Kamonyi: Imihanda yangiritse ibangamiye imigenderanire n’imihahirane
Amakuru

Kamonyi: Imihanda yangiritse ibangamiye imigenderanire n’imihahirane

Imvaho Nshya

July 26, 2023

Imwe mu mihanda y’igitaka y’Akarere ka Kamonyi yarangiritse ku buryo bibangamira ingendo ndetse no guhahirana nk’uko bitangazwa na bamwe mu bakoresha iyo mihanda, bikagora kuyigendamo, bikaba biteza imbogamizi mukuyikoresha.

Umwe mu baturage bo mu Murenge wa Nyamiyaga  yavuze ko umuhanda  uva Rugobagba werekeza Mukunguri wahindutse nk’intabire ku buryo uteye impungenge kuwugendamo kandi n’ivumbi  ubwaryo ribasanga mu nzu cyane cyane abegereye ku muhanda.

Yagize ati: “Ivumbi ryo turarimenyereye, Umuhanda uva Rugobagoba ujya ku Mukunguri ni ivumbi gusa nubwo hariho umushinga w’uko uzubakwa ugashyirwamo kaburimbo, ariko hagati aha kuhagenda biragoye, ni ivumbi gusa. 

Guhahirana ntibyoroshye, ni ibibazo. Ni habi cyane, ubundi iyo ari ku zuba umuntu ntiyifuza kuhaba, umuhanda ugendeka nabi, waracukuritse, ivumbi ryinjira mu nzu ugasanga hose hahindanye, umuntu abura uko amesa, keretse nk’abatuye ahitaruye umuhanda naho abegereye umuhanda ni ikibazo”. 

Undi muhanda ni ugana ku ishuri Fr.Ramon Kabuga TSS, ukoreshwa n’abanyeshuri ndetse n’ababyeyi na bo bagaragaje ko kujyayo bitoroshye kuko umuhanda waho ari mubi.

Kuri iki kibazo, Umuyobozi w’Akarere ka Kamonyi, Dr. Sylvere Nahayo avuga ko ibyo bibazo by’iyo mihanda bizwi kandi ko hakozwe inyigo ku buryo iyo mihanda  izakorwa uko ubushobozi bugenda buboneka.

Yagize ati: “Ikibazo cyo kuba ako gace katabasha kugendwa mu buryo bukwiye, katagendeka neza kirazwi ariko byose bituruka mu bushobozi igihugu gifite hari umuhanda Gihara- Nkoto, uwa Bishenyi- Kigese ibyo byose ni ibikorwa bitaterurirwa rimwe ngo bikunde. Kimwe n’ibiraro ni ibikorwa tugikomeje. Muri iyi ngengo y’imari tugiye kubaka ikiraro cya Kayumbu. 

Turabizeza ko uko ubushobozi buzagenda buza ikibazo cyaha turakizi tuzakomeza kugenda dushakisha icyashoboka kugira ngo aka gace kabe nyabagendwa”.

Ikindi Meya yongeyeho ni uko umuhanda Rugobagoba- Mukunguri biteganyijwe ko uzatunganywa mu ngengo y’imari y’uyu mwaka wa 2023/2024.

Yanditswe na NYIRANEZA Judith

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA