Kigali: Hagiye kuzura inzira yihariye y’abakora siporo yo kwiruka
Amakuru

Kigali: Hagiye kuzura inzira yihariye y’abakora siporo yo kwiruka

NTAWITONDA JEAN CLAUDE

June 19, 2023

Umujyi wa Kigali washyize igorora abakunda siporo yo kwiruka n’amaguru, aho uri hafi gusoza  kubaka inzira yihariye y’ibilometero 2.4 yabagenewe i Nyarutarama mu Karere ka Gasabo, izenguruka Ikibuga  cya Golf. 

Uyu mushinga mushya ugamije kongerera agaciro ibikorwa bya siporo mu Mujyi wa Kigali no kurushaho guha Abanyakigali n’abayisura amahirwe yo gukora siporo babungabunga amagara yabo. 

Dr Mpabwanamaguru Merard, Umuyobozi w’Umujyi wa Kigali wungirije Ushinzwe Imiturire n’Ibikorwa Remezo, aheruka gutangaza ko intego nyamukuru yo gushyiraho inzira yihariye y’abiruka n’amaguru ari ukongerera agaciro ubunararibonye abitabira umukino wa Golf.

Iyo nzira yihariye y’ibilometero 2.4 ifite ubugari bwa metero enye bushashweho tapis y’icyatsi kibisi yagenewe korohereza abiruka, ku buryo baba batekanye kandi bumva bisanzuye.

Iyo nzira iri mu mushinga wagutse w’Umujyi wa Kigali wo kwimakaza imibereho n’ubuzima buboneye ku Banyakigali, himakazwa siporo n’indi mikino ngororamubiri igira uruhare rukomeye mu gukumira indwara zitandura (NCDs). 

Mpabwanamaguru yagize ati: “Gushyiraho inzira yihariye izenguruka ikibuga cya Golf ni intambwe y’ingenzi mu kwagura ibikorwa bya siporo mu Mujyi wa Kigali.”

The New Times ivuga ko uyu mushinga utagenewe gusa abitabira umukino wa Golf ahubwo buri wese ukunda guharanira ubuzima buzira umuze ahawe ikaze igihe cyose yakenera gukorera siporo yo kwiruka ahantu hatekanye kandi hajyanye n’igihe.

Ubuyobozi bw’Umujyi wa Kigali bwizera ko ku gutunganya ahantu hatandukanye ho gukorera siporo zirimo no kwiruka bizatuma abaturage barushaho gushyira imbere ubuzima bufite intego kandi buzira umuze.

Mpabwanamaguru ahamya ko iki gikorwa remezo gishya cyitezweho kuvumbura no kurera impano z’ahazaza mu mikino mpuzamahanga yo kwiruka n’amaguru. 

Iyo nzira yitezweho kuzaba umusemburo w’iteramberere ry’umukino wo kwiruka ari na ko yubakira u Rwanda umusingi wo kubaka ibigwi muri iyo siporo iri mu zikunzwe n’abantu benshi ku Isi.

Mu gihe iyo nzira iri hafi kuzura, Ubuyobozi bw’Umujyi wa Kigali burashishikariza abaturage kuyibyaza umusaruro wose ushoboka ari na ko bakoresha amahirwe yose azanye na yo. 

Mpabwanamaguru yakomoje no ku kamaro ko kubungabunga ibidukikije gahishe inyuma y’uwo mushinga kuko ari igikorwa remezo cyubatswe ahantu haramba kandi hubahiriza urusobe rw’ibinyabuzima bihakikije.

Iyi nzira yihariye ije nk’inyongera ikenewe ku bikorwa remezo bya siporo bikomeje kwiyongera mu Mujyi wa Kigali, uhereye kuri Sitade zivugururwa n’inshya zubakwa ukageza ku bibuga by’imikino itandukaye irimo na tennis ikinirwa ku muhanda.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA