Kigali: Batujwe mu Midugudu babasunika bagezeyo barahakunda
Amakuru

Kigali: Batujwe mu Midugudu babasunika bagezeyo barahakunda

Imvaho Nshya

October 15, 2023

Akenshi inzego za Leta zifata icyemezo kirebana n’abaturage habanje gukorwa ubukangurambaga bugamije kumvisha abaturage impamvu bakwiye kwimuka ahantu se, guhindura imibereho bamenyereye n’ibindi.

Rimwe na rimwe hari ubwo abaturage basobanurirwe ntibabyumve neza, cyangwa se hagasobanurirwa bake abandi bakimuka batarumva neza igitumye bimuka.

Bamwe mu batujwe mu Midugugu y’Icyitegererezo mu Mujyi wa Kigali bavuga ko nubwo bimuwe basa n’abasunikwa bageze mu macumbi batujwemo batangira kuhakunda bitewe n’uburyo hateguwe neza kandi hakaba hajyanye n’icyerekezo cy’Igihugu cyo gutuza abaturage mu buryo buzigama ubutaka.

Gusa abavuganye n’Imvaho Nshya, bagaragaje ko ibisuobanuro bahabwa bidahagije, bityo bakwiye kujya baganirizwa mbere yo kwimurwa. Kuko basanze ari nziza bahageze kandi bakabaye barabanje gusobanurirwa ibyo byiza mbere yo kwimurwa.

Abahatujwe barasaba ko   hajya habaho ibiganiro bihagije mbere yuko bimurwa. Byagarutsweho mu biganiro byabaye mu mpera z’iki cyumweru bigamije kurebera hamwe imibereho myiza y’abaturage batujwe mu midugudu y’icyitegererezo, hanibandwa ku buryo abantu bimurwa.

Ibyo biganiro byabaye ku wa Gatanu, byateguwe n’Ikigo cy’Ubushakashatsi n’Ubusabane bigamije amahoro (IRDP) gitumira abafatanyabikorwa batandukanye, barimo abafite aho bahuriye n’ibikorwa byo kwimura abaturage barimo Umujyi wa Kigali n’Ikigo  gishinzwe Imiturire mu Rwanda (RHA).

Mbyariyehe Abel na Umufite Chantal ni bamwe mu batujwe mu Mudugudu w’Icyitegererezo wa Karama. Bagaragaje ko hari bamwe batahawe ibisobanuro bihagije by’aho bagiye kwimurirwa bigatuma bumva batahakunze, nubwo bahageze bakahakunda cyane.

Mbyariyehe Abel ati: “Kuri bamwe bitewe n’aho umuntu avuye n’aho agiye atabashije guhabwa ibisobanuro bihagije bituma agenda yumva atabikunze bitewe n’aho yari ari amenyereye, akumva ni ubundi buzima agiyemo ataramenyera cyangwa atahawe ibisobanuro bihagije bigatuma agenda ari nko gusunika”.

Umufite Chantal nawe ati: “Agace runaka baba bashaka kwimuriramo abantu ngo babakure mu manegeka cyangwa mu miturire mibi usanga hakagombye kwigishwa bagabwa ibisobanuro, kuko hari nubwo usanga hari abimuriwe mu nzu zirimo ibikoresho batamenyereye ugasanga babikoresha nabi kubera kutamenya”.

Uwimana Leopold, Umubobozi Mukuru w’Imidugugu y’Icyitegererezo mu Rwanda, avug ko ibibazo bigaragara mu Midugudu y’Icyitegererezo bikwiye kuganirwaho kandi abaturage bakaba abagenerwabikorwa kugira ngo iyi mishinga itazagira ibibazo.

KAMALIZA AGNES

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA