Ibiyobyabwenge byangiza ubuzima bikadindiza iterambere ry’u Rwanda
Amakuru

Ibiyobyabwenge byangiza ubuzima bikadindiza iterambere ry’u Rwanda

NTAWITONDA JEAN CLAUDE

June 27, 2023

Kuri uyu wa Mbere taliki ya 26 Kamena 2023, mu Murenge wa Mugombwa, mu Karere ka Gisagara hasojwe ubukangurambaga bwo kurwanya ibiyobyabwenge n’inzoga mu rubyiruko, bumaze ibyumweru 2  hibuswa ko ibiyobyabwenge byangiza ubuzima bw’ubifata kandi bikadindiza iterambere ry’igihugu.

Ubwo bukangurambaga buhuriweho n’inzego zitandukanye zirimo Ikigo Cy’Igihugu Cy’Ubuzima (RBC), Polisi y’Igihugu, Minisiteri y’Urubyiruko Ikigo cy’Igihugu cy’Igororamuco n’izindi  hagamijwe kongera imbaraga mu kurwanya ibiyobyabwenge mu rubyiruko, kuko muri rusange ari ikibazo gihangayikishije Isi.

Insanganyamatsiko ikaba ari ‘Ibiyobyabwenge byangiza ubuzima tubyirinde’.

Muri iki gikorwa kandi hanamenwe inzoga zitujuje ubuziranenge.

Umuyobozi w’Ishami rishinzwe ubuzima bwo mu mutwe muri RBC Dr. Jean Damascene Iyamuremye, yavuze ko gukoresha ibiyobyabwenge byangiza ubuzima bw’ubifata, bikadindiza iterambere ry’Igihugu.

Ati : “Uretse ibyerekeranye n’indwara zo mu mutwe ndetse n’iz’umubiri, ikoreshwa ry’ibiyobyabwenge uretse kuzahaza umuntu ribangamira n’iterambere muri rusange, kubera ko wa muntu wakoresheje ibiyobyabwenge nta kintu kimuteza imbere ndetse akabangamira n’iterambere ry’igihugu”.

Mu butumwa bwatanzwe kandi havuzwe ko ibiyobyabwenge byiganje mu rubyiruko, bityo Leta ikaba irushaho kwegereza abantu ibigo byihariye mu gufasha abagizwe imbata n’ibiyobyabwenge.

Bimwe muri byo ni Ishami rishinzwe kurwanya ibiyobyabwenge muri Polisi y’u Rwanda, Ishami rishinzwe kurwanya ibiyobyabwenge muri RBC, itegeko rigena urutonde rw’ibiyobyabwenge Club zirwanya ibiyobyabwenge mu bigo by’amashuri, bigo Ngororamuco  n’ibindi.

Bamwe mu baturage bo mu Karere ka Gisagara bavuga ko mu Murenge wa Mugombwa hari ibiyobyabwenge byiganjemo ibyitwa ibibuni n’ibikwangari, byangiza cyane uwamaze kubinywa, bikamugiraho ingaruka, ku buryo bifuza ko izo nzoga zitujuje ubuziranenge zahagarara.

Guverineri w’Intara y’Amajyepfo Kayitesi Alice, yashimiye Minisiteri y’Ubuzima n’abafatanyabikorwa mu rugamba rwo kurwanya ibiyobyabwenge, kandi avuga ko nk’ubuyobozi bazakomeza kurwanya ko abantu bakomeza kugirwaho ingaruka n’ikoreshwa ry’ibiyobyabwenge.

Ati: “Ibiyobyabwenge byica ubuzima bwabo, byangiza ubuzima bwabo,  bihagarika iterambere ryabo. N’umyweye ajye anywa urwagwa rw’ibitoki  rube ari urwagwa rwujuje ibisabwa rutenze mu buryo bw’ibiyobyabwenge cyangwa izo nzoga z’inkorano cyangwa nikiba n’ikigage kibe cyujuje ibisabwa”.

Ubushakashatsi bwakozwe na Minisiteri y’Ubuzima mu mwaka wa 2018  bwagaragaje ko 1, 2% by’Abanyarwanda bari hagati y’imyaka 24 na 65 bari bafite uburwayi bwo gukoresha inzoga nyinshi (ubusinzi); 0,3% bari bafite ikibazo cy’uburwayi buterwa no gukoresha ibiyobyabwenge.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA