Imishinga 15 y’urubyiruko inoza ubuhinzi yahembwe miliyoni 150 Frw
Amakuru

Imishinga 15 y’urubyiruko inoza ubuhinzi yahembwe miliyoni 150 Frw

NTAWITONDA JEAN CLAUDE

June 23, 2023

Imishinga 15 ya ba rwiyemezamirimo b’urubyiruko yegukanye akayabo ka miliyoni 150 z’amafaranga y’u Rwanda nyuma yo guhiga abandi mu marushanwa ateza imbere ubucuruzi bushingiye ku buhinzi yiswe Imali AgriBusiness Challenge. 

Iyo mishinga yahembwe ni iyatoranyijwe mu yindi isaga 1000 yatanzwe n’urubyiruko ruhanga udushya mu gutanga ibisubizo biramba kandi bigezweho muri uru rwego ruhanzwe amaso nk’isoko y’ubukire mu Rwanda. 

Buri mushinga wahawe miliyoni 10 z’amafaranga y’u Rwanda, mu gushyigikira ibikorwa by’urwo rubyiruko rwitezweho kwiteza imbere, guhangira imirimo bagenzi babo no gushyigikira iterambere ry’u Rwanda muri rusange. 

Umushinga wabaye uwa mbere ni uwitwa “Drone Innovation Rwanda”, wateguwe n’Ikigo Agrinet Rwanda Ltd cyiteguye gukora indege nto zitagira abapilote (drones) zifashishwa mu gutera imiti n’amafumbire mu bihingwa. 

Dukeshimana Patient, umwe mu basore batatu bashinze icyo kigo, yabwiye itangazamakuru ko bishimiye kubona iki gihembo kuko kigiye kubafasha gushyira mu bikorwa umushinga wabo mu kurushaho kunoza ubuhinzi bw’u Rwanda. 

Yagize ati: “Turanezerewe cyane, tugiye guhita dushyira mu bikorwa umushinga wacu. Aya ni amahirwe tubonye yo guhanga ibishya no guhangira imirimo urubyiruko bagenzi bacu.”

Aya marushanwa yateguwe n’Umuryango Imbuto Foundation, ifatanyije n’abafatanyabikorwa bayo batandukanye. 

Umuyobozi wa Imbuto Foundation Sandrine Umutoni, yashimiye abasore n’inkumi bahatanye muri aya marushanwa, asaba n’abatabashije kuboneka mu bahembwe kudacika intege bagakomeza imishinga yabo.

Yavuze ko Imali AgriBusiness Challenge, ari kimwe mu bikorwa bigize gahunda ya Imbuto Foundation yitwa “Imali, Agriculture Programme” igamije guteza imbere ishoramari rishingiye ku buhinzi no guhanga udushya muri urwo rwego.

Ni amarushanwa yateguwe  hagamijwe gukangurira urubyiruko gutanga umusanzu mu kurwanya ikibazo cy’igwingira ry’abana bato, kwihaza mu biribwa no guhanga imirimo nk’imbaraga z’Igihugu.

Minisitiri w’Ubuhinzi n’Ubworozi Dr. Musafiri Ildephonse, yashimye urubyiruko rukomeje gushora mu buhinzi

Yagize ati: “Ubuhinzi bwadufasha kwihaza mu biribwa, kuko ubu ku Isi hagaragara ikibazo cy’ibura ry’ibiribwa kandi natwe ntikidusiga; ubushakashatsi bwerekana ko 20% by’abaturage b’u Rwanda bagezweho n’ikibazo cyo kutihaza mu biribwa.”

Minisitiri w’Ubuhinzi n’Ubworozi Dr Musafili Ildephonse, na we yashimiye urubyiruko rukomeje gushora imbaraga mu buhinzi n’ubworozi muri rusange, by’umwihariko urwitabiriye amarushanwa, n’imishinga 15 yegukanye ibihembo. 

Yavuze ko n’imishinga itabonetse mu yahembwe igifite amahirwe yo kubona inkunga mu Kigega BDF n’inguzanyo zihendutse mu bigo by’imari, aho bashobora kubona iyo bakwishyura ku nyungu ya 8%. 

Yavuze ko uru rwego rukoramo abarenga 66% by’Abanyarwanda bakiri mu myaka yo gukora, aho usanga abenshi ari urubyiruko ari na rwo rwinshi mu gihugu. 

Ni urwego kandi rugira uruhare rwa 25% ku Musaruro Mbumbe w’Igihugu (GDP), rukaba ruza ku mwanya wa kabiri nyuma y’urwego rwa serivisi rugira uruhare rwa 37%.

Yagize ati: “Nubwo uru rwego rufite agaciro, amahirwe menshi rufite atarabyazwa umusaruro aterwa n’imbogamizi nyinshi zirimo imihindagurikire y’ibihe, ukwangirika k’ubutaka, isuri n’imyuzure, ibura ry’amazi, abaturage biyongera bikabije n’ubutaka bwinshi bukoreshwa ibitari ubuhinzi.”

Yavuze ko muri izo ngorane urubyiruko rufite amahirwe yo guhanga ibishya bihangana na zo aboneraho kwizeza urubyiruko ko Minisiteri y’Ubuhinzi n’Ubworozi izabahora hafi mu bujyanama no gushyiraho Politiki zishyigikira ibyo bakora mu buhinzi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA