IRMCT yatengushye abarokotse Jenoside ihagarika kuburanisha Kabuga Félicien
Amakuru

IRMCT yatengushye abarokotse Jenoside ihagarika kuburanisha Kabuga Félicien

NTAWITONDA JEAN CLAUDE

August 10, 2023

Umucurabwenge w’Umwongereza wabayeho mu kinyejana cya 18 yagize ati: “Kubabarira umunyabyaha ni icyaha cy’ubugome gikorerwa uwarenganye.” Icyemezo cyo guhagarika kuburanisha  Kabuga Félicien ukurikiranyweho uruhare muri Jenoside yakorewe Abatutsi, kirabonwa nko kwima ubutabera abayirokotse. 

Icyemezo cy’Urukiko rw’Ubujurire rw’Urwego Mpuzamahanga rwashyiriweho Imanza z’Insigarira z’Inkiko (IRMCT) cyo ku wa Mbere taliki 7 Kanama, cyababaje benshi biganjemo abarokotse Jenoside yakorewe Abatutsi mu 1994 bagizweho ingaruka n’ibikorwa bya Kabuga Félicien. 

Abenshi mu bavuganye n’itangazamakuru banenze icyo cyemezo kibambura uburenganzira bwo kubona ubutabera nyuma y’ibyatangajwe ko ubuzima bwa Kabuga butameze neza ku buryo yabasha gukomeza kuburana.

Urubanza rwa Kabuga uri gusatira imyaka 90 y’amavuko rwatangiye mu mwaka ushize wa 2022, mu rukiko rwa IRMCT i Hague mu Buholandi nyuma yo gufatirwa mu Bufaransa muri Gicurasi 2020.

Muri Kamena uyu mwaka ni bwo urubanza rwe rwasubitswe nyuma y’uko abaganga bagaragaje ko afite uburwayi bumutera kwibagirwa ibintu hafi ya byose (demantia), bishingirwaho hemezwa ko nta bushobozi agifite bwo kwitabira kuburana.

Uyu mugabo uvugwaho ubwo burwayi bwagaragariye mu rukiko yari amaze imyaka isaga 25 yarihishe ubutabera ku buryo byageze n’aho bikekwa ko ashobora kuba akoresha imbaraga z’itari iz’abantu.

Agitangira kuburana yavuze ko ibyaha ashinjywa byose ari ibinyoma kandi yagaragazaga ubushobozi bwo kuburana, ariko uko ibimenyetso byatangiye kugaragazwa ku byaha ashinjwa ni bwo uburwayi bwe bwafashe indi ntera. 

Umwanzuro wajuririwe wateshejwe agaciro ndetse Urukiko rutera utwatsi icyifuzo cyo gushyiraho ubundi buryo bwo gukomeza kumva urubanza rwa Kabuga n’iyo yaba atari we witabira imbonankubone, hagaragazwa ibimenyetso no kumva abatangabuhamya ariko bikazarangira adakatiwe.

Uwamariya Francine, umwe mu barokotse Jenoside yakorewe Abatutsi wabuze ab’umuryango we kubera abicanyi bafashijwe na Kabuga, yagize ati: “Ntekereza ko Isi itatwifuriza ineza. Icyo twifuzaga nk’abarokotse Jenoside ni ukubona ubutabera nyuma y’ifatwa rya Kabuga.”

Ambasaderi w’u Rwanda mu Buholandi Olivier Jean Patrick Nduhungirehe, yavuze ko icyemezo cy’Urukiko rw’Ubujurire rwa IRMCT ku rubanza rwa Kabuga kibabaje cyane ko gifungurira Kabuga amarembo yo kurekurwa abo yahemukiye batabonye ubutabera. 

Gusa yakomeje avuga ko abantu benshi batumvise neza ibikubiye muri icyo cyemezo. Ati: “Urukiko rw’Ubujurire ntirwapfundikiye urubanza. Icyo rwakoze ni ugufata umwanzuro wo guhagarika iburanisha mu gihe kitazwi nyuma yo kubona ko Kabuga adafite ubushobozi bwo kuburana.”

Yasobanuye ingingo enye zisobanura neza uwo mwanzuro. Iya mbere ni uko ikirego cya kabuga kitateshejwe agaciro kuko akomeje gukurikiranwa na IRMCT. 

Ati: “Ni byo koko IRMCT yasubitse iburanisha kubera ikibazo cy’ubuzima bwo mu mutwe bwa Kabuga, kandi mu by’amahirwe rushobora gusubukurwa igihe cyose ubuzima bwo mu mutwe bwaba bworohewe.”

Icya kabiri, yasobanuye ko Kabuga ashobora kurekurwa mu gihe haba hari igihugu cyemeye kumwakira, ariko ngo azarekurwa ku mabwiriza akakaye ku buryo igihugu kizamwakira kizategekwa kumushyiriraho uruzitiro rukomeye. 

Mu byo avuga ko bishobora kuzamukorerwa harimo gufatira urwandiko rwe rw’inzira, kumubuza gukora ingendo no guhora asurwa mu kugenzura uko amerewe no gutanga amakuru ku buzima bwe muri IRMCT.

Icya gatatu yakomojeho ni uko Kabuga ashobora kuzaguma muri gereza y’i Hague kugeza igihe hari igihugu kizaba kije kumusaba ngo kimucumbikire nubwo akurikiranyweho ibyaha bikomeye bijyanye no gutera inkunga Jenoside yakorewe Abatutsi mu 1994.

Icya kane, yashimangiye ko mu gihe Kabuga agikurikiranywe na IRMCT kugeza igihe kitazwi, imitungo ye yose izakomeza gufatirwa mu gihe kitazwi. 

Yakomeje agira ati: “Amasomo twakura muri iki kibazo cya Kabuga ni uko cyagaragaje ko Umuryango Mpuzamahanga, harimo ibihugu byinshi by’i Burayi, wemeye ko kigera kuri uru rwego ukingira ikibaba Kabuga Félicien cyangwa wanga kumwohereza mu Rwanda mu gihe cy’imyaka 25.”

Ni muri urwo rwego yavuze ko mu myaka igera kuri 30 ishize u Rwanda rwohereje mu mahanga impapuro zirenga 1000 zo guta muri yombi abakekwaho ibyaha bya Jenoside yakorewe Abatutsi, ariko ngo hari ibyago ko na bo bashobora kuzafatwa bameze nka Kabuga cyangwa se ntibanafatwe, bityo ubutabera ntibuboneke.

Yavuze ko gutinza ubutabera ku bagizweho ingaruka na Jenoside yakorewe Abatutsi mu 1994 bijya kungana  no kububima.

Umushinjacyaha Mukuru wa IRMCT Serge Brammertz, yavuze ko  umwanzuro w’Urukiko rw’Ubujurire rwa IRMCT ukwiye kubahwa nubwo hari abantu benshi udashimishije, asaba abarokotse Jenoside yakorewe Abatutsi kwihangana.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA