Ikawa y’u Rwanda yatangiye gucuruzwa mu iguriro rikomeye muri UK
Amakuru

Ikawa y’u Rwanda yatangiye gucuruzwa mu iguriro rikomeye muri UK

Imvaho Nshya

October 16, 2023

“Ishema!!” Ni jambo ryashimangiwe n’Ambasaderi w’u Rwanda mu Bwongereza Busingye Johnston, ubwo yasangizaga abamukurukira ku mbuga nkoranyambaga ko guhera ku Cyumweru tariki ya 15 Ukwakira 2023, ikawa itunganywa n’Uruganda rwa Kibirizi yatangiye gucuruzwa mu iguriro rikomeye mu Bwami bw’u Bwongereza (UK) ryitwa Waitrose.

Yagize ati: “Waitrose ni ihahiro rifite amashami arenga 300 mu gihugu cy’u Bwongereza, rinagurisha rikanohereza ibintu hakoreshejwe ikoranabuhanga.”

Iryo guriro cyangwa ihahiro rya kijyambere rifite amateka abarirwa mu imyaka ikabakaba 120 kuko ryatangiye mu 1904 ari iguriro riciriritse ry’ibiribwa, ryashinzwe na Wallace Waite, Arthur Rose na David Taylor. Icyo gihe ryitwaga Waite, Rose & Taylor, ariko nyuma izina riza kugirwa rigufi riba Waitrose.

Mu mwaka wa 1937 ryaje kugurwa na John Lewis Partnership akomeza kuricururizaho ibiribwa bitandukanye. Muri uyu mwaka, rimaze kugira amashami 329 mu Bwongereza hose ndetse no mu Birwa byo mu mazi y’ahitwa Channel.

Ni iguriro kandi rinafite amaguriro aciriritse agera kuri 65, bikaba birigira iguriro rya 12 mu maguriro agezweho akomeye mu Bwami bw’u Bwongereza, rikaba rinafite umwihariko w’uko ibicuruzwa byaryo byoherezwa mu bihugu bisaga 52 ndetse ryatangiye kwagura amahami mu Burasirazuba bwo hagati.

Kuri ubu Ikawa itunganya n’Uruganda rwa Kibirizi ruherereye mu Karere ka Nyamagabe yatangiye kuboneka muri ayo maguriro ku nshuro ya mbere.

Biteganyijwe ko iyo kawa ikaranze yakwirakwijwe ku bwinshi mu Bwongereza ikaba yatangiye gucururizwa hamwe n’ibindi birungo byayo birimo Espresso, “Bourbon Cream and Fruit & Nut” n’ibindi.

Uruganda rw’ikawa rwa Kibirizi rugemurirwa n’abahinzi b’ikawa 1,130 aho buri wese muri bo afite ubutaka buri munsi ya hegitari ahingaho.

Buri muhinzi akurikirana ibiti bye byeraho ikawa hamwe n’imbuto ndetse n’imboga mu mirima yabo, aiko Koperative bahuriramo ikabafasha mu kubongerera ubumenyi n’ubushobozi binyuze mu mahugurwa, inguzanyo ndetse no kwimakaza uburinganire muri urwo rwego.

Umuyobozi Mukuru wa Pact Coffee yatangiye guhuza abo bahinzi n’iguriro rya Waitrose, yagize ati: “Mbere na mbere, ndagira ngo nshimangire ko ibi bikorwa si iby’ubugiraneza. Kubera ko abo bahinzi bari ahantu ushobora kubona ikawa ya mbere iryoshye ku Isi, kandi ni urwego rw’ubuziranenge bitakorohera kubona ahandi hose mu maguriro yo mu Bwongereza.”

Yakomeje agira ati: “Ariko igiciro tuguraho iyo kawa kigira uruhare rukomeye mu kurushaho kunoza imibereho y’abahinzi bahurira kuri urwo ruganda. Mu Rwanda, ikawa ishobora kuba umusemburo w’impinduka mu bukungu, kandi tunejejwe no kuba dufite Waitrose nk’umufanyabikorwa muri ubwo butumwa.”

Biteganyijwe ko garama 200 z’ikawa ya mbere  izaba igura Amapawundi 6.95, ni ukuvuga amafaranga y’u Rwanda asaga 10,000. Biteganyijwe kandi ko hatangwa poromosiyo yo gukaturirwa 20% guhera kuri uyu wa Mbere taliki ya 16 Ukwakira kuzageza ku ya 28 Ugushyingo nk’uko byatangajwe na Bdaily.

Ikawa y’u Rwanda ikunzwe ku Isi yose bitewe n’umwihariko ifite mu buryohe no mu buziranenge

NTAWITONDA JEAN CLAUDE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA