Ishema ku Rwanda ruzakira inama ikomeye mu bukerarugendo ku Isi
Amakuru

Ishema ku Rwanda ruzakira inama ikomeye mu bukerarugendo ku Isi

Imvaho Nshya

October 5, 2023

U Rwanda rutewe ishema no kuba rugiye kwakira Inama Mpuzamahanga y’Inama ihuza Ababarizwa mu Bukerarugendo ku Isi (World Travel and Tourism Council – WTTC) itegerejwe kubera i Kigali hagati y’itariki ya 1 kugeza ku ya 3 Ugushyingo 2023.

Ni ubwa mbere izaba ibereye ku mugabane w’Afurika, ikazagaruka no ku ntambwe imaze guterwa mu kwimakaza urwego rw’ubukerarugendo ku Mugabane w’Afurika, by’umwihariko mu myaka mike ishize.

Ubuyobozi bw’Urwego rw’u Rwanda rushinzwe Iterambere (RDB), bwatangaje ko uretse kuba ari intambwe itewe n’u Rwanda by’umwihariko, iyo nama igiye kuba urufunguzo rw’amahirwe atandukanye ku Mugabane w’Afurika.

Byagarutsweho ubwo hatangazwaga insanganyamatsiko y’iyo nama mpuzamahanga ngarukamwaka ihabwa agaciro gakomeye mu rwego rw’ubukerarugendo.

Ubuyobozi bwa WTTC bwemeje ko insanganyamatsiko y’inama mpuzamahanga igiye kuba ku nshuro ya 23, izibanda ku kubaka ibiraro bihuza uruhererekane rw’ubukerarugendo hagamijwe guharanira iterambere rirambye ry’ejo hazaza.

Biteganyijwe ko izahuriza hamwe abayobozi bahagarariye za Guverinoma z’ibihugu bitandukanye ndetse n’abayobozi b’inzego z’ubukerarugendo muri Leta cyangwa abikorera, abahanga ibishya n’abandi bazaba baganira ku buryo bwo kurushaho gushyigikira ukwiyubaka k’ubukerarugendo bukarushaho gutekana, kwigira no kutagira n’umwe buheza mu guharanira iterambere rirambye ry’ahazaza.

Gatare Francis, Umuyobozi wa RDB, yagize ati: “Dutewe ishema no kwakira iyi nama ya WTTC ya mbere ibereye muri Afurika. Nubwo izateranira mu Rwanda, izaba ari iy’Umugabane wose. Afurika ifite ibyiza nyaburanga bishimishije n’ubunararibonye buhebuje ku Isi yose, kandi uru rwego rugira uruhare rukomeye mu iterambere rihoraho ry’ubukungu binyuze mu guhanga amamiliyoni y’imirimo.”

Iyi nama yitezweho gutanga urubuga rwagutse rugamije kubaka ibiraro bihuza uruhererekane rw’urwego rw’ubukerarugendo, no kongera gutegura ahazaza harambye h’uru rwego kugira ngo rutange umusaruro wose rukwiye gutanga.   

Julia Simpson, Perezida akaba n’Umuyobozi Mukuru wa WTTC, yagize ati: “Iyi nama Mpuzamahanga izahuriza hamwe abayobozi, abahanga udushya, abaharanira impinduka n’abandi benshi baturutse mu mpande zose z’Isi kugira ngo bahurize hamwe ibitekerezo mu gutegura icyerekezo gishya cy’uru rwego.”

Yakomeje agira ati: “Ni amahirwe adasanzwe yo kuza ku ruhembe rw’imbere mu guhindura uru rwego bitanyuze mu guharanira ukwigira kwarwo ari na ko hanarebwa no ku kutagira n’umwe uhezwa muri rwo.”

Yakomeje ashimangira ko u Rwanda ari icyerekezo gihebuje cyo kwakiriramo iyo nama, mu gihe urwego rw’ubukerarugendo rurimo kwinjira mu cyerekezo gishya kiganisha ku kugera ku Ntego z’Iterambere Rirambye (SDGs).

Yakomeje agaragaza ko kuba u Rwanda n’Afurika muri rusange bituwe n’umubare munini w’urubyiruko ari amahirwe akomeye, aho idolari rimwe muri 13 biteganyijwe ko azaba ava mu bukerarugendo, ndetse n’umurimo umwe uhanze muri 17 izaba ari iyo muri urwo rwego.

Ati: “Ibi bigaragaza amahirwe akomeye umugabane uzabona muri uru rwego rutanga mu guhanga imirimo no kuzamura iterambere ry’ubukungu bw’urubyiruko muri Afurika yose.”

Iyo nama irimo gutegurwa na WTTC ifatanyije na RDB, ikaba yitezweho kuzaberamo ibiganiro byibanda cyane ku kubaka ubudahangarwa no guharanira iterambere rirambye, kubyaza umusaruro ikoranabuhanga ry’ubwenge muntu buhangano (AI) no kurushaho gusobanukirwa amasoko mashya agenda avuka mu rwego rw’ubukerarugendo.

Hazanarebwa ku mahirwe n’imbogamizi uru rwego rugenda ruhura na byo haba muri Afurika ndetse no mu ruhando mpuzamahanga, bikazajyana no kugerageza gushakira hamwe ibisubizo birambye ku mbogamizi zizagaragazwa.  

NTAWITONDA JEAN CLAUDE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA