Kuri uyu wa Gatandatu, taliki  26 Werurwe 2022  hateganyijwe irushanwa ryo gusiganwa mu modoka, moto na Cross Car “Sprint Rally All Star 2022” rizabera mu mihanda yo mu Karere ka Rwamagana.

Iri siganwa rizitabirwa n’imodoka 8 z’Abanyarwanda, moto 8  na Cross Car ebyiri na zo zizaba zitwawe n’Abanyarwanda.  Isiganwa “Sprint Rally All Star 2022 ni ryo siganwa rya mbere riri ku ngengabihe ya Shampiyona y’Igihugu yo gusiganwa mu modoka no kuri moto muri uyu mwaka wa 2022.

Mu bazasiganwa mu modoka harimo Gakwaya Jean Claude wegukanye Shampiyona y’Igihugu ya 2019 aho azaba ari kumwe na Mugabo Claude muri Subaru Impreza.

Kalimpinya Queen wabaye igisonga cya gatatu cya Nyampinga w’u Rwanda 2017, ari mu bazitabira “Sprint Rally All Star 2022” aho azaba afasha Yoto Fabrice bari kumwe muri Subaru Impreza.

“Cross Car” ebyiri zizitabira “Sprint Rally All Star 2022” ni izaba itwawe na Giancarlo Davite ndetse n’indi izaba itwawe na Kwizera Claude.

Iri siganwa rya mbere mu 2022 rizakinwa mu byiciro bibiri birimo icyo ku manywa “Super Stages” kizatangira saa saba (13h00) ndetse n’icy’ijoro kizwi nka “Night stage”.

Hazabanza gukorwa intera y’ibilometero 21,6 mu muhanda wa Musha- Ntunga inshuro ebyiri mu gihe kandi hazakinwa izindi nshuro ebyiri muri uyu muhanda ariko noneho imodoka na moto bihagurukira i Ntunga bigasoreza i Musha.

Imodoka zizahaguruka mbere habanje iya Gakwaya Jean Claude saa saba (13h00), moto ya Zachary Holben ihaguruke bwa mbere saa saba  n’iminota 25 (13h25) naho Giancarlo Davite ahaguruke mbere ya Kwizera Claude muri Cross Car saa Saba n’iminota 33 (13h33).

Agace k’ijoro kazakinwa saa kumi n’ebyiri n’iminota 40 (18h40) ubwo abasiganwa bazahagurukira i Musha basoreza i Ntunga ku ntera y’ibilometero 21,6.

Imodoka 8 zizakina “Sprint Rally All Star 2022”.

Harimo Gakwaya Claude & Mugabo Claude (Subaru Impreza), Mitraros Elefterios & Paganin Paolo (Subaru Impreza), Giesen Jean Jean & Mujiji Kevin (Toyota Celica), Kanangire Christian & Rutabingwa Fernand (Subaru Impreza), Yoto Fabrice & Kalimpinya Queen (Subaru Impreza), Kayitankore Lionel & Murengezi Bryan (Toyota Celica), Kiwangu Olivier & Kubwimana Emmanuel (Subaru Impreza) na Uwimana Jules & Mutuga Janvier (Totoya Corolla).

 Moto 8 zizitabira “Sprint Rally All Star 2022”

Hari iya Zachary Holben, Joachim Massinon, Sebastien Houben, Cyril Houben, Mathieu Debrouwer, Olivier Fietzer, Nziza Ken na Nijimbere Patrick.

Cross Car 2  zizakina “Sprint Rally All Star 2022”

Hari Giancarlo Davite ndetse na Kwizera Claude.

Ba uwa mbere mu kumenya amakuru agezweho!!!