Imihanda ya kaburimbo irahindura imibereho n’isura y’Umujyi wa Ruhango
Amakuru

Imihanda ya kaburimbo irahindura imibereho n’isura y’Umujyi wa Ruhango

Imvaho Nshya

September 18, 2023

Bamwe mu baturage bakorera ndetse n’abagenderera Umujyi wa Ruhango baravuga ko nyuma y’imihanda ya kaburimbo yubatswe yahinduye icyerekezo cy’uyu mujyi binatuma abahafite inzu batangira kuyasana bayajyanisha n’Igishushanyombonera cy’uyu mujyi.

Mugabe Leonard avuga ko imihanda yubatswe yahinduye ubwiza bw’umujyi ndetse binafasha ubuyobozi gusobanura neza uko umujyi wa Ruhango wifuzwa wagombye kumera.

Yagize ati: “Iyi mihanda yubakwa abantu babonyemo akazi biteje imbere kuko Akarere kasabye rwiyemezamirimo guha akazi abatuye hano mu mujyi ndetse abantu babasha gusobanurirwa ibyifuzwa kugirango umujyi ugire isura nziza nuko ukwiye kuba umeze kandi uteye imbere”.

Mukarukundo Mediatrice avuga ko bashimira ubuyobozi bwabahaye umuhanda wa kaburimbo utarubakwa wabonaga uyu mujyi warasigaye inyuma bakemeza ko iyi mihanda yatumye habaho impinduka abahafite inzu zishaje bikubita agashyi batangira kuvugurura.

Yagize ati: “Turashimira Leta yacu kubera uyu muhanda baduhaye kuko batarawubaka wabonaga twarasigaye inyuma ariko kuva batangiza ibikorwa byo kubaka iyi mihanda byatumye habaho impinduka n’abahafite inzu babasha gutekereza kuyavugurura bijyanisha nuko bifuza bagendeye ku nyigo zagiye zikorwa nuko inzu zihari zifuzwa zigomba kuba zubatse”.

Mugenzi Theobald yemeza ko ibice byagejejwemo imihanda ya Kaburimbo yahahinduriye isura ndetse biragaragara ko inzu zagize agaciro cyane ariko turasaba ko n’iyi mihanda y’amabuye yubatswe kera yasenywa nayo igashyirwamo kaburimbo kuko yanatangiye kwangirika.

Yagize ati: “Batarubaka iyi mihanda wabonaga aha nta cyerekezo gihari ariko aho umuhanda umaze kuhagerera bigaragara ko ibiciro by’inzu  byazamutse inzu zigira agaciro ariko hari uduce tukigaragaramo imihanda y’amabuye nayo yubatswemo kaburimbo  yatanga isura nziza yaho iri,  iyubakishijwe amabuye ubona ko yatangiye gusenyuka ariko bashyizemo Kaburimbo byatuma n’inzu zaho zigira agaciro nazo abantu bakazikoreramo”.

Abaturage b’Akarere ka Ruhango bishimira ko iihanda ya kaburimo bikomeje kubahindurira imibereho

Umuyobozi w’Akarere ka Ruhango, Habarurema Valens avuga ko iyi mihanda yubatswe yahinduye ubwiza bw’uyu mujyi ndetse bamwe mu bahafite inzu batangiye ibikorwa byo kuzivugurura bibwirije kuko bari bamaze kubona ko umuhanda uhageze.

Yongeyeho kandi ko  batazahagarara nubwo amafaranga baba barateganyije aba ari make ariko no muri iyi ngengo y’imari ya 2023-2024 hateganywa kubaka ibindi bilometero 4,5 bizatuma umujyi ukomeza kwaguka abantu bagashora imari ndetse abandi bakubaka inzu zigezweho.

Ati: “Turashimira cyane abaturage bacu kuko bagerageza kumva icyo tubashakaho kandi bakagirakorana ingonga bakumva ko ibyo dukora nk’ubuyobozi biri mu nyungu zabo. Natwe ibyo badusabye tugerageza kubibaha no gufatira hamwe ingamba zo kurarikira kugera ku iterambere ry’uyu mujyi ridasigana n’iterambere ryabo n’imiryango yabo”.

Meya Habarurema asaba abaturage ko ushaka gusaba icyangombwa cyo gusana inzu ye akaba yujuje ibisabwa byose ashobora kukirarana mu munsi umwe hagamijwe kubafasha kwihutisha imirimo yabo, ndetse hari n’abatangiye kwegeranya ubushobozi bagiye gutangira ibokorwa byo kubaka amahoteri atandukanye.

Iyi mihanda yubatswe ingana n’ikilometero 1,2 ikaba yaratwaye asaga miliyoni 900 ndetse uburebure bwose bukaba bucaniye amatara kandi harateganywa kubakwa undi muhanda wa Kibingo-Karambo- Buhoro w’ibilometero 4.5 (4.5 Km) ndetse harimo  gukorwa izindi  nyigo z’imihanda yose izengurutse umujyi kugira ngo izakorwe umwaka utaha w’ingengo y’imari 2024-2025.

Inzu z’ubucuruzi zahise zongera agaciro ndetse hagenda hubakwa n’inshyashya

AKIMANA JEAN DE DIEU

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA