Ibyemezo by’Inama y’Abaminisitiri yo ku wa Mbere Kanama 2023
Amakuru

Ibyemezo by’Inama y’Abaminisitiri yo ku wa Mbere Kanama 2023

Imvaho Nshya

August 2, 2023

Ku wa Kabiri taliki ya 1 Kanama 2023, Inama y’Abaminisitiri yateraniye muri Village Urugwiro iyobowe na Nyakubahwa Perezida wa Repubulika y’u Rwanda Paul Kagame.

1. Inama y’Abaminisitiri yemeje imyanzuro y’Inama y’Abaminisitiri yateranye ku wa 13 Nyakanga 2023. 

2. Mu rwego rwo kunoza imitunganyirize n’imikorere y’ibikorwa by’imyidagaduro mu masaha y’ijoro no gukumira urusaku rubangamira umudendezo w’Abaturarwanda, Inama y’Abaminisitiri yemeje ko guhera ku itariki ya 1 Nzeri 2023, ibikorwa na serivisi byose bitari iby’ingenzi bizajya bifunga saa saba z’ijoro (01:00 AM) mu minsi y’imibyizi na ho mu mpera z’icyumweru (ku wa Gatanu no ku wa Gatandatu) bikazajya bifunga saa munani z’ijoro (02:00 AM). Ibikorwa byose, byaba iby’ubucuruzi cyangwa iby’imyidagaduro bizakenera gukomeza gufungura nyuma y’ayo masaha bizajya bihabwa uruhushya hashingiwe ku mabwiriza azatangwa n’Urwego rushinzwe Iterambere mu Rwanda (RDB).

3. Inama y’Abaminisitiri yemeje imishinga y’amategeko ikurikira: 

● Umushinga w’itegeko rigenga kwegurira umutungo wa Leta abikorera;

● Umushinga w’Itegeko ryemera kwemeza burundu amasezerano y’inguzanyo hagati ya Repubulika y’u Rwanda na Banki Nyafurika Itsura Amajyambere nk’ikigo gishinzwe ishyirwa mu bikorwa ry’imishinga iterwa inkunga n’ikigega kigamije guhangana n’imihindagurikire y’ibihe, yerekeranye n’inguzanyo igenewe gahunda y’iterambere ry’ubuhinzi bw’ibiti bivangwa n’imyaka hagamijwe guteza imbere ubuhinzi burambye mu Rwanda yashyiriweho umukono i Kigali, mu Rwanda. 

● Umushinga w’Itegeko ryemera kwemeza burundu amasezerano y’impano hagati ya Repubulika y’u Rwanda na Banki  Nyafurika Itsura Amajyambere nk’Ikigo gishinzwe ishyirwa mu bikorwa ry’imishinga iterwa inkunga n’Ikigega kigamije guhangana n’imihindagurikire y’ibihe, yerekeranye n’impano igenewe gahunda y’iterambere ry’ubuhinzi bw’ibiti bivangwa n’imyaka hagamijwe guteza imbere ubuhinzi burambye mu Rwanda yashyiriweho umukono i Kigali, mu Rwanda. 

4. Inama y’Abaminisitiri yemeje amasezerano yerekeranye n’umutekano w’ibikorwa remezo bya internet (Convention on the Packet Clearing House Organization). 

5. Inama y’Abaminisitiri yemeje Amateka akurikira: 

● Iteka rya Perezida ryerekeye Komite y’Umutekano ku rwego rw’Intara, urw’Umujyi wa Kigali, urw’Akarere n’urw’Umurenge.

• Iteka rya Minisitiri w’Intebe rigena imbonerahamwe y’imyanya y’imirimo y’Ikigo gishinzwe Kugenzura Ibiribwa n’Imiti mu Rwanda (Rwanda FDA).

• Iteka rya Minisitiri rishyiraho ibyicaro by’uturere.

• Iteka rya Minisitiri ryegurira ubutaka bwa Leta buri mu mutungo bwite wayo isosiyeti y’ubucuruzi ya Leta.

6. Inama y’Abaminisitiri yemeje Amasezerano y’ubufatanye hagati ya Guverinoma y’u Rwanda na: African Super League Ltd, Time Magazine UK Ltd na Grammy Global Ventures.

7. Inama y’Abaminisitiri yemeje amasezerano akurikira:

• Amasezerano hagati ya Guverinoma y’u Rwanda na Kigali Innovation City Company Ltd

• Amasezerano y’ubugure hagati ya Guverinoma y’u Rwanda na Sosiyete yitwa UFACO Garments Ltd.

8. Inama y’Abaminisitiri yamenyeshejwe ko hagiye gusohoka inkoranyamagambo nshya y’ururimi rw’abamarenga.

9. Inama y’Abaminisitiri yemeje ko Bwana Claude Morel ahagararira Repubulika ya Seychelles mu Rwanda ku rwego rwa High Commissioner, afite icyicaro i Pretoria muri Afurika y’Epfo.

10.Inama y’Abaminisitiri yashyize mu myanya Abayobozi bakurikira:

Muri Minisiteri y’Ububanyi n’Amahanga n’Ubutwererane/MINAFFET

• CG Dan Munyuza, Ambasaderi w’u Rwanda muri Repubulika y’Abarabu ya Misiri

• Maj Gen Charles Karamba, Ambasaderi w’u Rwanda muri Repubulika Yunze Ubumwe ya Etiyopiya akaba n’Uhagarariye u Rwanda mu Muryango wa Afurika Yunze Ubumwe

• Michel Sebera, Ambasaderi w’u Rwanda muri Guinea

• Shakila Kazimbaya Umutoni, Ambasaderi w’u Rwanda mu Bwami bwa Morocco

Muri Perezidansi ya Repubulika (Office of the President/OTP) 

• Ange Kagame, Deputy Executive Director, Strategy 84 Policy Council/SPC Mu Rwego Rushinzwe Iterambere mu Rwanda (RDB)

• Setti Solomon, Chief Strategy 86 Communications Officer

Muri Minisiteri v’Ubumwe bw’Abanyarwanda n’Inshingano Mboneragihugu (MINUBUMWE)

• Francois Ngarambe, Chairman Chancellery for Heroes, National Orders and Decorations of Honor/CHENO

11. Mu bindi:

• Minisitiri w’Ubucuruzi n’Inganda yamenyesheje Inama y’Abaminisitiri ibi bikurikira:

o Kuva ku itariki ya 26 Nyakanga kugeza ku ya 15 Kanama 2023, i Gikondo harimo kubera imurikagurisha mpuzamahanga ku nshuro ya 26.

o Kuva ku itariki ya 15 kugeza ku ya 17 Kanama 2023, i Kigali hateganyijwe inama mpuzamahanga yiga ku iterambere ry’ubucuruzi yiswe Golden Business Forum.

• Minisitiri w’Uburezi yamenyesheje Inama y’Abaminisitiri ko kuva ku itariki ya 17 kugeza ku ya 27 Kanama 2023, u Rwanda ruzakira imikino ihuza ibigo by’amashuri muri Afurika y’Iburasirazuba (FEASSSA), izabera mu Karere ka Huye na Gisagara.

• Minisitiri w’Ibikorwa Remezo yamenyesheje Inama y’Abaminisitiri ko kuva ku itariki ya 30 Kanama kugeza ku ya Mbere Nzeri 2023, u Rwanda ruzakira inama y’Ihuriro Mpuzamahanga ku mikoreshereze y’ingufu zikomoka ku mirasire y’izuba (ISA), Komite y’Akarere k’Afurika.

Bikorewe i Kigali, tariki ya Mbere Kanama 2023.

Dr. Edouard Ngirente

Minisitiri w’Intebe

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA