Kicukiro: ‘Nderere u Rwanda’, gahunda yitezweho kurandura imirire mibi
Amakuru

Kicukiro: ‘Nderere u Rwanda’, gahunda yitezweho kurandura imirire mibi

NTAWITONDA JEAN CLAUDE

March 9, 2022

Mu Karere ka Kicukiro mu Mujyi wa Kigali hatangijwe gahunda yiswe ‘Nderere u Rwanda’ hagamijwe guhangana n’ikibazo cy’abana barwaye indwara ziterwa n’imirire mibi.

Ni gahunda yatangijwe kuri uyu wa Kabiri tariki 08 Werurwe 2022 ubwo hizihizwaga Umunsi Mpuzamahanga w’umugore wabereye mu Murenge wa Kanombe ku rwego rw’Akarere ka Kicukiro.

Ubuyobozi bw’Akarere ka Kicukiro, busobanura ko bwatangije gahunda ya ‘Nderere u Rwanda’ nyuma yo kubona ikibazo cyugarije umwana uri mu mirire mibi, bityo agakurwa mu kibazo arimo.

Akarere ka Kicukiro kizeye ko iyi gahunda izatanga umusaruro.

Umutesi Solange, Umuyobozi Nshingwabikorwa w’Akarere ka Kicukiro, yagize ati: “Gahunda ya ‘Nderere u Rwanda’ izatanga umusaruro kuko tuyimuritse ku mugaragaro twarabanje gukora igisa n’igerageza”.

Atanga urugero rw’umwana wari mu mutuku nyuma agafatwa n’umwe muri ba mutima w’urugo mu Murenge wa Kanombe, akaba yamugaragaje yarakize. Ashimangira ati: “Ibi ni urugero rw’ibishoboka”.

Nyirasafari Josiane utuye mu Kagari ka Kabeza mu murenge wa Kanombe, yabwiye Imvaho Nshya ko yishimiye uko umwana we yafashwe ari mu mutuku akaba amusubijwe yarakize.

Ati: “Narabishimye, nagiye kubona mbona haje umuntu aramfasha. Umwana ntabwo ayari ameze neza nta bushobozi bwo kumwitaho nari mfite, nta n’umuntu nagiraga umfasha kuko umugabo yahise anta inda ikiri ntoya”.

Kayumba Jeanne yafashe umwana afite ibiro 5 ubu yamusubije umubyeyi afite ibiro 12 mu gihe cy’ukwezi

Avuga ko azakora uko ashoboye kugira ngo umwana atazongera guhura n’ikibazo cy’imirire mibi. Ati: “Ubuyobozi bwazanye iki gitekerezo cya Nderere u Rwanda bwagize neza turabushimiye”.

Kayumba Jeanne, Umuhuzabikorwa w’Inama y’Igihugu y’Abagore (CNF) mu Murenge wa Kanombe, avuga ko bahuye n’ikibazo cy’umwana uri mu mirire mibi agahita asaba ko bamumuha. Asobanura ati “[…] nyina nta mbaraga yari afite nta n’ubushobozi yagiraga mu gihe cyo kumutunga bituma umwana ajya mu kibazo k’imirire mibi.

Umwana mumaranye ukwezi mugaburira ariko kumusubiza kuri selerake ntabwo ari ikintu cyari cyoroshye ariko nicyo cyonyine cyatumye avayo.

Nshimira Imana ko yamfashije kuko yaje afite ibiro 5 mu gihe cy’ukwezi amaze mu rugo, akaba agiye afite ibiro 12”.

Ku rundi ruhande, ubuyobozi bw’Umujyi wa Kigali bushima uruhare rw’abagore bagaragaza mu gutanga ibitekerezo mu bishingirwaho mu gukora igenamigambi ry’Umujyi wa Kigali.

Umuyobozi wungirije w’Umujyi wa Kigali ushinzwe Imiturire n’Ibikorwaremezo, Dr Merard Mpabwanamaguru, yagize ati: “Turasaba abagore gukomeza kuba umusemburo w’iterambere, mugakorera hamwe mukarushaho gukora imishinga ibyara inyungu hagamijwe kwihangira imirimo no gutanga akazi ku bantu benshi”.

Gahunda ya ‘Nderere u Rwanda’ yatangijwe mu mirenge yose igize Akarere ka Kicukiro.

Mu murenge wa Nyarugunga hatanzwe gazi ku miryango itishoboye mu rwego rwo guhangana n’imihindagurikire y’ibihe no kwimakaza gahunda ya ‘Nderere u Rwanda’.

Ubushakashatsi bwa Gatandatu ku buzima n’imibereho by’abaturage, RDHS (Rwanda Demographic and Health Survey) bwakoze n’Ikigo cy’Igihugu cy’Ibarurishamibare (NISR), bwerekana ko 33% by’abana bari munsi y’imyaka 5 mu Rwanda bafite ikibazo cyo kugwingira.

Ni mu gihe Akarere ka Kicukiro kaza ku mwanya wa mbere mu gihugu mu guhangana n’igwingira ry’abana bari munsi y’imyaka 5 kuko abana bagwingiye bari ku 10.7%.

Gahunda ya Nderere u Rwanda, biteganijwe izagira uruhare mu guca burundu ikibazo k’igwingira ry’abana mu Karere ka Kicukiro.

TANGA IGITECYEREZO

  • Cecile Uwamariya
    March 9, 2022 at 12:15 pm Musubize

    Abanyarwanda twese dushyize mu bikorwa iyi gahunda ya “Nderere u Rwanda” imirire mibi n’igwingira yahindura amateka tukiyubakira u Rwanda twifuza. Kicukiro bakomereze aho mu guhanga udushya mu rugendo rw’iterambere

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA