Imihigo yongerwemo n’uburyo bwo gukemura ibibazo byugarije umuryango- Dr. Uwamariya
Amakuru

Imihigo yongerwemo n’uburyo bwo gukemura ibibazo byugarije umuryango- Dr. Uwamariya

Imvaho Nshya

September 15, 2023

Minisitiri w’Uburinganire n’Iterambere ry’Umuryango Dr. Uwamariya Valentine yayoboye Inama Mpuzabikorwa y’Intara y’Iburengerazuba yateraniye mu Karere ka Rusizi igamije kurebera hamwe ishyirwa mu bikorwa ry’ingamba zafashwe mu gukemura  ibibazo byugarije umuryango, asaba ko mu mihigo hashyirwamo uburyo bwo kubikemura.

 Dr. Uwamariya yagize ati: “Nk’uko umuryango ari ishingiro ry’imbaga y’Abanyarwanda, ibibazo bibangamiye umuryango bikwiye gushyirwa mu mihigo y’ibikorwa byacu twesa bya buri munsi, tukabikurikirana umunsi ku wundi, tugasaba abaturage kubigira ibyabo kandi tukajya duhana amakuru mu buryo bunoze”.

Minisitiri Dr. Uwamariya yakomeje  agaragaza ko mu Ntara hakiri ibibazo byugarije umuryango avuga zimwe mu ngamba zafatwa harimo gushyira mu mihigo ya buri munsi gukemura ibibazo bibangamiye umuryango, kunoza imikorere n’imikoranire n’abafatanyabikorwa batandukanye, gushishikariza imiryango kubana mu buryo bwemewe n’amategeko.

Kurwanya igwingira n’imirire mibi, kurwanya ibiyobyabwenge, kwimakaza isuku no kwitabira umugoroba w’imiryango.

Minisitiri Dr. Uwamariya yasabye abayobozi n’abafatanyabikorwa mu Ntara y’Iburengerazuba  gukangurira abaturage kugira isuku n’isukura, kwigisha ababyeyi gutegura indyo yuzuye, kurwanya ubusinzi n’ikoreshwa, ry’ibiyobyabwenge, hagamijwe gushaka umuti w’ibibazo bikibangamiye umuryango.

Umunyamabanga wa Leta ushinzwe imibereho myiza muri Minisiteri y’Ubutegetsi bw’Igihugu MINALOC, Marie Solange Kayisire  yashishikarije abayobozi kongera gukora isesengura ry’ibibazo byugarije umuryango birimo igwingira, imirire mibi, ihohoterwa, gufata abana ku ngufu, abana bata ishuri n’ibindi, gushyira imbaraga mu kurandura ubukene, gushyira imbaraga muri gahunda zo kunoza isuku.

Gukumira ubusinzi n’ibiyobyabwenge kuko bifite ingaruka nyinshi, gukemura ibibazo by’abaturage; kwigiranaho, akarere gafite agashya gatanga umusaruro utundi tukakigiraho,

Kugabanya inama ahubwo bakongera ibikorwa, kandi n’ibyo bumvikanyeho mu nama nk’izi bigakorwa, kuzamura imyumvire n’uruhare rw’abaturage mu bikorwa byose.

Umuyobozi Mukuru w’Urwego rushinzwe kugenzura iyubahirizwa ry’Uburinganire n’Ubwuzuzanye bw’abagore n’abagabo mu iterambere GMO, Gatsinzi Umutoni Nadine yasabye ubufatanye mu kwandika abana bavuka ku bangavu baterwa inda bakabyara imburagihe, kuko mu bugenzuzi bwakozwe na GMO mu bihe bitandukanye bwagaragaje ko bamwe muri  abo bana batandikwa kandi biri mu burenganzira bw’ibanze.

Abayobozi batandukanye mu Ntara y’Iburengerazuba biyemeje  kurushaho gukorera hamwe bakegera abaturage kugira ngo barandure burundu ibibazo bikibangamiye umuryango, birimo kuba hari abana bagiterwa inda bakabyara bakiri bato, amakimbirane mu miryango, imirire mibi mu bana n’ibindi.

Iyo nama mpuzabikorwa ku rwego rw’Intara y’Iburengerazuba yaganiriye ku mibereho n’iterambere ry’umuryango no kurengera umwana, yitabiriwe n’Umunyamabanga wa Leta ushinzwe imibereho myiza muri Minisiteri y’Ubutegetsi bw’Igihugu MINALOC Marie Solange Kayisire, Guverineri w’Intara y’Iburengerazuba Dushimimana Lambert  n’abayobozi b’Uturere, abafatanyabikorwa n’izindi nzego.

NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA