’umurwayi n’icyo wamufasha
Ubuzima

Ibitaro bya Ndera byagaragaje igitera amahane y’umurwayi n’icyo wamufasha

Imvaho Nshya

August 1, 2023

Ibitaro by’indwara zo mu mutwe bya Ndera (Caraes Ndera) bibinyujije ku mbuga nkoranyambaga zabyo, byagaragaje uko umurwayi ugiye kwinjira mu bitaro bya Ndera afite amahane, afashwa.

Ubwo butumwa bigira buti “Kugira ngo dufashe umurwayi ufite amahane, tubanza kumenya icyateye ayo mahane. Impamvu zitera umurwayi amahane ni nyinshi.

Muri zo twavuga kuba yumva amajwi, akanabona amashusho bidahari by’abantu cyangwa ibintu bishaka kumugirira nabi, bityo agashaka kwirwanaho”.

Ubuyobozi bw’ibitaro bivuga ko kuba abo mu muryango batazi neza uburyo bwo kumufasha, usanga bamuziritse cyangwa bamukingirana, bityo bigatuma amahane yiyongera.

Ibitaro bisobanura ko ikoreshwa ry’ibiyobyabwenge biri mu bituma umurwayi akomeza kugira amahane, n’ibindi.

Umuntu ugaragaje amahane afatwa nk’umurwayi ukeneye ubuvuzi bwihutirwa.


Icyo wakorera umurwayi ufite amahane.


Ibitaro bya Caraes Ndera bigaragaza icyo wakorera umurwayi igihe afite amahane, biti “Kumufasha gutuza, umubohora igihe aziritse, kumuha umwanya wo kumwumva, kumushyira ahantu hatuje”.

Mu gihe yagejejwe kwa muganga kandi agifite amahane akabije adashobora gutuza, abaganga bamuha umuti umufasha gutuza ndetse ngo bakamushyira aho ashobora kuryama akaruhuka.

Imibare y’ishami ry’Umuryango w’Abibumbye ryita ku Buzima (OMS), rigaragaza ko ku Isi yose hari abantu barenga miliyoni bafite uburwayi bwo mu mutwe.
Imibare y’ibitaro bivura indwara zo mu mutwe bya Caraes Ndera, yerekana ko umwaka wa 2021/2022, bakiriye abarwayi 96.357, bakaba bariyongereyeho 29,6% ni ukuvuga 21,993 ugereranyije n’umwaka wabanje wa 2020/2021.


Ni imibare iteye ubwoba ariko igihangayikishije cyane ni uko hejuru ya 70 ku ijana, ari urubyiruko kandi ibibazo rufite ari ibituruka ku biyobyabwenge n’inzoga.
Abari hagati y’imyaka 20-39 bangana na 42%, abarengeje imyaka 40 ni 38% naho abari munsi y’imyaka 19 ni 20%.

Yanditswe na KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA