Kayishema Fulgence yasabye ubuhungiro nyuma yo gufatwa
Amakuru

Kayishema Fulgence yasabye ubuhungiro nyuma yo gufatwa

NTAWITONDA JEAN CLAUDE

June 22, 2023

Kayishema Fulgence w’imyaka 62 ukurikiranyweho ibyaha bya Jenoside yakorewe Abatutsi mu 1994, yatangaje ko yasabye ubuhungiro muri Afurika y’Epfo nk’uko byemejwe n’Urwego rw’Ubushinjacyaha bw’icyo Gihugu (NPA). 

Eric Ntabazalila, Umuyobozi ushinzwe Itumanaho rya  NPA muri “Western Cape”, yavuze ko Kayishema wasabye ubuhungiro akurikiranyweho ibindi byaha 54 byiyongera ku bya Jenoside yakorewe Abatutsi mu 1994.

Ibyo byaha birimo icyenda bijyanye n’ubutekamutwe, 10 birebana no kunyuranya n’igika cya 37(a) cy’ingingo ya 130 y’amasezerano agenga impunzi yo mu 1998, n’ibyaha 35 bijyanye no kunyuranya n’igika cya 49 (1) cy’ingingo ya 13 y’Itegeko rigenga abinjira n’abasohoka ryo mu 2002.

Kayishema abinyujije mu mwunganizi we mu by’amategeko yatangarije urukiko ko aretse ibyo kuburana asaba kurekurwa by’agateganyo akaburana ari hanze. 

Ku wa 9 Kamena 2023, Leta y’Afurika y’Epfo yashyikirije umwavoka wa Kayishema amahirwe yo kwiregura ku byaha akurikiranyweho, maze we asaba ko byaba bisubitswe akabanza kuvugana n’umukiliya we. 

Ku wa Kabiri w’iki cyumweru ubwo yitabaga urukiko, umwe mu Bavoka be Me. Juan Smuts yavuze ko baganiriye n’umukiliya wabo abamenyesha ko avuye mu byo kuburana asaba kurekurwa by’agateganyo.

Me. Juan ntiyagaragaje niba umukiliya we ateganya kuzagarura ubusabe bwo kurekurwa urubanza rugeze ku rundi rwego, ariko Umuvugizi wa NPA yavuze ko iyo ngingo nigaruka ubushinjacyaha buzayihana.

Kayishema amaze imyaka ikabakaba 30 abunza akarago, aho yiyoberanyije kenshi yigira Umurundi cyangwa umuturage wa Malawi. 

Yatawe muri yombi taliki ya 24 Gicurasi 2023, i Pearl Rock muri Afurika y’Epfo, nyuma y’iperereza ricukumbuye ryamukozweho nk’umwe mu bashakishwaga n’ubutabera mpuzamahanga kubera uruhare rutaziguye yagize muri Jenoside yakorewe Abatutsi.

Umujyi yafatiwemo uherereye mu bilometero 60 uvuye mu Mujyi wa Cape Town muri Afurika y’Epfo. 

Taliki ya 21 Ukuboza 1999 ni bwo Kayishema yerekeje i Cape Town muri Afurika y’Epfo yigaragaza nk’impunzi y’u Burundi ku izina rya Fulgence Dende-Minani. 

Hagati y’umwaka wa 1999 n’uyu munsi, yiberaga ahanini muri Afurika y’Epfo ariko afite amazina y’amahimbano ku buryo byasabye imbaraga nyinshi inzego z’umutekano n’izishinzwe iperereza kumenya neza ko ari we uri mu bashakishwa n’ubutabera mpuzamahanga.

Akurikiranyweho kuba yarayoboye igitero cyishe Abatutsi barenga 2000 biganjemo abagore, abana n’abagabo batsembewe muri Kiliziya ya Nyange mu yahoze ari Perefegitura ya Kibuye. 

Mu kwezi gushize, Umunyamabanga Mukuru wa Loni António Guterres, yavuze ko itabwa muri yombi rya Kayishema ryohereza ubutumwa ku bakekwaho ibyaha bya Jenoside bose ko badashobora gucika ubutabera ndetse ko igihe kizagera bakaryozwa ibyo bakoze, na nyuma y’icya kane cy’ikinyejana nk’uko bimeze kuri we. 

Umuryango w’Ubumwe bw’u Burayi (EU) na wo wakiriye neza ifatwa rye, uvuga ko Umuryango Mpuzamahanga wiyemeje guharanira ko abagize uruhare muri Jenoside yakorewe Abatutsi mu 1994 bose bagezwa imbere y’ubutabera bagahabwa ibihano bibakwiriye. 

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA