Iyo imvura iguye Gare ya Muhanga ihinduka nk’igishanga
Amakuru

Iyo imvura iguye Gare ya Muhanga ihinduka nk’igishanga

Imvaho Nshya

October 27, 2023

Abatega imodoka n’abakorera muri Gare ya Muhanga basaba ko hasibwa ibinogo byuzura amazi iyo imvura imaze kugwa ku buryo Gare yose ihinduka nk’igishanga.

Abashoferi bavuganye n’Imvaho Nshya na bo bagaragaje ko babangamiwe n’ibinogo byacukunyutse imbere y’amarembo yinjirirwamo n’imodoka, bagasaba ko ubuyobozi bwa Gare bwakwihutira kuhakora kuko bica rasoro z’imodoka zabo bigatuma hari abashakira abagenzi hanze.

Uburyo iyi Gare yubatswemo n’imodoka ziremereye zihakoresha n’umubare wazo byaba ari byo bituma hasenyuka uko bwije n’uko bucyeye.

Munyanziza Pie, umushoferi w’imodoka zitwara abagenzi, avuga ko imodoka zirimo amabisi manini akunda gufata umwanya mugari zihakatira zikahasenya akemeza ko nta gikozwe byakomeza kugorana.

Yagize ati: “Nawe reba ukuntu hangiritse kandi kuva iyi gare yakubakwa yarangiritse bongera kuyisana ku kibuga aha haparika imodoka urabona imodoka zose zitwara abagenzi zinyura hano, kandi iyi si kaburimbo nzima bashyizeho kuko ni urusekabuye bashyize hejuru ya Godoro ni na yo mpamvu hahora hasenyuka”.

Rukundo Idesbard, ukorera mu Karere ka Ngororero ataha i Muhanga, avuga ko igihe cyose yakoresheje iyi Gare ibi binogo bititaweho ngo bisibwe ku buryo imodoka zishobora kuzahagongera abantu bitewe n’uko bingana wenda no kurangara kw’abatwara imodoka bahakatira.

Yagize ati: “Ibi binogo bikwiye kwitabwaho bikaba byasibwa nubwo bitoroshye, ariko bishobora no guteza impanuka bakahagongera umuntu mu gihe abatwaye ibinyabiziga barangaye, ikindi imodoka na zo zirahangirikira cyane usanga uhageze akatira kure abihunga”.

Karangwa Jean Claude, umushoramari ufite imodoka zitwara abagenzi muri iyo gare, avuga ko imodoka ze nibura mu mezi 3 ashobora kugura ibyuma bya rasoro bifataho amapine kubera gucika.

Arasaba ko mu maguru mashya aha hantu hakwiye gusanwa kuko hari n’imodoka zamaze kujya ziparika hanze aho kwinjira muri Gare.

Yagize ati: “Njyewe mfite imodoka 3 zikora umurimo wo gutwara abagenzi ariko amafaranga zikorera zirongera zikayitwarira kuko zihora zicika rasoro ku buryo udacunze neza ngo urebe ikibazo cy’imodoka yawe amapine yazasigara mu nzira. Bakwiye kuhasana nk’ubu usanga hari abantu batacyinjiza imodoka zabo muri iyi Gare kubera gutinya ahubwo bagashakira abagenzi hanze yayo”.

Umuyobozi Mukuru wa Jali Real Estate Ltd Nsengiyumva Benoit, avuga ko ibi bibazo birimo gushakirwa umuti kandi ibi binogo bigaragara byamaze gutangirwa isoko bityo mu byumweru  bibiri bigiye gukurikiraho bizaba byamaze gusibwa.

Yagize ati: “Natwe twabonye ko iyi Gare ifite  ibibazo bitandukanye bigomba guhinduka kandi twamaze kubishakira umuti uhamye harimo n’ibi bagaragaza ko bibangamiye urujya r’uruza rw’abahakoresha ndetse n’abahakorera kandi twatanze isoko kugira ngo ibyo binogo mubona bisibwe hagamijwe gufasha abahakoresha kugubwa neza”.

Akomeza avuga ko ntawukwiye kumva ko yaparika imodoka hanze kandi yaragenewe aho igomba guparika igatwara abagenzi, akibutsa ko ubikoze aba anyuranyije n’amahame y’ikoreshwa rya Gare.

Gare ya Muhanga ihuriramo imodoka ziva mu Mujyi wa Kigali zerekeza i Muhanga zigakomeza zigana i Huye izindi zigakomereza i Rusizi, ariko kandi hakaba n’izihagera zigafata umuhanda werekeza  i Rusizi ziciye Karongi na Nyamasheke n’iziva i Kigali n’i Muhanga zigana Ngororero -Mukamira zigasozereza i Rubavu.

Iyi Gare yakira bisi nini zirimo iza RITCO, Volcano na Horizon hakaba izindi modoka za Coaster z’aya makampani n’izandi arimo East Africa express, Omega Car Express, La colombe Express, Kivu Belt Express, RFTC ndetse n’iz’abikorera n’abandi bahagera baje gusaba serivisi.

AKIMANA JEAN DE DIEU

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA