Kigali: Abagize Guverinoma bitabiriye Imurikabikorwa ry’Ubuhinzi n’Ubworozi
Amakuru

Kigali: Abagize Guverinoma bitabiriye Imurikabikorwa ry’Ubuhinzi n’Ubworozi

Imvaho Nshya

July 21, 2023

Kuri uyu wa Gatanu taliki 21 Nyakanga 2023 mu Karere ka Gasabo mu Mujyi wa Kigali, hatangiye Imurikabikorwa ry’ubuhinzi n’Ubworozi.

Iri murikabikorwa ryitabiriwe na Minisitiri w’Imari n’Igenamigambi Dr Uzziel Ndagijimana ari na we Mushyitsi Mukuru, Minisitiri w’Ubuhinzi n’Ubworozi Dr Musafiri Ildephonse na Minisitiri w’Ubuhinzi n’Ubworozi muri Zimbabwe, Dr Anxious Jongwe Masuka. 

Insanganyamatsiko y’uyu mwaka igira iti ‘Kuvugurura ubuhinzi n’ubworozi binyuze mu ikoranabuhanga, guhanga ibishya n’ishoramari’. 

Imurikabikorwa ryatangiye ku mugaragaro uyu munsi ryitabiriwe n’ibihugu 16, rikazasoza taliki 29 Nyakanga 2023. 

Minisitiri Dr Ndagijimana yavuze ko mu rwego rwo gufasha abahinzi kubona inguzanyo ku buryo butabagoye mu mabanki n’ibigo by’imari, ko Guverinoma yabashyiriyeho uburyo bworoshye binyuze mu mushinga wo guteza imbere ubuhinzi bugamije ubucuruzi no kugabanya ibibuhungabanya.

Ashishikariza abahinzi gukoresha ubu buryo bwashyiriweho abahinzi kugira ngo iz nguzanyo zikokoreshwe mu buryo bwihuse.

Imurikabikorwa ry’ubuhinzi n’ubworozi rigiye kubera umwanya mwiza abahinzi n’aborozi wo gushakira hamwe ibisubizo n’uburyo barushaho guhangana n’ingaruka ziterwa n’imihindagurikire y’ikirere.

Ati “Ni muri urwo rwego mugiye gusangira amakuru na bagenzi banyu, uburyo mwarushaho gukoresha ikoranabuhanga mu guhanga udushya no gushora imari mu bikorwa byo kuhira imyaka ku buso buto ndetse n’ubuciriritse.

Kubyaza umusaruro amazi y’imvura ndetse no gutunganya ibishanga. Ndasaba abahinzi kurushaho kwitabira gahunda y’ubwishingizi k’ubuhinzi n’ubworozi Leta yabashyiriyeho mu rwego rwo guhangana n’imihindagurikire y’ibihe”.

Ibi ngo bizatuma abahinzi n’aborozi bagabanya igihombo baterwa n’ibiza ndetse n’ibindi bibazo byakwibasira umusaruro w’ubuhinzi n’ubworozi.

Yasabye urubyiruko gufata iya mbere mu ikoranabuhanga no guhanga udushya mu buhinzi n’ubworozi.

Yagize ati “Ibikorwa byanyu birigaragaza ndetse no muri iri murikabikorwa biragaragara ko ibikorwa byinshi ari iby’urubyiruko, turabashima cyane”.

Yibukije ko ubuhinzi n’ubworozi ari umwuga ushobora kubyarira inyungu abawukora igihe bawukoze neza kandi mu buryo bujyanye n’igihe.

Imurikabikorwa ry’ubuhinzi n’Ubworozi ryatangijwe na Perezida wa Repubulika Paul Kagame taliki 17 Nyakanga 2003. 

Yanditswe KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA