Kigali: Ageze ku mitungo isaga miliyoni 150 abikesha Umwalimu SACCO
Amakuru

Kigali: Ageze ku mitungo isaga miliyoni 150 abikesha Umwalimu SACCO

Imvaho Nshya

October 10, 2023

Umwuga w’ubwarimu wagiye uvugwaho byinshi uko imyaka igenda ihita ariko mu bawuvuga imyato harimo Mukaremera Marie Rose wishimira intambwe amaze gutera mu iterambere ry’Umuryango we, aho amaze kugira imitungo ifite agaciro gasaga miliyoni 150 z’amafaranga y’u Rwanda akiri mu burezi.

Mukaremera umaze imyaka irenga 20 muri uyu mwuga, yatangiye gufata inguzanyo ku mushahara muri Koperative Umwalimu SACCO mu mwaka wa 2009.

Yatangiye uburezi yiga kuri TTC Mbuga mu Karere ka Nyamagabe ariko nyuma yaje kwimukira mu Mujyi wa Kigali akomeza gukorana n’iyo Koperative y’abarimu.

Kuri ubu yigisha ku Rwunge rw’Amashuri EPA St Michel iherereye mu Karere ka Nyarugenge mu Mujyi wa Kigali.

Gukoresha inguzanyo yahawe n’Umwalimu SACCO byatumye agera ku mitungo ifite agaciro gasaga miliyoni 150 z’amafaranga y’u Rwanda nk’uko yabihamirije Imvaho Nshya.

Mukaremera atanga ubuhamya bw’ukuntu yagiye azamuka kuko yashatse acyiga muri Kaminuza ndetse n’umugabo ari umunyeshuri, ariko nyuma batangiye akazi bayoboka Umwalimu SACCO.

Ati: “Ndangije kaminuza, twigishaga kuri TTC Mbuga ni na ho twiyandikishirije mu Umwalimu SACCO, uwo twashakanye twari tukiri abanyeshuri ntaho twari dufite ho kuba, byaje kuba ngombwa ko dutangira kwigisha, twaka inguzanyo ya mbere mu Mwalimu SACCO. Nuko aho tugereye mu Mujyi wa Kigali dusana iyo nzu twari dufite, hanyuma turongera dusaba indi nguzanyo tugura indi nzu nuko ziba zibaye ebyiri dutangira kujya dukodesha”.

Yakomeje asobanura ko gukorana na Umwalimu SACCO byamuhinduriye ubuzima, ubu akaba afite inzu abamo n’umuryango we, izindi akodesha, amashyamba, ibibanza na moto.

Yagize ati: “Natangiye akazi k’ubwarimu mu 2002, kandi maze kugera kuri byinshi mbikesha Umwalimu SACCO. Mfite inzu 2 zo kubamo, imwe ndayikodesha i Kanyinya mu Murenge wa Nyarugenge, Umujyi wa Kigali hariho n’imiryango 6 y’ubucuruzi aherekeye ku muhanda, ku Muhima mpafite inzu ebyiri, ku Gitega mpafite inzu 1 zose zikodeshwa, ibibanza, amashyamba, imirima na moto 4 hiyongereyeho n’iyi nahembwe. Byose bibarirwa agaciro k’asaga miliyoni 150”.

Mukaremera yakomeje asobanura ko ibyo byose yabibonye abikesha amafaranga yahawe na Umwalimu SACCO. Ati: “Ubu mvuze ibyo yatugejejeho bwakwira bugacya. Umwaka wa mbere nishyura neza, uwa 2, bigeze mu mwaka wa gatatu, konti yanjye bayihuje n’iy’umugabo amafaranga ye yahembwa agahita aza kuri konti yanjye kugira ngo mbashe kwishyura.

Hari inzu 2 zo kubamo, Umwalimu SACCO waduhaye amafaranga. Muri za 2004 ni bwo twahise tubona akazu ko kubamo mu Mujyi wa Kigali tubikesheje Umwalimu SACCO, bari batugurije amafaranga make cyane miliyoni 3. Twaje gukomeza kugenda dusaba inguzanyo nke, tubasha kugira aho tuba kandi mu Mujyi wa Kigali mu 2009”.

Yongeyeho ati: “Mu 2017 Umwalimu SACCO wanguriye inzu i Kanyinya ubu ni ho dutuye ku nguzanyo ya miliyoni 19, kubera kwizigama twongeyeho andi tuhagura miliyoni 25. Twabashije guhuza abantu babiri turabagurira, izo ebyiri ni izo kubamo noneho imbere ahareba ku muhanda hari imiryango 6 y’inzu z’ubucuruzi”.

Mukaremera yakomeje avuga ko atabasha kurondora ibyo akesha Umwalimu SACCO, kuko wamwubakiye ubushobozi ku buryo no mu bihe bya COVID-19 yakomeje kwishyura neza inguzanyo ari na ko yizigamira, ku buryo yanarihiye abana be amashuri meza bituma hari uwagiye kwiga muri Qatar.”

Yagize ati: “Mu gukoresha neza amafaranga y’inguzanyo y’Umwalimu SACCO nanamenye ko ufata amafaranga ukayashyira kuri ‘Nzigamira Nige’ kandi akunguka mu buryo bugaragara”.

Kubera kugirirwa icyizere, usanga bamwe mu bashaka kugurisha imitungo bamubaza niba atabagurira, bityo agahita agana Umwalimu SACCO ukamuha amafaranga, ibyo bikaba ari byo avuga ko byatumye akomeza kwiteza imbere.

Ashimira Leta y’u Rwanda yahaye agaciro umwarimu, kuva Umukuru w’Igihugu yashyiraho ikigega cyo guteza imbere umwarimu, ntawucyambara nabi, nta mwarimu ubura amafaranga y’ishuri y’umwana.

Mukaremera avuga ko yarangije gushishikariza abarimu bakorana kugira inzu yo kubamo akanabasinyira. Muri rusange agira inama abarimu gutinyuka gukorana na Umwalimu SACCO kuko ari wo musingi wo kwiteza imbere.

NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA