Igitera ubwiyongere bw’abangavu baterwa inda mu Rwanda
Amakuru

Igitera ubwiyongere bw’abangavu baterwa inda mu Rwanda

Imvaho Nshya

October 12, 2023

Ihuriro ry’imiryango itari iya Leta iharanira uburenganzira bwa muntu mu Rwanda (CLADHO) ivuga ko hari impamvu zituma umubare w’abana b’abakobwa baterwa inda wiyongera.

Minisiteri y’Uburinganire n’Iterambere ry’Umuryango (MIGEPROF) iherutse gutangaza ko kuva muri Nyakanga kugera mu Ukuboza 2022, abakobwa ibihumbi 13 bari munsi y’imyaka 19 ari bo batewe inda imburagihe mu Rwanda.

Murwanashyaka Evariste Umuhuzabikorwa wa CLADHO, mu kiganiro kihariye yahaye Imvaho Nshya yahamya ko ikibazo cyo gutera abana inda kigihari kandi ko imibare ikiyongera uko imyaka ishira kuko ngo aho kugira ngo igabanyuke ahubwo iriyongera.

Iki kibazo avuga ko gikomeye kuko ngo imbogamizi ikomeye cyane ihari, ari iy’uko umwana utewe inda ahita ava mu ishuri.

Kubona ubutabera na byo ni ikibazo kuko abana batewe inda bahabwa ubutabera ngo baracyari bakeya.

Agira ati: “Ibirego biri mu nkiko ni bike kubera ko habuze amakuru, abana ntibatanga amakuru, ababatera inda barabashuka bagashuka imiryango yabo bakabatera ubwoba mu by’ukuri ugasanga ubutabera burabuze. Icyo giteza umurindi mu kwiyongera kuri iki cyaha cyo gusambanya abana no kubatera inda”.

Murwanashyaka avuga ko ikindi kibitera ari uguhishira, kutabona amakuru no kuba n’ababashije kugera mu nkiko batabona indishyi.

Asobanura ko iki ari icyaha gikwiye gutangirwa indishyi ariko ngo iyo umwana nta ndishyi abonye ahitamo kutarega uwamuhohoteye.

Agira ati: “Icyo dusaba Leta n’uko yashyira ingufu nyinshi cyane mu bukangurambaga bugamije gukumira, hagashyirwamo ingengo y’imari […] uturere tugakora tukabigira ibyatwo mu gufasha abahuye n’ihohoterwa”.

Murwanashyaka Evariste Umuhuzabikorwa wa CLADHO

Akomeza avuga ati: “Impamvu bifata indi ntera mbere na mbere bano bana baterwa inda, imyaka baba bagezemo ibemerera kuba bashukika ku buryo bworoshye.

Babuze kuba ababyeyi babo bababa hafi kugira ngo bababwire ngo imyaka murimo mukwiye kwitwara gutya”.

CLADHO itangaza ko ikindi gitera ubwiyongere bw’iyi mibare ari ukutabona ubutabera bwuzuye ibyo ngo bigatuma abantu babifata nk’icyaha gisanzwe.

Umuhuzabikorwa wa CLADHO, Murwanashyaka, atunga agatoki inzego z’ibanze mu kugira intege nke mu cyaha cy’ihohoterwa rishingiye ku gitsina rikorerwa abana b’abakobwa.

Ati “Intege nke zibamo kubera ko niba tuvuga ngo amakuru yarabuze kandi umwana yaratwariye inda mu Mudugudu, mu Isibo kuvuga ngo habuze umuntu wamuteye inda, ntabwo byumvikana”.

Yongeraho ko ubukangurambaga bukorwa hasi ari bukeya ahubwo ngo ugasanga ingufu nyinshi zashyizwemo n’Umujyi wa Kigali n’inzego ku rwego rw’igihugu ari zo zirimo gukora ubukangurambaga kurusha uko byakorwa mu nzego zo hasi.

Uruhare rwa Sosiyete Sivili mu guhangana n’iki kibazo, Murwanashyaka ashimangira ko ari ugufasha abana kubona ubutabera.

Ati: “Niba hari abakeneye abunganizi tukababaha ariko tugakora n’ubukangurambaga bugamije kugira ngo dukumire. Igikwiye gukorwa ni ubufatanye bwa twese tukamenya uriya mwana watewe inda yayitewe na nde?

Hakabaho gukora k’ubutabera no gutanga amakuru, ntihabeho guhishira kw’ababyeyi, abana bagatinyuka bakavuga ibyababayeho kugira ngo ubutabera bukore akazi kabwo”.

CLADHO isanga hakwiye gushyirwa ingufu mu gukumira kugira ngo iyi mibare ikomeza kwiyongera, igabanuke.

Ihuriro ry’imiryango itari iya Leta iharanira uburenganzira bwa muntu mu Rwanda ritangaje ibi, mu gihe Urwego rw’Igihugu  rw’Ubugenzacyaha (RIB) rukomeje ubukangurambaga ku ruhare rw’abayobozi b’Inzego z’ibanze mu kurwanya ibyaha by’ihohoterwa rishingiye ku gitsina n’irikorerwa abana.

Intara y’Iburasirazuba ni yo iyoboye izindi mu kugira umubare munini w’abana baterwa inda buri mwaka.

Imibare ya 2021 igaragaza ko mu gihugu hose abakobwa ibihumbi 23 aribo batewe inda imburagihe bari munsi y’imyaka 18 harimo 9,188 bo muri iyi Ntara.

Uturere dufite abakobwa babyaye benshi muri uwo mwaka, ni Nyagatare ifite 904, Gatsibo ifite 892 na Bugesera ifite 689.

KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA