Kigali: Abari batuye mu Mudugudu wo “Kwa Dubai” bari mu gihirahiro
Amakuru

Kigali: Abari batuye mu Mudugudu wo “Kwa Dubai” bari mu gihirahiro

Imvaho Nshya

September 26, 2023

Abari baraguze inzu mu Mudugudu w’Urukumbuzi wamenyekanye cyane nko kwa Dubai, baravuga ko baheze mu gihirahiro kubera ko bakomeje kugorwa n’ubukode ndetse banamenyeshejwe na za Banki batsemo inguzanyo ko bakwishyura inguzanyo bitaba ibyabo bigatezwa cyamunara.

Inzu baguze ni izari zubatswe n’umunyemari Nsabimana Jean uzwi ku izina rya Dubai, Ubuyobozi bw’Umujyi wa Kigali bwagaragaje ko zubatswe nabi ko zikeneye kuvugurura,.

Tariki ya 17 Mata 2023 ni bwo abo baturage bari baraguze inzu n’umushoramari Dubai muri uwo Mudugudu uherereye  mu Murenge wa Kinyinya w’Akarere ka Gasabo, basabwe kuzivamo nyuma y’isuzuma ryakozwe rikagaragaza ko zubatswe nabi.

Icyo gihe aba baturage bari baraguze izo nzu, bagaragarije  ubuyobozi ko ntaho bafite ho kwerekeza nibaramuka bazivuyemo.

Bamwe mu baturage baganiriye n’itangazamakuru, bavuze ko izo nzu bazitanzeho amafaranga menshi yo kuzigura no kuzisana ariko ngo baracyari mu gihirahiro cy’aho kwerekeza.

Ngiruwonsanga Gilbert yagize ati: “Duhangayikishijwe n’uburyo twakodesha izindi nzu bataraduteguje, kandi mu by’ukuri muri ibi bihe uba ubona kubona amafaranga yo gukodesha bigoranye.”

Ubwo aba baturage bakurwaga muri izo nzu, Umujyi wa Kigali wabijeje ko ugiye kubakodoshereza amezi atandatu maze izo baguze mu Mudugudu zikongera gusanwa bundi bushya.

Aba baturage bavuga ko nta cyakozwe, bakaba bafite impungenge ko banki batsemo inguzanyo zizateza cyamunara ibyabo, dore ko abenshi banagicumbitse hirya no hino mu Mujyi wa Kigali.

Mukamabano Louise yagize ati: “Tuvuge urugero nkanjye bakivuga bati amezi atandatu ntabwo muzaba mwishyura bakandikira amabanki nyine, abashinzwe inguzanyo bampamagaye banyumvisha ko  niba naratangaga ibihumbi 350 buri kwezi ngomba kuzajya nishyura 400 nyuma y’amezi 6. Baduhaye ibihumbi 300 aya se yarigukodesha iminsi ingahe? Ni ukwezi kumwe. Nyuma y’aho bakomeje batwizeza ngo bigiye gukemuka ariko ubu turabona ntaho bizagarukira.”

Ubuyobozi bw’Umujyi wa Kigali, mu kiganiro buheruka kugirana n’itangazamakuru, bwatangaje ko hari imishinga ikinozwa ijyanye n’uyu Mudugudu ariko ko Umujyi uzakomeza gukodeshereza abawuvuyemo hagishakishwa igisubizo kirambye.

Pudence Rubingisa, Umuyobozi w’Umujyi wa Kigali, yavuze ko ibyo kuba banki zigiye guteza cyamara imitungo y’abahoze batuye muri uyu Mudugudu na byo bagiye kubisuzuma.

Ati: “Ku kibazo cy’abari bafite imitungo cyangwa se bafite imitungo mu Mudugudu w’Urukumbuzi twabigarutseho ndetse na gahunda yaratanzwe kuri NPD ngo bakore imihanda y’inzira z’amazi ku nzu zirenga 200 z’abantu batuyemo, ariko abari bagifite inzu banimuwe zagize ibibazo.

Ibiganiro byo twarabikoze kugira ngo twegere banki nubwo uruhare rwacu ari ukugira ngo bumve ikibazo gihari kugira ngo hatagira uwagurishirizwa umutungo we turakomeza gukurikirana ngo tumenye niba hari uwaba akeneye ubufasha, cyane nko gukodesha kugira ngo ikibazo kibonerwe igisubizo gihamye.”

Umudugudu w’Urukumbuzi wubatswe mu mwaka wa 2015 ukaba ugizwe n’inzu 121 aho muri zo 114 zitageretse ndetse na zirindwi zigeretse. Mu isuzuma ry’ibanze ryakozwe, muri izi 114 zitageretse byabagaragaye ko izigera kuri 54 zigomba gusanwa.

ZIGAMA THEONESTE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA