Ibizamini by’Ababaruramari b’Umwuga mu Rwanda bigiye gushyirwa ku ikoranabuhanga
Amakuru

Ibizamini by’Ababaruramari b’Umwuga mu Rwanda bigiye gushyirwa ku ikoranabuhanga

Imvaho Nshya

October 25, 2023

Ubuyobozi bw’Urugaga rw’Ababaruramari b’Umwuga mu Rwanda (ICPAR) bwatangaje ko bugiye gutangiza uburyo bw’ikoranabuhanga ryorohereza ababaruramari bashaka kuba ab’umwuga mu gihugu kwinjira mu rugaga.

Ibi byatangajwe mu kiganiro ICPAR yagiranye n’abanyamakuru cyabaye ku wa 24 Ukwakira 2023 mu Karere ka Rusizi, ubwo hizihizwaga imyaka 15 ICPAR imaze itangiye gufasha Abanyarwanda.

Perezida akaba n’Umuyobozi w’Inama Nyobozi ya ICPAR Biraro R. Obadiah, yagarutse ku rugendo rw’imyaka 15 ishize ya ICPAR yemeza ko hari byinshi bimaze gukorwa ariko bafite n’aho bagomba kugera kandi bazahagera bijyanye n’icyerekezo cy’Igihugu cyane hifashishijwe ikoranabuhanga.

Yavuze ko mu Rwanda mu myaka ya mbere ya 2000 wasangaga Ababaruramari batarenze 3 bigatuma Igihugu kitihuta mu iterambere, ndetse hakiri imbogamizi ku bashoramari kuko nta bakozi bari bizewe mu ibaruramari bari bahari.

Ariko ubu ngo ababaruramari b’umwuga bararushaho kwiyongera umunsi ku munsi ndetse n’abashoramari na bon go ni ko biyongera kuko baba bizeye imicungire y’ibyabo.

Yagize ati: “Ubwo twatangiraga mu 2008 aari Ababaruramari 98 gusa, kuri ubu tumaze kugira 992. Ni urugendo twakoze rutari rworoshye, ubu barakora mu bigo bitandukanye mu gihugu haba muri Leta cyangwa mu byigenga ni bimwe mu byo twishimira.”

Perezida akaba n’Umuyobozi w’Inama Nyobozi ya ICPAR mu Rwanda Biraro Obadiah

Yakomeje avuga ko bifuza kugira Ababaruramari b’umwuga bagera ku bihumbi 10 kandi ibi bazabigeraho bifashishije ikoranabuhanga mu myaka igiye kuza.

Miramago Amin,  Umuyobozi Mukuru (CEO) wa ICPAR, yavuze ko bateganya kwifashisha murandasi nk’uburyo buzorohereza abifuza gukora ibizamini bibinjiza mu Babaruramari b’Umwuga bitabagoye ndetse n’abifuza kwiga.

Yagize ati: “Kugira ngo umubare wiyongere ni uko serivisi zose dutanga zaba zorohereye buri wese kuzigeraho, akazisaba mu mwanya we bitabangamiye akazi cyangwa aho aherereye aandi igihe abishakiye. Turi kubaka ikoranabuhanga ku buryo ushaka gukora ibizamini azajya abikorera ku machini ye bitamusabye gukora ingendo.”

Amasomo yose ya CPA na CAT n’ibizamini byose nibijya kuri murandasi bikaba byoroheye buri wese bizatuma tugira abatugana benshi, amafaranga asabwa azagabanyuka ndetse babone umwanya wo gukorana natwe bitabasabye kuva mu byo bakoraga.”

Miramago Amin yavuze ko iyi gahunda biteganyijwe ko itangira vuba ndetse iri mu mavugurura ya nyuma y’imyaka 15 bafasha Igihugu kugira Ababaruramari b’Umwuga ndetse n’abanyamwuga mu bijyanye no gucunga imari.

Mu bindi ICPAR yishimira muri iyi myaka 15 ishize harimo kuba abiga ibaruramari baravuye ku 165 bakagera ku 6730, kuba yarabaye abanyamuryango b’Ihuriro Mpuzamahanga ry’ababaruramari b’Umwuga (International Federation of Accountants IFAC) no kugira uruhare mu ishingwa ry’Ihuriro Nyafurika ry’Abaruramari b’Umwuga (PAFA).

Mirango avuga ko ibi byose byahaye amahirwe u Rwanda bituma rwizerwa nk’Igihugu washoramo imari ndetse n’Abanyarwanda by’umwihariko abanyamwuga aho byatanze akazi kenshi n’umushahara ukikuba kubera ko bakora ibyo bize hakiyongeraho kwizerwa mu ruhando mpuzamahanga.

Ubuyobozi bwa ICPAR kuri ubu burashima Leta y’u Rwanda aho binyuze muri Minisiteri y’Imari n’Igenamigambi ibikorwa byabo byakorwa neza ngo kongera umubare w’abaruramari bizabafasha gufasha Abakozi ba Leta ndetse no gufasha Ishoramari ry’abikorera ku buryo ubukungu n’iterambere bizarushaho kuzamuka bigizweho uruhare n’abanyamwuga.

Miramago Amin,  Umuyobozi Mukuru wa ICPAR

NTAWITONDA JEAN CLAUDE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA