Hakomojwe ku cyakorwa ngo ubumwe bw’Abanyarwanda bugere ku 100%
Amakuru

Hakomojwe ku cyakorwa ngo ubumwe bw’Abanyarwanda bugere ku 100%

Imvaho Nshya

October 17, 2023

Minisiteri y’Ubumwe bw’Abanyarwanda n’Inshingano Mboneragihugu (MINUBUMWE) yatangaje ko kuba Ubumwe bw’Abanyarwanda butaragera ku kigero cy’ijana ku ijana bikiri imbogamizi, igaragaza ko hakwiye gufatwa ingamba zituma ubumwe bw’Abanyarwanda butabangamirwa.

Iyo Minisiteri yabikomojeho kuri uyu wa Kabiri tariki ya 17 Ukwakira 2023, mu nama nyunguranabitekerezo yayihuje n’Abanyamadini n’Amatotero hareberwa hamwe intambwe imaze guterwa mu kwimakaza ubumwe n’ubudaheranwa bw’Abanyarwanda, inzitizi zikigaragara ndetse n’ingamba zikwiye gufatwa.

Minisitiri w’Ubumwe bw’Abanyarwanda n’Inshingano Mboneragihugu Dr Bizimana Jean Damascene, yavuze ko ubushakashatsi bw’igipimo cy’ ubumwe n’ubwiyunge mu Banyarwanda (Rwanda reconciliation Barometer) bwo mu 2020, bwagaragaje ko ubumwe bw’Abanyarwanda bugeze ku kigero cya 94.7%.

Yibukije ko muri 6% gasigaye ari ho  hakigaragaramo ibikorwa bibi by’ingengabitekerezo  ya Jenocide.

Ati: “N’iyo musomye ku mbuga nkoranyambaga hari abavuga bati, ko tukibona ibikorwa biremereye cyane bibangamiye ubumwe bw’Abanyarwanda, birimo ubwicanyi, kwangiza amatungo n’imyaka by’abantu, inyandiko zirimo urwango ruremereye, iyo mibare muvuga ntiri hejuru cyane kuruta uko ukuri kumeze? Icyo na cyo ni ukukireba kuko ushobora gusanga ka 6% gasigaye ariko karimo ibikorwa bibi bifite uburemere bubangamiye ubumwe bw’Abanyarwanda”.

Yibukije ko hakwiye gufatwa ingamba zihamye zo kugabanya iyo 6% kugira ngo hatazabaho kwirara bikagenda bizamuka.

Asaba ko havugishwa ukuri kugira ngo harebwe ibibangamiye ubumwe bw’Abanyarwanda nyakuri bituma indangagaciro y’ubudaherarwa itera Abanyarwanda gusohoka mu bikomere by’amateka itagerwaho.

Abanyamadini n’Amatorero bagaragaje ko bafite inshingano zo kubaka ubumwe, ubudaheranwa n’ibikorwa bifasha mu isanamitima himakazwa urukundo mu Banyarwanda.

Ndayizeye Isaie, Umushumba Mukuru w’Itorero rya ADPR mu Rwanda, yagize ati:”Umukirisitu w’Umunyarwanda ubuzima bwe bukwiye kuba bushingiye ku gukunda igihugu. Amatorero n’amadini afite inshingano yo kuvuga ubutumwa  mu Rwanda kandi ubutumwa bwiza bukwiye kuba busubiza ibibazo duhura na byo buri munsi. Kubaka ubumwe, ubudaheranwa n’ibikorwa bifasha mu isanamitima birashingira ku mateka y’u Rwanda, rero kuyirengagiza twaba turi kuvuga ubutumwa butuzuye nk’Abanyarwanda.”

Yakomeje ashimangira ko amadini n’amatorero yose akwiye gushyiraho umurongo w’ibikorwa bifasha mu bumwe, ubudaheranwa n’isanamitima, bityo kubakira ku rukundo bikajya hejuru y’ibindi byose.

Padiri Nsengiyumva Emmanuel na we yavuze ko imbaraga z’imyemerere zidakwiye kuba imbogamizi y’Ubumwe n’ubudaheranwa bw’Abanyarwanda.

Ati: “Ni gute kuba umuyoboke w’idini runaka bimpa inshingano zo gusigasira buri muntu wese by’umwihariko Umunyarwanda n’indangagaciro z’Abanyarwanda? Icyo ni ikibazo amadini n’amatorero tugomba kwigaho tukabonera umuti mu buryo bwihutirwa kuko hari ibyonnyi bishaka kuza kandi hari ibyo tugomba gusigasira nk’Abanyarwanda.”

Imibare igaragaza igipimo cy’ubumwe n’ubwiyunge yatangajwe mu mwaka wa 2020 yerekanaga ko cyageze kuri  94.7% kivuye kuri 92.5% mu mwaka wa 2015, mu gihe mu mwaka wa 2010 cyari 82.3%.

Minisitiri Dr. Bizimana yibukije abantu ko bakwiye guharanira gukira ibikomere by’amateka ntibigumye kubaherana.

Ubu bushakashatsi bwagaragaje ko abaturage bishimiye uruhare rw’itangazamakuru mu guteza imbere ubumwe n’ubwiyunge ku kigero cya 84.9% bivuye kuri 73.1%mu mwaka wa 2015.

Bwanerekanye ko ukuri ku mateka no guhana ibyaha bifitanye isano na Jenocide biri ku kigero cya 98.3% bivuye kuri 94.4% mu mwaka wa 2015.

Naho gusaba imbabazi no kuzitanga biri kuri 95.8% bivuye kuri 93.7%, mu gihe gukira ibikomere ku muntu ku giti cye biri kuri 86.7% bivuye kuri 88.6% mu mwaka wa 2015.

KAMALIZA AGNES

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA