Ihame ry’uburinganire rireba buri wese – Prof. Bayisenge
Amakuru

Ihame ry’uburinganire rireba buri wese – Prof. Bayisenge

NTAWITONDA JEAN CLAUDE

August 1, 2023

Minisitiri w’Uburinganire n’Iterambere ry’Umuryango Prof Bayisenge Jeannette  yibukije ko ihame ry’uburinganire rireba buri wese, yabigarutseho ubwo  hizihizwaga Umunsi nyafurika w’umugore kuri uyu wa Mbere tariki ya 31 Nyakanga 2023.

Yagize ati: “Ihame ry’uburinganire rireba buri wese kuko ni uburenganzira bwa muntu, yaba umugore, yaba umugabo, kandi kugira ngo bigerweho ntibireba urwego rumwe, bireba buri wese, ikindi ntibireba inzego za Leta gusa yaba ari Minisiteri ibishinzwe n’izindi nzego bakorana ahubwo bireba abikorera, Imiryango itegamiye kuri Leta kuko iyo imbaraga zihurijwe hamwe ni bwo dushobora no kubona umusaruro”.

Yakomeje atangaza ko umugore ageze ahantu hashimishije mu bijyanye n’uburinganire.

Ati: “Umugore ageze ahashimishije, ahagaze neza, hari byinshi byo kwishimira, umugore ari mu nzego zifata ibyemezo kuko atarimo hashobora gufatirwa ibyemezo bimubangamiye cyangwa se bidasobanura ikibazo afite… turashima ko abagore bari mu nzego guhera mu nzego zo hejuru kugeza mu zo hasi.  Mu burezi, umwana w’umukobwa  ariga, [….] umugore ariga,  siyanse na tekinike byagiye kenshi bigaragara ko  harimo icyuho, ariko igihugu gishyiramo imbaraga”.

Umuyobozi Wungirije wa Pan-African Movement (PAM) , Twagirayezu Epimaque na we yahamije ko ihame ry’uburinganire risaba  gukorera hamwe.

Ati: “Ihame ry’uburinganire risaba gukorera hamwe, ni cyo cya mbere. PAM Rwanda yifuza ko buri Munyafurika agira uruhare mu gusubiza ibibazo Abanyafurika bahura na byo.

Imyaka 20 irashize hagiyeho amasezerano ya Maputo, turizihiza ku nshuro ya 20 Umunsi w’umugore w’Umunyafurika, hari Bimwe twagombye kubonera ibisubizo,[ ….] haracyagaragara ihohoterwa rikorerwa abagore n’abana”.

Umuyobozi wa GMO Gender Monitoring Office, Rose Rwabihihi yavuze ko hadakwiye kwirebaho nk’Abanyarwanda gusa, ahubwo ko muri Afurika hari Ibibazo bikibangamiye uburenganzira kandi byakemuka.

Ati: “Ntitwirebe nk’Abanyarwanda gusa, kuri Afurika  hari ibyo kwishimirwa mu buryo Afurika yashyizeho amasezerano, Umugore uko yari ameze byarahindutse, itegeko rivuga ko abagore bakwiye amahirwe angana n’ay’abagabo. Nko mu bukungu wasangaga Umugore atemerewe kuzungura, atemerewe kugira konti.  Ibihugu 50%  gusa muri Afurika byemeje  ko hakwiye kuba ibihembo kimwe ku murimo umwe”.

Yagarutse ku ntambwe yatewe aho abagore ari benshi mu nzego zifata ibyemezo, atanga urugero ko u Rwanda ari urwa mbere ku Isi kugira umubare munini w’abagore mu Nteko Ishinga Amategeko,  muri Guverinoma  abagore bari ku kigero cya 55% n’ubwo hagiye habamo impinduka bakaba bageze kuri 45%…

Abandi bafashe ijambo mu kwizihiza uyu munsi nyafurika w’umugore bavuze ko intambwe yatewe ishimishije n’ubwo hakiri imbogamizi, ariko bizakomeza kugenda biganirwaho, hagashakwa ibisubizo.

Yanditswe na NYIRANEZAJUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA