Impinduka zikomeye mu buyobozi bw’Ingabo z’u Rwanda
Amakuru

Impinduka zikomeye mu buyobozi bw’Ingabo z’u Rwanda

Imvaho Nshya

June 6, 2023

Perezida wa Repubulika akaba n’Umugaba w’Ikirenga w’Ingabo z’u Rwanda Paul Kagame, yakoze impinduka zikomeye mu nzego nkuru z’Ingabo z’u Rwanda aho yagize Juvénal Marizamunda Minisitiri w’Ingabo naho Lt. Gen Mubarakh Muganga akagirwa Umugaba Mukuru.

Marizamunda wari Komiseri Mukuru w’Urwego rw’Igihugu rushinzwe Igorora (RCS), yasimbuye General Major Albert Murasira. 

Lt General Mubarakh Muganga yagizwe Umugaba Mukuru w’Ingabo asimbuye Gen. Jean Bosco Kazura wari kuri uwo mwanya kuva mu 2019.

Maj. Gen. Vincent Nyakarundi wari ukuriye Ishami ry’Ubutasi bwa Gusirikare yagizwe Umugaba w’Ingabo zirwanira ku butaka asimbuye Lt. Gen. Mubarakh Muganga. 

Mu ishami rishinzwe ubutasi bwa gisirikare, Maj. Gen. Nyakarundi yasimbuwe by’agateganyo na Col Francis Regis Gatarayiha. 

Maj. Gen Alex Kagame yagizwe Umugaba w’Ingabo n’Abapolisi u Rwanda rwohereje muri Mozambique asimbuye Maj Gen Innocent Kabandana. 

Col. Theodomir Bahizi we yagizwe Umuyobozi w’Ingabo ziri ku rugamba muri Mozambique na we asimbuye Brig Gen Pascal Muhizi. 

Muri izo mpinduka kandi, Col Francis Regis Gatarayiha yagizwe Umuyobozi w’agateganyo w’Ishami rishinzwe ubutasi bwa gisirikare, mu gihe Jean Bosco Ntibitura yabaye Umuyobozi ushinzwe umutekano w’imbere mu Gihugu mu Rwego rw’Igihugu rushinzwe Ubutasi n’Umutekano (NISS).

Brig.  Gen. Evariste Murenzi yagizwe Umuyobozi w’Urwego rw’Igihugu rushinzwe Igorora (RCS), asimbura Marizamunda.

Kuva mu kwezi kwa Nyakanga  mu 2021, u Rwanda rwohereje abasirikare n’abapolisi muri Mozambique aho Leta y’icyo gihugu yasabaga amaboko yo kurandura kurwanya ibyihebe byiyitirira Idini ya Islam byari byarigaruriye ibice byinshi byo mu Ntara ya Cabo Delgado.

Umugaba Mukuru w’Ingabo z’u Rwanda yaherukaga guhindurwa mu kwezi kUgushyingo mu 2019, ubwo Gen. Kazura wari Jenerali Majoro, yazamurwaga mu Ntera agahita asimbura Gen. Patrick Nyamvumba wari uri kuri uwo mwanya kuva mu 2013.

Maj. Gen. Murasira we yari Minisitiri w’Ingabo kuva mu kwezi kw’Ukwakira mu 2018, umwanya yagezeho asimbuye Gen.  James Kabarebe wari uwumazeho imyaka umunani.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA